തിരുവനന്തപുരം: സി.ജെ.പി. പ്രതിഷേധത്തിന് പിന്തുണ അറിയിച്ച സിനിമാതാരങ്ങൾക്കെതിരെ സമൂഹമാധ്യമങ്ങളിൽ ഉയരുന്ന പ്രതിഷേധങ്ങളെ വിമർശിച്ച് മന്ത്രി പി.സി. വിഷ്ണുനാഥ്. അഭിപ്രായം പ്രകടിപ്പിച്ചതിന്റെ പേരിൽ കലാകാരന്മാരെ ലക്ഷ്യമിടുന്നത് ദൗർഭാഗ്യകരവും ജനാധിപത്യ മൂല്യങ്ങൾക്ക് വിരുദ്ധവുമാണെന്ന് അദ്ദേഹം പറഞ്ഞു. പ്രതികരിക്കാനും അഭിപ്രായം പറയാനും എല്ലാവർക്കും ഭരണഘടന ഉറപ്പുനൽകുന്ന അവകാശമുണ്ടെന്നും മന്ത്രി വ്യക്തമാക്കി.
അതേസമയം, ശബരിമല സ്വർണക്കൊള്ളക്കേസിൽ തിരുവിതാംകൂർ ദേവസ്വം ബോർഡ് മുൻ പ്രസിഡന്റ് പി.എസ്. പ്രശാന്ത് അറസ്റ്റിലായ സംഭവത്തിലും മന്ത്രി പ്രതികരിച്ചു. പ്രത്യേക അന്വേഷണസംഘം (എസ്.ഐ.ടി.) സ്വതന്ത്രമായാണ് അന്വേഷണം മുന്നോട്ടുകൊണ്ടുപോകുന്നതെന്നും സർക്കാരിന്റെ ഭാഗത്ത് നിന്ന് യാതൊരു ഇടപെടലും ഉണ്ടായിട്ടില്ലെന്നും അദ്ദേഹം പറഞ്ഞു.
അന്വേഷണം ആവശ്യമായാൽ കൂടുതൽ ഉയർന്ന തലങ്ങളിലേക്കും വ്യാപിപ്പിക്കണമെന്നും, കേസിൽ ഉൾപ്പെട്ട എല്ലാവരെയും നിയമത്തിന്റെ മുന്നിലെത്തിക്കണമെന്നും പി.സി. വിഷ്ണുനാഥ് ആവശ്യപ്പെട്ടു.
