ചെന്നൈ: തമിഴ്നാട് മുഖ്യമന്ത്രി കൂടിയായ തമിഴക വെട്രി കഴകം (ടിവികെ) നേതാവ് വിജയിയുടെ അമ്മയെക്കുറിച്ച് തമിഴ്നാട് ബിജെപി അധ്യക്ഷൻ നൈനാർ നാഗേന്ദ്രൻ നടത്തിയ വിവാദ പരാമർശം സംസ്ഥാന രാഷ്ട്രീയത്തിൽ വലിയ ചർച്ചയാവുന്നു. നാഗേന്ദ്രന്റെ പരാമർശത്തിനെതിരെ ഭരണകക്ഷിയായ ടിവികെയിൽനിന്നും വിവിധ രാഷ്ട്രീയ നേതാക്കളിൽനിന്നും രൂക്ഷ വിമർശനമാണ് ഉയർത്തുന്നത്. മുൻ തമിഴ്നാട് ബിജെപി അധ്യക്ഷൻ കെ. അണ്ണാമലൈയും നാഗേന്ദ്രന്റെ പരാമർശത്തെ തള്ളിപ്പറഞ്ഞ് രംഗത്തെത്തി.
സ്വാതന്ത്ര്യദിനമായ ശനിയാഴ്ച ചെന്നൈയിലെ ബിജെപി സംസ്ഥാന ആസ്ഥാനമായ കമലാലയത്തിൽ നടത്തിയ പ്രസംഗത്തിനിടെയാണ് നാഗേന്ദ്രൻ വിജയിയെ ലക്ഷ്യമിട്ടുള്ള വ്യക്തിപരമായ പരാമർശം നടത്തിയത്. നിയമസഭയിൽ “അച്ഛൻ എവിടെ?” എന്ന് അന്വേഷിക്കുന്നവർക്ക് അതിന്റെ ഉത്തരം അറിയണമെങ്കിൽ വീട്ടിൽ പോയി അമ്മയോട് ചോദിക്കണമെന്ന തരത്തിലായിരുന്നു നാഗേന്ദ്രന്റെ വാക്കുകൾ. വിജയിയുടെ അമ്മയെ നേരിട്ട് പരാമർശിക്കുന്ന തരത്തിലുള്ള ഈ പ്രസംഗമാണ് വലിയ വിവാദത്തിന് ഇടയാക്കിയത്.
‘നിയമസഭയിൽ കിടന്ന് ‘അച്ഛൻ എവിടെ? അച്ഛൻ എവിടെ?’ എന്ന് നിങ്ങൾ ചോദിച്ചുകൊണ്ടേയിരുന്നാൽ എങ്ങനെ അറിയാനാണ്? നിങ്ങൾ വീട്ടിൽ പോയി നിങ്ങളുടെ അമ്മയോട് ചോദിക്കണം; അപ്പോൾ മാത്രമേ അച്ഛൻ എവിടെയാണെന്ന് അവർ നിങ്ങളോട് പറയൂ. നിയമസഭയിൽ വന്ന് അച്ഛനെ തിരഞ്ഞാൽ ആർക്കറിയാം?’ എന്നായിരുന്നു ബിജെപി നേതാവിന്റെ പ്രസ്താവന.
Related Post
വിജയ് നിയമസഭയിൽ നടത്തിയ നേരത്തെയുള്ള “അച്ഛൻ എവിടെ?” എന്ന പരാമർശത്തിന് മറുപടിയായാണ് നാഗേന്ദ്രൻ ഇത്തരത്തിൽ സംസാരിച്ചതെന്നാണ് റിപ്പോർട്ടുകൾ പറയുന്നത്. 2026ലെ നിയമസഭാ തെരഞ്ഞെടുപ്പിൽ ഡിഎംകെയുടെ പരാജയവും എം.കെ. സ്റ്റാലിന്റെ രാഷ്ട്രീയ നിലപാടുകളെയും പരാമർശിച്ചുകൊണ്ടാണ് വിജയ് നിയമസഭയിൽ “അച്ഛൻ എവിടെ?” എന്ന പ്രയോഗം നടത്തിയതെന്നാണ് റിപ്പോർട്ട്. അതിന് മറുപടിയായി അതേ പ്രയോഗം തിരിച്ച് വിജയിക്കെതിരെ ഉപയോഗിക്കുകയായിരുന്നു നാഗേന്ദ്രൻ.
എന്നാൽ രാഷ്ട്രീയ എതിർപ്പിന്റെ പേരിൽ ഒരു നേതാവിന്റെ കുടുംബാംഗങ്ങളെ, പ്രത്യേകിച്ച് അമ്മയെ, വ്യക്തിപരമായി അധിക്ഷേപിക്കുന്ന തരത്തിൽ സംസാരിക്കുന്നത് അംഗീകരിക്കാനാകില്ലെന്നാണ് വിമർശകരുടെ നിലപാട്. നാഗേന്ദ്രന്റെ പ്രസംഗത്തിനെതിരെ ചെന്നൈ ഡിജിപി ഓഫീസിൽ പരാതി ലഭിച്ചതായും റിപ്പോർട്ടുകൾ പറയുന്നു. നാഗേന്ദ്രന്റെ പ്രസംഗത്തിന്റെ സോഷ്യൽ മീഡിയയിൽ പ്രചരിച്ച വീഡിയോകളുടെ അടിസ്ഥാനത്തിൽ പോലീസ് പരാതി പരിശോധിക്കുന്നതായും റിപ്പോർട്ടുകൾ പറയുന്നു.
അതേസമയും ടിവികെ മന്ത്രി രാജ്മോഹൻ നാഗേന്ദ്രന്റെ പ്രസംഗത്തെ ശക്തമായി അപലപിച്ചു. മുതിർന്ന രാഷ്ട്രീയ നേതാവിന്റെ സ്ഥാനത്തിന് ചേരാത്ത സംസ്കാര ശൂന്യവും അപകീർത്തികരവുമായ പരാമർശമാണ് ബിജെപി സംസ്ഥാന അധ്യക്ഷൻ നടത്തിയതെന്ന് അദ്ദേഹം വിമർശിച്ചു. രാഷ്ട്രീയത്തിൽ പ്രകോപനങ്ങളുണ്ടായാലും നേതാക്കൾ മാന്യവും സഭ്യവുമായ ഭാഷയും രാഷ്ട്രീയ മര്യാദയും പാലിക്കണമെന്ന നിലപാടും ടിവികെ നേതാക്കൾ പറഞ്ഞു.
ഇതിനിടെ മുൻ തമിഴ്നാട് ബിജെപി അധ്യക്ഷൻ കെ. അണ്ണാമലൈ നടത്തിയ വിമർശനമാണ് വിവാദത്തിന് കൂടുതൽ രാഷ്ട്രീയ പ്രാധാന്യം നൽകിയത്. തമിഴ്നാട് രാഷ്ട്രീയത്തിലെ പ്രസംഗങ്ങൾ തുടർച്ചയായി അസഭ്യവും നിലവാരം കുറഞ്ഞതുമായ ഭാഷയിലേക്ക് മാറുന്നത് ശക്തമായി അപലപിക്കേണ്ടതാണെന്നും അണ്ണാമലൈ പറഞ്ഞു. രാഷ്ട്രീയ അഭിപ്രായ വ്യത്യാസങ്ങൾ സ്വാഭാവികമാണെന്നും സർക്കാരിന്റെ നയങ്ങളെ വിമർശിക്കാനും ഭരണനടപടികളെ ചോദ്യം ചെയ്യാനും എല്ലാവർക്കും അവകാശമുണ്ടെന്നും അദ്ദേഹം വ്യക്തമാക്കി. എന്നാൽ ഒരു രാഷ്ട്രീയ നേതാവിന്റെ കുടുംബത്തെ, പ്രത്യേകിച്ച് അമ്മയെ, അപമാനിക്കുന്ന രീതിയിൽ സംസാരിക്കുന്നത് ഒരു സാഹചര്യത്തിലും അംഗീകരിക്കാനാകില്ലെന്നും അണ്ണാമലൈ പറഞ്ഞു.
ഇത്തരം പരാമർശങ്ങളെ “നിലവാരം കുറഞ്ഞ” രാഷ്ട്രീയമെന്നും “മൂന്നാംതരം” രാഷ്ട്രീയമെന്നും വിശേഷിപ്പിച്ച അണ്ണാമലൈ, തമിഴ്നാട്ടിലെ യുവതലമുറയ്ക്കും കുട്ടികൾക്കും രാഷ്ട്രീയ നേതാക്കൾ നൽകേണ്ട മാതൃക ഇതല്ലെന്നും വ്യക്തമാക്കി. രാഷ്ട്രീയ നേതാക്കൾ സ്വന്തം വാക്കുകൾക്കും പ്രവർത്തനങ്ങൾക്കും ഉത്തരവാദികളായിരിക്കണമെന്നും അദ്ദേഹം ആവശ്യപ്പെട്ടു.
ഇതിനിടെ നൈനാർ നാഗേന്ദ്രനെതിരെ വിവിധ ടിവികെ നേതാക്കളും രംഗത്തെത്തി. മുഖ്യമന്ത്രിയെയും അദ്ദേഹത്തിന്റെ കുടുംബത്തെയും വ്യക്തിപരമായി ലക്ഷ്യമിട്ട് നടത്തുന്ന ഇത്തരം പരാമർശങ്ങൾ രാഷ്ട്രീയ വിമർശനത്തിന്റെ പരിധി കടന്നതാണെന്നാണ് ടിവികെയുടെ നിലപാട്. നാഗേന്ദ്രൻ പരസ്യമായി മാപ്പുപറയണമെന്ന ആവശ്യവും ഉയർന്നിട്ടുണ്ട്.
അതേസമയം, നാഗേന്ദ്രന്റെ പുതിയ പരാമർശം ഒറ്റപ്പെട്ട സംഭവമല്ലെന്നും വിജയിയെക്കുറിച്ചുള്ള വ്യക്തിപരമായ പരാമർശങ്ങൾ മുൻപും വിവാദമായിട്ടുണ്ടെന്നും റിപ്പോർട്ടുകൾ ചൂണ്ടിക്കാട്ടുന്നു. തെരഞ്ഞെടുപ്പ് പ്രചാരണകാലത്ത് നടി തൃഷ കൃഷ്ണനെ വിജയിയുമായി ബന്ധപ്പെടുത്തി നടത്തിയ പരാമർശത്തിലും നാഗേന്ദ്രൻ വിമർശനം നേരിട്ടിരുന്നു. കൂടാതെ ടിവികെ റാലികളുമായി ബന്ധപ്പെട്ട മരണങ്ങളെക്കുറിച്ചുള്ള അദ്ദേഹത്തിന്റെ നേരത്തെയുള്ള പരാമർശവും വിവാദമായിരുന്നു.
വിജയ് മുഖ്യമന്ത്രിയായതിനു പിന്നാലെ തമിഴ്നാട്ടിൽ ബിജെപിയും ടിവികെയും തമ്മിലുള്ള രാഷ്ട്രീയ പോര് കൂടുതൽ ശക്തമായിട്ടുണ്ട്. നിയമസഭയിലെ പരാമർശങ്ങളും സർക്കാർ നയങ്ങളിലെ വിമർശനങ്ങളും വ്യക്തിപരമായ രാഷ്ട്രീയ ആക്രമണങ്ങളുമാണ് ഇപ്പോൾ ഇരു വിഭാഗങ്ങൾക്കുമിടയിലെ വാക്പോരിന് വഴിയൊരുക്കുന്നത്.