ന്യൂഡൽഹി: ഇന്ത്യയുടെ ചരിത്രത്തിലെ ഏറ്റവും യുവജന വിരോധിയായ പ്രധാനമന്ത്രിയാണ് നരേന്ദ്രമോദിയെന്ന് പ്രതിപക്ഷ നേതാവ് രാഹുൽ ഗാന്ധി ആരോപിച്ചു. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ രാജിവയ്ക്കണമെന്ന ആവശ്യം പോലും അംഗീകരിക്കാൻ പ്രധാനമന്ത്രി തയ്യാറാകാത്തത് അതുകൊണ്ടാണെന്നും അദ്ദേഹം വിമർശിച്ചു.
രാജ്യത്ത് നീറ്റ് ഉൾപ്പെടെ 152 ചോദ്യപേപ്പർ ചോർച്ചകൾ നടന്നിട്ടും കുറ്റക്കാർക്കെതിരെ കാര്യമായ നടപടിയുണ്ടായില്ലെന്ന് രാഹുൽ ഗാന്ധി ആരോപിച്ചു. പരീക്ഷകൾക്കായി കഠിനാധ്വാനം ചെയ്ത വിദ്യാർഥികളാണ് ഇതിന്റെ പേരിൽ ദുരിതമനുഭവിച്ചതെന്നും അദ്ദേഹം പറഞ്ഞു.
ന്യായമായ ചോദ്യങ്ങൾ ഉന്നയിച്ച വിദ്യാർഥികൾക്ക് മറുപടിയായി സർക്കാർ നൽകിയത് ലാത്തിച്ചാർജാണെന്നും രാഹുൽ ഗാന്ധി കുറ്റപ്പെടുത്തി. ഇന്ന് എസ്.ജെ.പി. (SJP) മാർച്ചിന് നേരെയുണ്ടായ ലാത്തിച്ചാർജിനെ പരാമർശിച്ചായിരുന്നു അദ്ദേഹത്തിന്റെ പ്രതികരണം.
Related Post
പരീക്ഷാ സംവിധാനത്തിലെ വീഴ്ചകൾക്കും ചോദ്യപേപ്പർ ചോർച്ചകൾക്കും ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി രാജിവയ്ക്കണമെന്നും യുവജനങ്ങളുടെ ആശങ്കകൾ സർക്കാർ ഗൗരവമായി പരിഗണിക്കണമെന്നും രാഹുൽ ഗാന്ധി ആവശ്യപ്പെട്ടു.
