ന്യൂഡൽഹി: കഴിഞ്ഞ കളിയിൽ കേട്ട വിമർശനങ്ങൾക്ക് ബാറ്റുകൊണ്ട് ചുട്ടമറുപടി നൽകി മലയാളി താരം സഞ്ജു സാംസൺ. ചേട്ടന്റെ തകർപ്പൻ അർധ സെഞ്ചറിയുടെ കരുത്തിൽ അഫ്ഗാനിസ്ഥാനെതിരായ രണ്ടാം ട്വന്റി20യിൽ ഇന്ത്യയ്ക്ക് ഏഴു വിക്കറ്റ് വിജയം. അഫ്ഗാൻ ഉയർത്തിയ 160 റൺസ് വിജയലക്ഷ്യം 31 പന്തുകളും ഏഴു വിക്കറ്റുകളും ബാക്കിനിൽക്കെ ഇന്ത്യ മറികടന്നു. രണ്ട് ജയത്തോടെ മൂന്ന് മത്സരങ്ങളടങ്ങിയ പരമ്പര ഇന്ത്യ 2–0ന് സ്വന്തമാക്കി. ഓപ്പണറായിറങ്ങിയ സഞ്ജു സാംസൺ 22 പന്തിൽ 57 റൺസെടുത്തപ്പോൾ അഭിഷേക് ശർമ (19 പന്തിൽ 39), ഇഷാൻ കിഷൻ (23 പന്തിൽ 38) എന്നിവരും ബാറ്റിങ്ങിൽ ഇന്ത്യയ്ക്ക് കരുത്തായി.
മറുപടി ബാറ്റിങ്ങിൽ അഭിഷേക് ശർമയാണ് ആദ്യം അടിക്ക് തുടക്കമിട്ടത്. കളി മെല്ലെതുടങ്ങിയ സഞ്ജു അഭിഷേകിനു മികച്ച പിന്തുണ നൽകി. വൈകാതെ സഞ്ജുവും ഓണായതോടെ ബൗണ്ടറികൾ തുടരെത്തുടരെ പാഞ്ഞു. പവർപ്ലേയിൽ വിക്കറ്റ് പോകാതെ 82 റൺസാണ് ഇരുവരും അടിച്ചെടുത്തത്. സ്കോർ 88 ൽ നിൽക്കെ അഭിഷേക് ശർമയെ റാഷിദ് ഖാൻ സെദ്ദിക്കുല്ല അടലിന്റെ കൈകളിലെത്തിച്ചു. വൈകാതെ 20 പന്തുകളിൽനിന്നാണ് സഞ്ജു അർധ സെഞ്ചറി കടന്നത്. റാഷിദ് ഖാനെറിഞ്ഞ ഏഴാം ഓവറിലെ അവസാന പന്ത് സിക്സർ പറത്താനുള്ള ശ്രമത്തിനിടെ ബൗണ്ടറി ലൈനിൽവച്ച് മുഹമ്മദ് നബി ക്യാച്ചെടുത്തു സഞ്ജുവിനെ പുറത്താക്കി. 7.1 ഓവറിൽ ഇന്ത്യ 100 കടന്നു.
11 റൺസെടുത്ത ക്യാപ്റ്റൻ ശ്രേയസ് അയ്യരും റാഷിദ് ഖാന്റെ പന്തിൽ പുറത്തായി. പിന്നാലെയെത്തിയ ഇഷാൻ കിഷനും തിലക് വർമയും (14 പന്തിൽ 15) ചേർന്ന് 14.5 ഓവറിൽ മൂന്ന് വിക്കറ്റ് നഷ്ടത്തിൽ ഇന്ത്യയെ വിജയത്തിലെത്തിച്ചു. വ്യാഴാഴ്ച പരമ്പരയിലെ അവസാന മത്സരം ന്യൂഡൽഹിയിൽ നടക്കും.
Related Post
അതേസമയം ടോസ് നഷ്ടപ്പെട്ട് ബാറ്റിങ്ങിനിറങ്ങിയ അഫ്ഗാനിസ്ഥാൻ 20 ഓവറിൽ എട്ടു വിക്കറ്റ് നഷ്ടത്തിൽ 159 റൺസടിച്ചു. 33 പന്തിൽ 37 റൺസെടുത്ത ക്യാപ്റ്റൻ ഇബ്രാഹിം സദ്രാനാണ് അഫ്ഗാനിസ്ഥാന്റെ ടോപ് സ്കോറർ. റാഷിദ് ഖാൻ (16 പന്തിൽ 28), ദർവീഷ് റസൂലി (15 പന്തിൽ 26), മുഹമ്മദ് നബി (14 പന്തിൽ 20) എന്നിവരും ബാറ്റിങ്ങിൽ പിടിച്ചുനിന്നു.