ന്യൂഡൽഹി: ചിക്കുൻഗുനിയ വൈറസിനെതിരെ പ്രവർത്തിക്കാൻ കഴിയുന്ന ചില ആന്റിവൈറൽ ഘടകങ്ങൾ ഗോമൂത്രത്തിൽ അടങ്ങിയിട്ടുണ്ടെന്ന് സൂചിപ്പിക്കുന്ന പഠനവുമായി Indian Institute of Technology Roorkee. ഗവേഷണഫലങ്ങൾ ACS Agricultural Science & Technology ജേണലിൽ പ്രസിദ്ധീകരിച്ചിട്ടുണ്ട്.
ഐഐടി റൂർക്കിയിലെ ബയോസയൻസസ് ആൻഡ് ബയോഎഞ്ചിനീയറിംഗ് വിഭാഗത്തിലെ പ്രൊഫ. ശൈലി തോമറിന്റെ നേതൃത്വത്തിലുള്ള സംഘമാണ് പഠനം നടത്തിയത്. വിവിധ ആയുർവേദ, ബയോമെഡിക്കൽ ഗവേഷണ സ്ഥാപനങ്ങളുമായി സഹകരിച്ചായിരുന്നു ഗവേഷണം.
ലബോറട്ടറി സാഹചര്യത്തിൽ നടത്തിയ പരീക്ഷണങ്ങളിൽ, ശുദ്ധീകരിച്ച ഗോമൂത്രം ചിക്കുൻഗുനിയ വൈറസ് ബാധിച്ച കോശങ്ങളിൽ ചേർത്തപ്പോൾ വൈറസിന്റെ അളവ് 90 ശതമാനത്തിലധികം കുറയുന്നതായി കണ്ടെത്തിയെന്ന് ഗവേഷകർ പറയുന്നു. ബെൻസോയിക് ആസിഡ്, ഹിപ്യൂരിക് ആസിഡ്, ഒലെയിക് ആസിഡ് തുടങ്ങിയ സംയുക്തങ്ങളാണ് ഇതിൽ പ്രധാന പങ്കുവഹിക്കുന്നതെന്നും പഠനം ചൂണ്ടിക്കാട്ടുന്നു.
കൂടാതെ, ഗോമൂത്രത്തിനൊപ്പം കറുത്ത ജീരകത്തിൽ അടങ്ങിയ തൈമോക്വിനോണും കുരുമുളകിലെ പൈപ്പറിനും ചേർത്ത് പരീക്ഷിച്ചപ്പോൾ വൈറസിന്റെ സാന്നിധ്യം 99.85 ശതമാനം വരെ കുറയ്ക്കാനായതായി ഗവേഷകർ അവകാശപ്പെടുന്നു.
എന്നാൽ ഈ കണ്ടെത്തലുകൾ ലബോറട്ടറി പരീക്ഷണങ്ങളിൽ നിന്നുള്ളതാണെന്നും, മനുഷ്യരിൽ ഉപയോഗിക്കാവുന്ന ചികിത്സയായി ഇതിനെ ഇപ്പോൾ പരിഗണിക്കാനാകില്ലെന്നും ഗവേഷകർ തന്നെ വ്യക്തമാക്കുന്നു. സുരക്ഷിതത്വവും ഫലപ്രാപ്തിയും ഉറപ്പാക്കാൻ കൂടുതൽ ക്ലിനിക്കൽ പരീക്ഷണങ്ങളും വിശദമായ പഠനങ്ങളും ആവശ്യമാണ്.
ഐഐടി റൂർക്കി ഡയറക്ടർ പ്രൊഫ. കമാൽ കിഷോർ പന്തിന്റെ അഭിപ്രായത്തിൽ, വൈറൽ രോഗങ്ങൾ വർധിക്കുന്ന സാഹചര്യത്തിൽ ചെലവുകുറഞ്ഞതും ശാസ്ത്രീയമായി പരിശോധിക്കാവുന്നതുമായ പുതിയ മാർഗങ്ങൾ കണ്ടെത്തേണ്ടത് അനിവാര്യമാണ്. അതേസമയം, ചിക്കുൻഗുനിയയ്ക്കുള്ള നിലവിലെ വൈദ്യശാസ്ത്ര ചികിത്സയ്ക്ക് പകരമായി ഗോമൂത്ര ചികിത്സ പ്രോത്സാഹിപ്പിക്കുന്നില്ലെന്നും ഗവേഷകർ ആവർത്തിച്ച് വ്യക്തമാക്കുന്നു.
ചിക്കുൻഗുനിയയെക്കുറിച്ച് അറിയേണ്ടത്
ഈഡിസ് ഈജിപ്തി/ആൽബോപിക്റ്റസ് കൊതുകുകളാണ് ചിക്കുൻഗുനിയ പടർത്തുന്നത്. സാധാരണയായി രോഗബാധയ്ക്ക് ശേഷം നാല് മുതൽ എട്ട് ദിവസത്തിനുള്ളിൽ ലക്ഷണങ്ങൾ പ്രകടമാകും.
പ്രധാന ലക്ഷണങ്ങൾ:
പെട്ടെന്നുള്ള ഉയർന്ന പനി
കടുത്ത സന്ധിവേദന
പേശിവേദന
തലവേദന
ക്ഷീണം
ചിലരിൽ ചർമത്തിൽ തടിപ്പുകൾ
ഈ ലക്ഷണങ്ങൾ കണ്ടാൽ സ്വയംചികിത്സയ്ക്ക് ശ്രമിക്കാതെ ഉടൻ വൈദ്യസഹായം തേടണമെന്ന് ആരോഗ്യവിദഗ്ധർ നിർദേശിക്കുന്നു. കൊതുക് വളരുന്ന സാഹചര്യം ഒഴിവാക്കുകയും വ്യക്തിഗത സുരക്ഷാ മുൻകരുതലുകൾ സ്വീകരിക്കുകയും ചെയ്യുന്നത് രോഗപ്രതിരോധത്തിന് പ്രധാനമാണ്.
