കൊച്ചി: റിപ്പോർട്ടർ ടിവി മാനേജിങ് ഡയറക്ടർ ആന്റോ അഗസ്റ്റിനെതിരായ സർക്കാർ നടപടിയെ സ്വാഗതം ചെയ്ത് എസ്.എൻ.ഡി.പി. ജനറൽ സെക്രട്ടറി വെള്ളാപ്പള്ളി നടേശൻ. പത്രപ്രവർത്തനത്തിന് വലിയ പാരമ്പര്യമുള്ള കേരളത്തിൽ അടുത്തകാലത്തായി കോടീശ്വരന്മാരായ കുറ്റവാളികളും തട്ടിപ്പുകാരും പലിശക്കാരും മാധ്യമസ്ഥാപനങ്ങൾ സ്വന്തമാക്കി മാന്യന്മാരാകാൻ ശ്രമിക്കുന്നതിന്റെ ദുരന്തഫലങ്ങളാണ് ഇപ്പോൾ കാണുന്നതെന്ന് വെള്ളാപ്പള്ളി ‘യോഗനാദം’ വാരികയിലെ എഡിറ്റോറിയലിൽ വിമർശിച്ചു.
മാധ്യമങ്ങളുടെ മറവിൽ എന്തും ചെയ്യാമെന്നും ആരെയും ഭയക്കേണ്ടതില്ലെന്നുമുള്ള തെറ്റിദ്ധാരണയിലാണ് ഇത്തരം മാധ്യമ ഉടമകൾ പ്രവർത്തിക്കുന്നതെന്നും അദ്ദേഹം ആരോപിച്ചു. വയനാട്ടിലെ വിവാദ മരംമുറി കേസിൽ ആന്റോ അഗസ്റ്റിനും സഹോദരങ്ങളും ജയിൽശിക്ഷ അനുഭവിച്ചിട്ടുണ്ടെന്നും ഇവർക്കെതിരെ നിരവധി തട്ടിപ്പുകേസുകളുണ്ടെന്നും വെള്ളാപ്പള്ളി എഡിറ്റോറിയലിൽ ചൂണ്ടിക്കാട്ടി.
ഫുട്ബോൾ താരം ലയണൽ മെസ്സിയെ കേരളത്തിലെത്തിക്കാമെന്ന് പറഞ്ഞ് കോടികളുടെ സാമ്പത്തിക തട്ടിപ്പ് നടത്തിയെന്നും കൊച്ചിയിലെ ജവഹർലാൽ നെഹ്റു അന്താരാഷ്ട്ര സ്റ്റേഡിയം നവീകരിക്കാനെന്ന പേരിൽ കോടികൾ ചെലവഴിച്ച് സംസ്ഥാന കായിക വകുപ്പിനെയും അന്നത്തെ മന്ത്രിയെയും ദുരുപയോഗം ചെയ്ത് പൊതുജനങ്ങളെ കബളിപ്പിച്ചെന്നും വെള്ളാപ്പള്ളി ആരോപിച്ചു. അറിഞ്ഞോ അറിയാതെയോ മുൻ സർക്കാരും ഇതിന് കൂട്ടുനിന്നെന്നും അദ്ദേഹം ആരോപണമായി ഉന്നയിച്ചു.
ചാനൽ ഓഫീസിലെ റെയ്ഡിന്റെ പേരിൽ സംസ്ഥാനത്ത് മാധ്യമസ്വാതന്ത്ര്യം തകർന്നുവെന്ന വാദങ്ങളെയും വെള്ളാപ്പള്ളി ശക്തമായി വിമർശിച്ചു. മാഫിയകളും കുറ്റവാളികളും മാധ്യമസ്ഥാപനങ്ങൾ ആരംഭിക്കുന്നത് സമൂഹത്തെ ഉദ്ധരിക്കാനല്ലെന്നും അത്തരം ആളുകൾക്കെതിരെ പൊലീസ് നടപടി സ്വീകരിക്കുമ്പോൾ മാധ്യമസ്വാതന്ത്ര്യത്തിന്റെ പേരിൽ വിലപിക്കുന്നത് കുറ്റവാളികളെ വെള്ളപൂശുന്നതിന് തുല്യമാണെന്നും അദ്ദേഹം പറഞ്ഞു.
ചാനലുകളിൽ പണം നിക്ഷേപിച്ച് നിയന്ത്രണം പിടിച്ചെടുത്ത ശേഷം വ്യാജവാർത്തകൾ സൃഷ്ടിച്ച് എതിരാളികളെ ഒതുക്കാൻ ശ്രമിക്കുന്ന വമ്പൻ സ്രാവുകളിൽ കള്ളപ്പണക്കാരും പലിശക്കാരും ഉൾപ്പെടുന്നുണ്ടെന്നും വെള്ളാപ്പള്ളി ആരോപിച്ചു. മുൻ സർക്കാരിന്റെ കാലത്ത് ഇത്തരം മാധ്യമ മാഫിയകൾ ചില ഉദ്യോഗസ്ഥരുടെയും പൊലീസിന്റെയും ഒത്താശയോടെയാണ് പ്രവർത്തിച്ചതെന്നും അദ്ദേഹം കൂട്ടിച്ചേർത്തു.
ആന്റോ അഗസ്റ്റിനെതിരായ കേസിൽ യാതൊരു വിട്ടുവീഴ്ചയുമില്ലാതെ കാര്യക്ഷമമായ അന്വേഷണം നടത്തണമെന്നും ഇതിന് പിന്നിലുള്ള മറ്റ് ആളുകളെയും നിയമത്തിന് മുന്നിൽ കൊണ്ടുവരണമെന്നും വെള്ളാപ്പള്ളി സർക്കാരിനോട് ആവശ്യപ്പെട്ടു.
