കുറച്ചുദിവസമായി സോഷ്യൽ മീഡിയ നിറഞ്ഞുനിൽക്കുകയാണ് നടൻ നാഗാർജുനയുടെ കുടുംബവും മക്കളും. ഏറ്റവും ഒടുവിലായി നാഗചൈനതന്യയുടെ അർധ സഹോദരൻ അഖിൽ അക്കിനേനിയുടെ വിവാഹവിശേഷമാണ് സോഷ്യൽമീഡിയ കയ്യടക്കിയിരിക്കുന്നത്. പ്രശ്നം വേറൊന്നുമല്ല അഖിലിന്റെ പ്രായം 30 ഉം വധുവിന്റെ പ്രായം 39 ഉം ആണ്. ഇതോടെ സദാചാരക്കാരും യാഥാസ്ഥിതികരും ഉണർന്നു പ്രവർത്തിച്ചതോടെ കമന്റ് ബോക്സ് ഓഫാക്കി രക്ഷപെടേണ്ടി വന്നു നടന്.
നാഗചൈനതന്യയുടെ വിവാഹത്തിന് ദിവസങ്ങൾ മാത്രം ബാക്കി നിൽക്കെയാണ് അർധ സഹോദരൻ അഖിൽ അക്കിനേനിയുടെ വിവാഹവിശേഷം അക്കിനേനി കുടുംബം പുറത്തുവിട്ടത്. നടൻ നാഗാർജുനയുടെയും നടി അമലയുടെയും മകനാണ് അഖിൽ. ചിത്രകാരി സൈനബ് റാവ്ജിയാണ് വധു.
വ്യവസായിയായ സുൽഫി റാവ്ജിയുടെ മകൾ കൂടിയാണ് സൈനബ്. നിർമാണമേഖലയിലെ പ്രമുഖനാണ് സുൽഫി. ആർട്ടിസ്റ്റായ സൈനബ് ഇന്ത്യ, ദുബായ്, ലണ്ടൻ എന്നീ രാജ്യങ്ങൾ കേന്ദ്രീകരിച്ചാണ് പ്രവർത്തിക്കുന്നത്. സൈനബിന്റെ പെയിന്റിങ്ങുകൾ നിരവധി എക്സിബിഷനുകളിലും പ്രദർശിപ്പിച്ചിട്ടുണ്ട്. ലൈംലൈറ്റിൽ നിന്ന് മാറിനിൽക്കുന്നയാളാണ് സൈനബ്. സാമൂഹികമാധ്യമങ്ങളിലും സജീവമല്ല.
Related Post
വിവാഹവാർത്ത പുറത്തുവന്നതോടെ അഖിലും സൈനബും തമ്മിലുള്ള ഒൻപത് വയസ് പ്രായവ്യത്യാസം വലിയ ചർച്ചയായിരിക്കുകയാണ്. വധുവിന് വരനേക്കാൾ പ്രായം കൂടിയതാണ് പലരുടെയും നെറ്റി ചുളിച്ചത്. ഇത് സംബന്ധിച്ച പരിധികടക്കുന്ന കമന്റുകൾ വന്നതോടെ അഖിൽ ഇൻസ്റ്റഗ്രാമിലെ കമന്റ് ബോക്സ് ഓഫാക്കി. എന്നാൽ ഒട്ടേറെ പേർ അഖിലിനും സൈനബിനും പിന്തുണയുമായി വന്നു.
‘ചിലർ പ്രായം കൂടിയ വധുവിനെ കണ്ട് നെറ്റി ചുളിക്കുമ്പോൾ, പ്രായം കുറഞ്ഞ സ്ത്രീയെ പുരുഷൻ വിവാഹം കഴിക്കുന്നത് സ്വാഭാവികമായി കാണുന്ന സമൂഹത്തിൽ മറിച്ചാകുമ്പോൾ എന്താണ് പ്രശ്നം? എന്നും മറു പക്ഷം ചോദിക്കുന്നു. മറ്റുള്ളവരുടെ വ്യക്തിപരമായ കാര്യങ്ങളിൽ ഇടപെടുന്നതും അവരെ പരിസഹിക്കുന്നതും വകതിരിവ് ഇല്ലായ്മയാണ് വെളിവാക്കുന്നതെന്ന അഭിപ്രായക്കാരുമുണ്ട്.
അതേസമയം, നാഗചൈതന്യയുടെയും നടി ശോഭിത ധുലിപാലയുടെയും വിവാഹം ഡിസംബറിൽ നടക്കും. ഹൈദരാബാദിലെ അന്നപൂർണ സ്റ്റുഡിയോയായിരിക്കും വിവാഹവേദിയെന്നാണ് സൂചന. നാഗാർജുനയ്ക്ക് ആദ്യഭാര്യ ലക്ഷ്മി ദഗ്ഗുബാട്ടിയിൽ ഉണ്ടായ മകനാണ് നാഗചൈതന്യ. ലക്ഷ്മിയുമായുള്ള വിവാഹമോചനത്തിന് ശേഷമാണ് നാഗാർജുന സഹതാരമായ അമലയെ വിവാഹം ചെയ്യുന്നത്. 1994ലാണ് അഖിലിന്റെ ജനനം. ഏതാനും വർഷങ്ങൾക്ക് മുൻപാണ് അഖിൽ അക്കിനേനിയും സൈനബും കണ്ടുമുട്ടുന്നത്. ഇരുവരുടേയും സൗഹൃദം പ്രണയമായി വളരുകയായിരുന്നു. നേരത്തെ 2016ൽ ശ്രിയ ഭൂപാലുമായി അഖിലിന്റെ വിവാഹനിശ്ചയം കഴിഞ്ഞിരുന്നു. എന്നാൽ പിന്നീട് ഇരുവരും വിവാഹത്തിൽ നിന്നും പിന്മാറി.
