ലണ്ടൻ: ബ്രിട്ടന്റെ പുതിയ പ്രധാനമന്ത്രിയായി ലേബർ പാർട്ടി നേതാവ് ആൻഡി ബേൺഹാം ഇന്ന് സ്ഥാനമേൽക്കും. ജനപ്രീതി ഇടിഞ്ഞതിനെ തുടർന്ന് കെയ്ർ സ്റ്റാർമർ രാജിവച്ച സാഹചര്യത്തിലാണ് മുൻ ഗ്രേറ്റർ മാഞ്ചസ്റ്റർ മേയറായ ബേൺഹാം രാജ്യത്തിന്റെ പുതിയ നേതാവാകുന്നത്. കഴിഞ്ഞ പത്ത് വർഷത്തിനിടെ ബ്രിട്ടന്റെ ഏഴാമത്തെ പ്രധാനമന്ത്രിയായാണ് അദ്ദേഹം അധികാരമേൽക്കുന്നത്.
ചാൾസ് രാജാവ് കെയ്ർ സ്റ്റാർമറുടെ രാജി ഔദ്യോഗികമായി സ്വീകരിച്ചതോടെയാണ് അധികാരമാറ്റ നടപടികൾ പൂർത്തിയായത്. ബക്കിങ്ഹാം കൊട്ടാരത്തിലെത്തുന്ന ആൻഡി ബേൺഹാമിനെ പുതിയ സർക്കാർ രൂപീകരിക്കാൻ രാജാവ് ക്ഷണിക്കും. തുടർന്ന് പ്രധാനമന്ത്രിയായി അദ്ദേഹം ആദ്യമായി രാജ്യത്തെ അഭിസംബോധന ചെയ്യും.
വെള്ളിയാഴ്ച നടന്ന ലേബർ പാർട്ടി നേതൃതിരഞ്ഞെടുപ്പിൽ എതിരില്ലാതെയാണ് ബേൺഹാം തിരഞ്ഞെടുക്കപ്പെട്ടത്. ഹൗസ് ഓഫ് കോമൺസിലെ 403 ലേബർ എംപിമാരിൽ 379 പേരുടെ പിന്തുണ അദ്ദേഹത്തിന് ലഭിച്ചു. 2016-ന് ശേഷം ബ്രിട്ടനിൽ നടക്കുന്ന ഏഴാമത്തെ പ്രധാനമന്ത്രി മാറ്റമാണിത്.
കഴിഞ്ഞ പത്ത് വർഷത്തിനിടെ ബ്രിട്ടനിൽ നിരന്തരം നേതൃമാറ്റങ്ങൾ നടന്ന സാഹചര്യത്തിൽ രാജ്യത്തിന് രാഷ്ട്രീയ സ്ഥിരത തിരിച്ചുകൊണ്ടുവരിക എന്നതായിരിക്കും ബേൺഹാമിന്റെ പ്രധാന ലക്ഷ്യമെന്ന് അദ്ദേഹത്തിന്റെ വക്താവ് അറിയിച്ചു.
രണ്ടുവർഷം മുമ്പ് അധികാരമേറ്റപ്പോൾ സ്ഥിരതയും മാറ്റവും വാഗ്ദാനം ചെയ്തിരുന്ന കെയ്ർ സ്റ്റാർമറിന് ഭരണപരമായ വീഴ്ചകളും ജനപിന്തുണയിലെ ഇടിവും തിരിച്ചടിയായി. പാർട്ടിക്കുള്ളിൽ വിമർശനം ശക്തമായതിനെ തുടർന്ന് കഴിഞ്ഞ മാസം അദ്ദേഹം രാജി പ്രഖ്യാപിക്കുകയായിരുന്നു.
അധികാരമേൽക്കുന്നതിന് മുമ്പുതന്നെ ബേൺഹാം സുപ്രധാന നയതീരുമാനങ്ങളും പ്രഖ്യാപിച്ചിട്ടുണ്ട്. സ്റ്റാർമർ സർക്കാർ നടപ്പാക്കാൻ പദ്ധതിയിട്ടിരുന്ന 1.8 ബില്യൺ പൗണ്ട് ചെലവുള്ള ഡിജിറ്റൽ ഐഡി പദ്ധതി അദ്ദേഹം റദ്ദാക്കി. ഇതിലൂടെ ലാഭിക്കുന്ന തുക ജനങ്ങളുടെ ജീവിതച്ചെലവ് കുറയ്ക്കുന്നതിനും മറ്റ് അടിയന്തര ആവശ്യങ്ങൾക്കും വിനിയോഗിക്കുമെന്നാണ് പ്രഖ്യാപനം.
ധനമന്ത്രി സ്ഥാനത്തുനിന്ന് മാറിയ റെയ്ച്ചൽ റീവ്‌സിന് പകരക്കാരനടക്കമുള്ള പുതിയ മന്ത്രിസഭാംഗങ്ങളുടെ പ്രഖ്യാപനവും ഇന്ന് ഉണ്ടാകുമെന്നാണ് റിപ്പോർട്ട്.
അതേസമയം, മന്ദഗതിയിലുള്ള സാമ്പത്തിക വളർച്ച, ഉയർന്ന പൊതുകടം, കുടിയേറ്റ പ്രശ്നങ്ങൾ, ആഗോള ഊർജ്ജവിലക്കയറ്റം എന്നിവ പുതിയ പ്രധാനമന്ത്രിക്ക് വലിയ വെല്ലുവിളികളായിരിക്കും. അടുത്ത പൊതുതിരഞ്ഞെടുപ്പിന് മൂന്ന് വർഷം മാത്രം ശേഷിക്കെ, പാർട്ടിയെയും രാജ്യത്തെയും ശരിയായ ദിശയിലേക്ക് നയിക്കാനുള്ള നിർണായക അവസരമാണിതെന്ന് ബേൺഹാം അനുയായികളോട് വ്യക്തമാക്കിയിട്ടുണ്ട്.
