തെഹ്റാൻ: അമേരിക്ക- ഇസ്രായേൽ സംയുക്താക്രമണത്തിൽ കൊല്ലപ്പെട്ട ഇറാന്റെ പരമോന്നത നേതാവ് അലി ഖമേനെയിയുടെ മൃതദേഹം വെള്ളിയാഴ്ച തെഹ്റാനിലെ ഗ്രാൻഡ് മൊസല്ലയിലേക്ക് എത്തിച്ചു. ഔദ്യോഗിക സംസ്കാര ചടങ്ങുകൾക്ക് മുന്നോടിയായാണ് മൃതദേഹം പൊതുജനങ്ങൾക്ക് അനുസ്മരണാർത്ഥം ഇവിടെ എത്തിച്ചതെന്ന് മാധ്യമങ്ങൾ റിപ്പോർട്ട് ചെയ്തു.
ശനിയാഴ്ച നടക്കുന്ന ഔദ്യോഗിക സംസ്കാര ചടങ്ങിൽ കോടിക്കണക്കിന് ആളുകളും വിവിധ രാജ്യങ്ങളിൽ നിന്നുള്ള പ്രതിനിധികളും പങ്കെടുക്കുമെന്നാണ് പ്രതീക്ഷ. ഖമനേയിയുടെ മരണത്തിന് പ്രതികാരമായി വലിയ ജനപങ്കാളിത്തം ഉറപ്പാക്കണമെന്ന് തെഹ്റാനിലെ പ്രധാന ചർച്ചാകർത്താവും പാർലമെന്റ് സ്പീക്കറുമായ മുഹമ്മദ് ബാഘർ ഘാലിബാഫ് ആഹ്വാനം ചെയ്തു.
ഇറാന്റെ ത്രിവർണ പതാക പൊതിഞ്ഞ ഖമനേയിയുടെ പെട്ടി ദുഃഖാചരണക്കാർ ഗ്രാൻഡ് മൊസല്ലയിലേക്ക് കൊണ്ടുപോകുന്ന ദൃശ്യങ്ങൾ പുറത്തുവന്നു. കറുത്ത വസ്ത്രം ധരിച്ച ജനക്കൂട്ടങ്ങൾ പൂക്കളും അലങ്കാരങ്ങളും നിറഞ്ഞ പശ്ചാത്തലത്തിൽ അനുസ്മരണച്ചടങ്ങുകളിൽ പങ്കെടുത്തതും ചിത്രങ്ങളിൽ കാണാം.
മിഡിൽ ഈസ്റ്റ് യുദ്ധത്തെത്തുടർന്ന വൈകിയ പൊതു ശവസംസ്കാരത്തിനായുള്ള ഒരുക്കങ്ങൾ ഇപ്പോൾ വേഗത്തിലാണ് പുരോഗമിക്കുന്നത്. ഇറാനും അമേരിക്കയും തമ്മിൽ താൽക്കാലിക യുദ്ധവിരാമ കരാറിൽ എത്തിയ സാഹചര്യത്തിലാണ് ചടങ്ങുകൾ നടക്കുന്നത്.
അമേരിക്ക- ഇറാൻ ചർച്ചകളിൽ പ്രധാന മധ്യസ്ഥനായിരുന്നു പാക്കിസ്ഥാൻ. ചടങ്ങിൽ പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് പങ്കെടുക്കുമെന്ന് അറിയിച്ചു. കൂടാതെ ചൈന, അഫ്ഗാനിസ്ഥാൻ, കൗക്കസസ് മേഖലകളിലെ രാജ്യങ്ങൾ തങ്ങളുടെ പ്രതിനിധികളെ അയയ്ക്കും.
ഗ്രാൻഡ് മൊസല്ലയിൽ ഖമനേയിയുടെ മൃതദേഹം മൂന്ന് ദിവസത്തേക്ക് പൊതുദർശനത്തിന് വയ്ക്കും. അദ്ദേഹത്തിന്റെ കുടുംബാംഗങ്ങളുടെയും ആക്രമണത്തിൽ കൊല്ലപ്പെട്ട മറ്റ് ബന്ധുക്കളുടെയും മൃതദേഹങ്ങളും പൊതുജനങ്ങൾക്ക് മുന്നിൽ പ്രദർശിപ്പിക്കും. സംസ്കാര ചടങ്ങുകൾക്ക് 1.5 മുതൽ 2 കോടി വരെ ആളുകൾ പങ്കെടുക്കുമെന്നാണ് കണക്ക്. ഇത് രാജ്യത്തിന്റെ ചരിത്രത്തിലെ ഏറ്റവും വലിയ സംസ്ഥാന ശവസംസ്കാരമായി മാറാൻ സാധ്യതയുണ്ട്. തെഹ്റാനിനൊപ്പം ഖോം, മഷ്ഹദ് എന്നീ പുണ്യനഗരങ്ങളിലും ചടങ്ങുകളുടെ തുടർഘട്ടങ്ങൾ നടക്കും.
ചടങ്ങുകളുടെ ഭാഗമായി തെഹ്റാനിൽ ശനിയാഴ്ച മുതൽ തിങ്കളാഴ്ച വരെ സർക്കാർ- സ്വകാര്യ ഓഫീസുകൾ അടച്ചിടും. ഗതാഗത നിയന്ത്രണങ്ങളും വിമാന സർവീസുകളിലും നിയന്ത്രണങ്ങളും ഏർപ്പെടുത്തിയിട്ടുണ്ട്. തെഹ്റാനിലെ ചടങ്ങുകൾക്ക് ശേഷം ഖമേനെയിയുടെ മൃതദേഹം ഇറാഖിലെ നജഫ്, കര്ബല എന്നിവിടങ്ങളിലേക്കും പിന്നീട് ജൂലൈ 9-ന് അദ്ദേഹത്തിന്റെ ജന്മനാടായ മഷ്ഹദിലെ ഇമാം റേസാ പള്ളിയിൽ സംസ്കരിക്കും.
അതേസമയം തന്റെ 86-ആം വയസിൽ തെഹ്റാനിലെ വസതിയിൽ നടന്ന വ്യോമാക്രമണത്തിലാണ് ഖമനേയി കൊല്ലപ്പെട്ടത്. ഷിയ സമുദായത്തിന് ആത്മീയ മാർഗദർശിയായിരുന്ന അദ്ദേഹം ഇറാന്റെ രാഷ്ട്രീയ-മതപരമായ മേഖലകളിൽ ദീർഘകാലം സ്വാധീനം ചെലുത്തിയ നേതാവായിരുന്നു.
