ന്യൂഡൽഹി: തുടക്കം പാളിയെങ്കിലും ട്വന്റി-20 പരമ്പരയിലെ ആദ്യമത്സരത്തിൽ ഇന്ത്യയ്‌ക്കെതിരേ 157 റൺസ് വിജയലക്ഷ്യമുയർത്തി അഫ്ഗാനിസ്താൻ. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ അഫ്ഗാന് അസ്മത്തുള്ള ഒമർസായിയുടെയും മുഹമ്മദ് നബിയുടെയും ഇന്നിങ്‌സുകളാണ് താരതമ്യേന മികച്ച സ്കോർ സമ്മാനിച്ചത്. 44 പന്തുകളിൽ നിന്ന് നാല് സിക്‌സും നാല് ഫോറുമടക്കം 64 റൺസോടെ പുറത്താകാതെ നിന്ന അസ്മത്തുള്ള ഒമർസായിയാണ് അഫ്ഗാന്റെ ടോപ് സ്‌കോറർ.
അതേസമയം ഇന്നിങ്‌സിന്റെ രണ്ടാം പന്തിൽ തന്നെ ഓപ്പണർ റഹ്‌മാനുള്ള ഗുർബാസിനെ (0) പുറത്താക്കി ജസ്പ്രീത് ബുംറയാണ് വിക്കറ്റ് വേട്ടയ്ക്ക് തുടക്കമിട്ടത്. നാലാം ഓവറിൽ ക്യാപ്റ്റൻ ഇബ്രാഹിം സദ്രാൻ (11) റണ്ണൗട്ടായി. തുടർന്ന് അഞ്ചാം ഓവറിൽ സെദിക്കുള്ള അടലിനെ (13) അർഷ്ദീപും മടക്കി. ഗുൽബാദിൻ നയ്ബ് (2), ഡാർവിഷ് റസൂലി (2) എന്നിവരും പെട്ടെന്ന് പുറത്തായതോടെ അഫ്ഗാൻ അഞ്ചിന് 43 റൺസെന്ന നിലയിലേക്ക് വീണു.
എങ്കിലും പിന്നീട് ടീമിനെ മത്സരത്തിലേക്ക് തിരികെ കൊണ്ടുവന്നത് അസ്മത്തുള്ള ഒമർസായ് – മുഹമ്മദ് നബി കൂട്ടുകെട്ടായിരുന്നു. ശ്രദ്ധയോടെ തുടങ്ങിയ ഇരുവരും അടിച്ചുകളിക്കാൻ തുടങ്ങിയതോടെ ഇന്ത്യൻ ബൗളർമാർ പ്രതിരോധത്തിലായി. 56 പന്തിൽ നിന്ന് ഇരുവരും 83 റൺസ് ചേർത്തു. ഒടുവിൽ 17-ാം ഓവറിൽ ഒരു സ്ലോ ബോളിൽ മുഹമ്മദ് നബിയെ പുറത്താക്കി അർഷ്ദീപാണ് ഊ കൂട്ടുകെട്ട് പൊളിച്ചത്. 27 പന്തുകൾ നേരിട്ട നബി രണ്ടു വീതം സിക്‌സും ഫോറുമടക്കം 33 റൺസെടുത്തു.
പിന്നീട് അഫ്ഗാന് വീണ്ടും തുടരെ വിക്കറ്റുകൾ നഷ്ടമായി. റാഷിദ് ഖാനെ (1) അർഷ്ദീപ് പുറത്താക്കിയപ്പോൾ നൂർ അഹമ്മദിനെ (0) ക്യാപ്റ്റൻ ശ്രേയസ് അയ്യർ റണ്ണൗട്ടാക്കി. ഒടുവിൽ ശിവം ദുബെ എറിഞ്ഞ അവസാന ഓവറിൽ 21 റൺസ് അടിച്ചെടുത്ത ഒമർസായിയും വാലറ്റക്കാരൻ മുജീബുർ റഹ്‌മാനും ചേർന്നാണ് അഫ്ഗാൻ സ്കോർ 156ൽ എത്തിച്ചത്.
നാല് ഓവറിൽ 19 റൺസ് മാത്രം വഴങ്ങി മൂന്ന് വിക്കറ്റെടുത്ത അർഷ്ദീപ് സിങ്ങാണ് ഇന്ത്യയ്ക്കായി ബൗളിങ്ങിൽ തിളങ്ങിയത്. ബുംറയും അക്ഷർ പട്ടേലും വരുൺ ചക്രവർത്തിയും ഓരോ വിക്കറ്റ് വീതം വീഴ്ത്തി. സഞ്ജു സാംസൺ, അഭിഷേക് ശർമ, ഇഷാൻ കിഷൻ, ശ്രേയസ് അയ്യർ, തിലക് വർമ, നിതീഷ് കുമാർ റെഡ്ഡി, ശിവം ദുബെ, അക്ഷർ പട്ടേൽ, അർഷ്ദീപ് സിങ്, ജസ്പ്രീത് ബുംറ, വരുൺ ചക്രവർത്തി എന്നിവരാണ് ഇന്ത്യൻ ഇലവനിൽ.
