കല്പറ്റ: മന്ത്രിസ്ഥാനം വാഗ്ദാനം ചെയ്ത് കോൺഗ്രസ് നേതാക്കളിൽ നിന്ന് പണം തട്ടാൻ ശ്രമിച്ചെന്ന പരാതിയിൽ പോലീസ് കേസെടുത്തു. പ്രിയങ്ക ഗാന്ധിയുടെ പ്രൈവറ്റ് സെക്രട്ടറി ഡി.എസ്. രാജ്കുമാർ നൽകിയ പരാതിയുടെ അടിസ്ഥാനത്തിലാണ് വയനാട് സൈബർ പോലീസ് അന്വേഷണം ആരംഭിച്ചത്.
വയനാട് എം.പി.യുടെ ഓഫീസിൽ നിന്നാണെന്ന് പരിചയപ്പെടുത്തിയാണ് കോൺഗ്രസ് നേതാക്കളെ വിളിച്ചതെന്നാണ് പരാതി. എലത്തൂർ എം.എൽ.എ. വിദ്യാ ബാലകൃഷ്ണന് പുറമെ ഷാഫി പറമ്പിൽ എം.പി., ഡീൻ കുര്യാക്കോസ് എം.പി. എന്നിവർക്കും സമാനമായ ഫോൺകോളുകൾ ലഭിച്ചതായാണ് വിവരം.
ഡി.എസ്. രാജ്കുമാറാണെന്ന് പരിചയപ്പെടുത്തിയ ഒരാളാണ് മറ്റൊരു നമ്പറിൽ നിന്ന് വിദ്യാ ബാലകൃഷ്ണനെ വിളിച്ചത്. മന്ത്രിസഭാ പുനഃസംഘടന ഉടൻ ഉണ്ടാകുമെന്നും മൂന്ന് കോടി രൂപ നൽകിയാൽ മന്ത്രിസ്ഥാനമൊരുക്കാമെന്നുമായിരുന്നു വാഗ്ദാനം. വയനാട് എം.പി.യുടെ ഓഫീസിൽ നിന്നാണ് വിളിക്കുന്നതെന്നും അദ്ദേഹം അവകാശപ്പെട്ടു.
ജില്ലയിലെ ഒരു എം.പി.യാണ് ഫോൺ നമ്പർ നൽകിയതെന്നും ഇംഗ്ലീഷിലായിരുന്നു സംഭാഷണമെന്നും വിദ്യാ ബാലകൃഷ്ണൻ പറഞ്ഞു. സംഭാഷണം നീണ്ടതോടെ സംശയം തോന്നിയ അദ്ദേഹം പണം നൽകാമെന്ന് പറഞ്ഞ് ഫോൺ അവസാനിപ്പിക്കുകയായിരുന്നു.
തുടർന്ന് ഫോൺ നമ്പർ നൽകിയെന്നു പറഞ്ഞ എം.പി.യെ ബന്ധപ്പെട്ട് വിവരം അറിയിച്ചപ്പോഴാണ് സമാനമായ രീതിയിൽ എ.ഐ.സി.സി. ആസ്ഥാനത്തുനിന്നാണെന്ന് പറഞ്ഞ് ഒരാൾ അദ്ദേഹത്തെയും വിളിച്ചിരുന്നതായും ജില്ലയിലെ രണ്ട് കോൺഗ്രസ് നേതാക്കളുടെ ഫോൺ നമ്പറുകൾ ചോദിച്ചിരുന്നതായും വ്യക്തമായത്.
സംഭവത്തിൽ ഡി.എസ്. രാജ്കുമാർ നൽകിയ പരാതിയുടെ അടിസ്ഥാനത്തിൽ വയനാട് സൈബർ പോലീസ് കേസെടുത്തു. വിദ്യാ ബാലകൃഷ്ണൻ നൽകിയ പരാതിയിൽ കോഴിക്കോട് സൈബർ സെല്ലും അന്വേഷണം ആരംഭിച്ചിട്ടുണ്ട്. തട്ടിപ്പിന് പിന്നിലുള്ളവരെ കണ്ടെത്താൻ ഫോൺ നമ്പറുകളും മറ്റ് സാങ്കേതിക വിവരങ്ങളും കേന്ദ്രീകരിച്ച് അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
