ന്യൂഡൽഹി: മാസപ്പടി കേസിൽ നിർണായക വെളിപ്പെടുത്തലുമായി എസ്എഫ്ഐഒ കോടതിയിൽ. സിഎംആർഎൽ രാഷ്ട്രീയ നേതാക്കൾക്കും മാധ്യമങ്ങൾക്കും പണം നൽകിയത് അഴിമതി മറയ്ക്കാനാണെന്ന് എസ്എഫ്ഐഒ ഡൽഹി ഹൈക്കോടതിയെ അറിയിച്ചു. എസ്എഫ്ഐഒ അന്വേഷണം റദ്ദാക്കണമെന്നാവശ്യപ്പെട്ട് സിഎംആർഎൽ നൽകിയ ഹർജിയിലെ വാദത്തിനിടെയാണ് ഗുരുതരമായ ആരോപണവുമായി കോടതിയിലെത്തിയത്. ഇരുവിഭാഗങ്ങളോടും തങ്ങളുടെ വാദങ്ങൾ ഒരാഴ്ചയ്ക്കകം എഴുതി നൽകാൻ കോടതി നിർദേശം നൽകി.
തുടർന്ന് ഹർജി വിധി പറയാനായി മാറ്റിവച്ചു. സിഎംആർഎല്ലിൻറെ ഹർജി നിലനിൽക്കില്ലെന്ന് എസ്എഫ്ഐഒ കോടതിയിൽ ചൂണ്ടിക്കാട്ടി. എസ്എഫ്ഐഒ അന്വേഷണത്തെ ന്യായീകരിച്ച് ആദായ നികുതി വകുപ്പും രംഗത്തെത്തി. ആദായ നികുതി സെറ്റിൽമെൻറ് ബോർഡ് ഉത്തരവ് അന്തിമമല്ല. രേഖകൾ കൈമാറാൻ ഐടി വകുപ്പിന് അധികാരമുണ്ടെന്നും ആദായ നികുതി വകുപ്പ് അറിയിച്ചു.
ഇതിനെ കുറിച്ച് കൃത്യമായി നിയമങ്ങൾ ഉണ്ടെന്നും ആദായ നികുതി വകുപ്പ് കോടതിയെ അറിയിച്ചു. സെറ്റിൽമെൻറ് കമ്മീഷൻ ഉത്തരവുകൾക്കു ശേഷവും അന്വേഷണമാകാം. ഇൻററിം സെറ്റിൽമെൻറ് ബോർഡ് തീർപ്പാക്കിയാലും അന്വേഷിക്കാൻ അധികാരമുണ്ടെന്നും എസ്എഫ്ഐഒ കോടതിയിൽ പറഞ്ഞു.
Related Post
