മെൽബൺ: ഇന്ത്യ–ഓസ്ട്രേലിയ തന്ത്രപരമായ പങ്കാളിത്തം കൂടുതൽ ശക്തിപ്പെടുത്തുന്ന സുപ്രധാന കരാറുകളിൽ ഇരു രാജ്യങ്ങളും ഒപ്പുവച്ചു. ത്രിരാഷ്ട്ര സന്ദർശനത്തിന്റെ ഭാഗമായി ഓസ്ട്രേലിയയിലെത്തിയ പ്രധാനമന്ത്രി നരേന്ദ്ര മോദിയും ഓസ്ട്രേലിയൻ പ്രധാനമന്ത്രി ആൻ്റണി ആൽബനീസും മെൽബണിൽ നടത്തിയ ഉഭയകക്ഷി ചർച്ചകൾക്കൊടുവിലായിരുന്നു പ്രഖ്യാപനം. ആണവോർജം, പ്രതിരോധം, ക്രിട്ടിക്കൽ ധാതുക്കൾ, സൈബർ സുരക്ഷ, സമുദ്ര സഹകരണം തുടങ്ങിയ മേഖലകളിലാണ് പുതിയ ധാരണകൾ.
ആണവോർജ മേഖലയിലെ സഹകരണത്തിന്റെ ഭാഗമായി ഇന്ത്യയുടെ സിവിലിയൻ ആണവ പദ്ധതികൾക്കും ശുദ്ധോർജ ലക്ഷ്യങ്ങൾക്കും ആവശ്യമായ യുറേനിയം വിതരണം കൂടുതൽ ശക്തിപ്പെടുത്തുമെന്ന് ഓസ്ട്രേലിയ അറിയിച്ചു. ഇന്ത്യയുടെ ഊർജസുരക്ഷയ്ക്കും ഭാവിയിലെ ക്ലീൻ എനർജി പദ്ധതികൾക്കും ഈ കരാർ വലിയ കരുത്താകുമെന്ന് പ്രധാനമന്ത്രി മോദി പറഞ്ഞു.
പ്രതിരോധ മേഖലയിലെ സഹകരണം വിപുലപ്പെടുത്താൻ ‘ഇന്ത്യ–ഓസ്ട്രേലിയ ഡിഫൻസ് ഇന്നൊവേഷൻ കോറിഡോർ’ സ്ഥാപിക്കാനും തീരുമാനമായി. പ്രതിരോധ സ്റ്റാർട്ടപ്പുകൾക്കും വ്യവസായ സ്ഥാപനങ്ങൾക്കും തമ്മിലുള്ള സഹകരണം വർധിപ്പിക്കുകയാണ് ലക്ഷ്യം. കപ്പൽ നിർമാണം, അറ്റകുറ്റപ്പണി, സമുദ്രസുരക്ഷ എന്നിവയിൽ സംയുക്ത പ്രവർത്തനത്തിനായി പുതിയ റോഡ്മാപ്പിനും ഇരുരാജ്യങ്ങളും രൂപം നൽകി.
Related Post
ക്രിട്ടിക്കൽ മിനറൽസ് മേഖലയിൽ പുതിയ സഹകരണ സംവിധാനം രൂപീകരിക്കുമെന്നും മോദി അറിയിച്ചു. സൈബർ സുരക്ഷ, നിർണായക സാങ്കേതികവിദ്യകൾ, വിതരണ ശൃംഖല എന്നിവയിലും സഹകരണം ശക്തമാക്കാൻ ധാരണയായി.
ആഗോള സംഘർഷങ്ങൾ യുദ്ധത്തിലൂടെയല്ല, ചർച്ചയിലൂടെയും നയതന്ത്രത്തിലൂടെയും മാത്രമേ പരിഹരിക്കാനാകൂവെന്ന് സംയുക്ത വാർത്താസമ്മേളനത്തിൽ പ്രധാനമന്ത്രി മോദി പറഞ്ഞു. ഭീകരവാദത്തിനെതിരായ പോരാട്ടത്തിൽ ഇന്ത്യയും ഓസ്ട്രേലിയയും ഒരുമിച്ച് പ്രവർത്തിക്കുമെന്നും അദ്ദേഹം വ്യക്തമാക്കി.
ഇന്തോനേഷ്യ സന്ദർശനത്തിന് ശേഷമാണ് പ്രധാനമന്ത്രി മോദി ഓസ്ട്രേലിയയിലെത്തിയത്. സന്ദർശനത്തിനിടെ ഇന്ത്യ–ഓസ്ട്രേലിയ സിഇഒ ഫോറത്തെയും അദ്ദേഹം അഭിസംബോധന ചെയ്തു. വ്യാപാരം, നിക്ഷേപം, വിദ്യാഭ്യാസം, സാങ്കേതികവിദ്യ, ജനങ്ങൾ തമ്മിലുള്ള ബന്ധം എന്നിവ കൂടുതൽ ശക്തിപ്പെടുത്തുന്നതിനുള്ള ചർച്ചകളും ഇരുരാജ്യങ്ങളും നടത്തി.
