കഠ്മണ്ഡു: നേപ്പാളിൽ ആയിരക്കണക്കിന് ആളുകളുടെ ജീവനെടുത്ത മിന്നൽ പ്രളയത്തിൽ വിവിധ രാജ്യങ്ങൾ സഹായഹസ്തവുമായി രംഗത്തെത്തുന്നതിനിടെ നഷ്ടപരിഹാരം ആവശ്യപ്പെട്ട് നേപ്പാൾ. ഹരിതഗൃഹ വാതകങ്ങളുടെ പുറന്തള്ളലിൽ മുന്നിൽനിൽക്കുന്ന രാജ്യങ്ങൾ നഷ്ടപരിഹാരം നൽകണമെന്നാണ് നേപ്പാളിന്റെ ആവശ്യം. അയൽരാജ്യങ്ങളായ ഇന്ത്യ, ചൈന എന്നിവയ്ക്കൊപ്പം അമേരിക്കയെയും നേപ്പാൾ പട്ടികയിൽ ഉൾപ്പെടുത്തിയിട്ടുണ്ട്.
ഐക്യരാഷ്ട്ര സംഘടനയുടെ പൊതുസഭയിൽ നേപ്പാൾ പ്രധാനമന്ത്രി നഷ്ടപരിഹാര ആവശ്യം ഉന്നയിക്കുമെന്നാണ് റിപ്പോർട്ടുകൾ. സാമ്പത്തിക സഹായം ആവശ്യപ്പെട്ട് യു.എന്നിനെ സമീപിക്കുമെന്ന് നേപ്പാൾ വിദേശകാര്യ മന്ത്രി ശിശിർ ഖനാൽ മാധ്യമങ്ങളോട് വ്യക്തമാക്കി. പ്രളയം വരുത്തിവച്ച നാശനഷ്ടങ്ങളിൽനിന്ന് കരകയറാൻ നേപ്പാളിന് കുറഞ്ഞത് അഞ്ച് ബില്യൺ ഡോളറെങ്കിലും വേണ്ടിവരുമെന്നാണ് റിപ്പോർട്ടുകൾ. സെപ്റ്റംബർ എട്ടിന് ആരംഭിക്കുന്ന യു.എൻ പൊതുസഭാ സമ്മേളനത്തിൽ നേപ്പാൾ പ്രധാനമന്ത്രി പങ്കെടുക്കും.
കഴിഞ്ഞ ബുധനാഴ്ച നേപ്പാൾ ചൈന അതിർത്തിക്കടുത്തുണ്ടായ മിന്നൽ പ്രളയത്തിൽ 1,127 പേർ മരിക്കുകയും 3,900 പേരെ കാണാതാവുകയും ചെയ്തിട്ടുണ്ട്. ‘ഹിമാലയൻ സൂനാമി’ എന്നാണ് നേപ്പാൾ മിന്നൽ പ്രളയത്തെ വിശേഷിപ്പിക്കുന്നത്. റസുവ, നുവാക്കോട്ട്, ധാഡിങ് ജില്ലകളെയാണ് പ്രളയം ഗുരുതരമായി ബാധിച്ചത്.
Related Post
അതിനിടെ, അതിർത്തി പ്രദേശത്തെ ചൈനയുടെ നിർമാണ പ്രവർത്തനങ്ങളാണ് ദുർബലമായ ഹിമാലയൻ മേഖലയിൽ പ്രകൃതിക്ക് നാശമുണ്ടാക്കുന്നതെന്ന ആരോപണവും ഉയരുന്നുണ്ട്.
