ന്യൂഡൽഹി: കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെച്ചതിന് പിന്നാലെ പ്രതികരണവുമായി സിജെപി സമരനായകൻ അഭിജീത് ദീപ്കെ. “വീണത് ആദ്യ വിക്കറ്റ് മാത്രമാണ്. ഇതുകൊണ്ട് സമരം അവസാനിക്കുന്നില്ല” എന്ന് അദ്ദേഹം പറഞ്ഞു. 36 ദിവസമായി സമരരംഗത്ത് ഉറച്ചുനിന്ന എല്ലാ വിദ്യാർഥികൾക്കും സല്യൂട്ട് അർപ്പിക്കുന്നതായും അദ്ദേഹം വ്യക്തമാക്കി.
നീറ്റ് പരീക്ഷാ ക്രമക്കേടിനെതിരെ നടന്ന രാജ്യവ്യാപക പ്രക്ഷോഭത്തിന് നേതൃത്വം നൽകിയവരിൽ പ്രധാനിയായിരുന്നു അഭിജീത് ദീപ്കെ. പ്രതിഷേധത്തിനിടെ നീറ്റ് പരീക്ഷാ വിവാദവുമായി ബന്ധപ്പെട്ട് ജീവൻ നഷ്ടമായ വിദ്യാർഥികളുടെ പേരുകൾ അദ്ദേഹം വേദിയിൽ വായിച്ചുകേൾപ്പിക്കുകയും അവർക്കു ആദരാഞ്ജലി അർപ്പിക്കുകയും ചെയ്തു. സമരവിജയം ജീവത്യാഗം ചെയ്ത വിദ്യാർഥികൾക്കാണ് സമർപ്പിക്കുന്നതെന്നും അദ്ദേഹം പറഞ്ഞു.
35 ദിവസം നീണ്ട പ്രതിഷേധങ്ങൾക്കും നിരന്തര സമ്മർദങ്ങൾക്കും ഒടുവിലാണ് ധർമേന്ദ്ര പ്രധാൻ രാജി സമർപ്പിച്ചത്. തുടക്കത്തിൽ മന്ത്രി രാജിവെക്കില്ലെന്നായിരുന്നു കേന്ദ്രസർക്കാരിന്റെ നിലപാട്. എന്നാൽ സമരക്കാർ ആവശ്യം ശക്തമായി ഉയർത്തിപ്പിടിച്ചതോടെ സർക്കാരിന് സമ്മർദം വർധിച്ചു.
Related Post
സാമൂഹിക പ്രവർത്തകനായ സോനം വാങ്ചുക്കിന്റെ നിരാഹാരസമരം പ്രക്ഷോഭത്തിന് പുതിയ ഊർജം പകർന്നതായി സമരനേതാക്കൾ വിലയിരുത്തുന്നു. തുടർന്ന് രാജ്യത്തിന്റെ വിവിധ ഭാഗങ്ങളിൽ നിന്ന് യുവജനങ്ങളും വിദ്യാർഥി സംഘടനകളും സമരത്തിന് പിന്തുണയുമായി രംഗത്തെത്തിയതോടെ പ്രതിഷേധം രാജ്യവ്യാപകമായി വ്യാപിച്ചു.
അതേസമയം, പാർലമെന്റിനകത്തും പുറത്തും പ്രതിപക്ഷം ധർമേന്ദ്ര പ്രധാന്റെ രാജി ആവശ്യപ്പെട്ട് പ്രതിഷേധം ശക്തമാക്കിയിരുന്നു. പ്രതിപക്ഷത്തിന്റെ സമ്മർദവും രാജ്യവ്യാപക പ്രതിഷേധവും ശക്തമായതോടെയാണ് കേന്ദ്രസർക്കാർ പ്രതിരോധത്തിലായത്.
