ഇന്ത്യയുടെ ബഹിരാകാശ രംഗത്ത് ചരിത്രനേട്ടം കുറിച്ച് ഹൈദരാബാദ് ആസ്ഥാനമായുള്ള സ്വകാര്യ സ്റ്റാർട്ടപ്പ് സ്കൈറൂട്ട് എയ്റോസ്പേസ്. കമ്പനി തദ്ദേശീയമായി രൂപകൽപ്പന ചെയ്ത് വികസിപ്പിച്ച വിക്രം-1 ഓർബിറ്റൽ ക്ലാസ് റോക്കറ്റ് വിജയകരമായി വിക്ഷേപിച്ചതോടെ, ഭ്രമണപഥത്തിലെത്താൻ കഴിയുന്ന റോക്കറ്റ് നിർമ്മിച്ച് വിക്ഷേപിക്കുന്ന ഇന്ത്യയിലെ ആദ്യ സ്വകാര്യ കമ്പനിയെന്ന നേട്ടമാണ് സ്കൈറൂട്ടിന് സ്വന്തമായത്.
ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിലെ ആദ്യ വിക്ഷേപണ പാഡിൽ നിന്നാണ് ‘ആഗമൻ’ എന്ന പേരിട്ട ദൗത്യം വിജയകരമായി പൂർത്തിയാക്കിയത്. ഇതോടെ ഉപഗ്രഹ വിക്ഷേപണ രംഗത്ത് ഇന്ത്യയുടെ സ്വകാര്യ മേഖലയ്ക്ക് ആഗോളതലത്തിൽ പുതിയ അംഗീകാരം ലഭിച്ചിരിക്കുകയാണ്.
ഇന്ത്യൻ ബഹിരാകാശ പദ്ധതിയുടെ പിതാവായ ഡോ. വിക്രം സാരാഭായിയുടെ പേരിലാണ് വിക്രം-1 റോക്കറ്റിന് പേര് നൽകിയിരിക്കുന്നത്. ചെറിയ ഉപഗ്രഹങ്ങളെ ഭൂമിയുടെ താഴ്ന്ന ഭ്രമണപഥത്തിലേക്ക് ചെലവ് കുറഞ്ഞ രീതിയിൽ എത്തിക്കുകയെന്ന ലക്ഷ്യത്തോടെയാണ് ഈ റോക്കറ്റ് വികസിപ്പിച്ചത്. ഏകദേശം ഏഴ് നില കെട്ടിടത്തിന്റെ ഉയരമുള്ള വിക്രം-1 പൂർണമായും ആഭ്യന്തര സാങ്കേതികവിദ്യ ഉപയോഗിച്ചാണ് നിർമ്മിച്ചിരിക്കുന്നത്.
Related Post
കാർബൺ കോമ്പോസിറ്റ് ഘടന, ത്രിമാന (3D) പ്രിന്റഡ് റോക്കറ്റ് എൻജിനുകൾ, ഉയർന്ന കരുത്തുള്ള സോളിഡ് റോക്കറ്റ് മോട്ടോറുകൾ എന്നിവയാണ് ഇതിന്റെ പ്രധാന സവിശേഷതകൾ. പരമാവധി 350 കിലോഗ്രാം വരെ ഭാരമുള്ള ഉപഗ്രഹങ്ങളെ താഴ്ന്ന ഭ്രമണപഥത്തിലെത്തിക്കാൻ ഈ റോക്കറ്റിന് കഴിയും. സ്കൈറൂട്ടിന്റെ സ്വന്തം SCOPE പേലോഡിനൊപ്പം ഗ്രാഹ സ്പേസ്, കോസ്മോസർവ്, ഡിക്യൂബ്ഡ് എന്നീ കമ്പനികളുടെ സാങ്കേതിക പരീക്ഷണ പേലോഡുകളും ഈ ദൗത്യത്തിൽ ഉൾപ്പെടുത്തിയിരുന്നു.
2022-ൽ വിക്രം-എസ് സബ് ഓർബിറ്റൽ റോക്കറ്റിന്റെ വിജയകരമായ പരീക്ഷണത്തിന് ശേഷമാണ് കമ്പനി പൂർണ ഓർബിറ്റൽ ദൗത്യത്തിലേക്ക് കടന്നത്. ആ പരീക്ഷണവിജയത്തിന്റെ തുടർച്ചയായാണ് വിക്രം-1 യാഥാർഥ്യമായത്.
ഈ വിജയം ഒരു സ്വകാര്യ കമ്പനിയുടെ നേട്ടം മാത്രമല്ല, ഇന്ത്യയുടെ ബഹിരാകാശ നയത്തിന്റെ വിജയവുമാണ്. 2020-ലാണ് സ്വകാര്യ കമ്പനികൾക്ക് ബഹിരാകാശ മേഖലയിൽ പ്രവേശിക്കാൻ കേന്ദ്ര സർക്കാർ അനുമതി നൽകിയത്. വെറും ആറു വർഷത്തിനുള്ളിൽ തന്നെ സ്വകാര്യ മേഖലയ്ക്ക് ഓർബിറ്റൽ ക്ലാസ് റോക്കറ്റ് വികസിപ്പിച്ച് വിക്ഷേപിക്കാൻ കഴിഞ്ഞത് രാജ്യത്തിന്റെ സാങ്കേതിക ശേഷിയുടെ തെളിവായി വിലയിരുത്തപ്പെടുന്നു.
വിക്രം-1ന്റെ വരവോടെ ചെറിയ ഉപഗ്രഹങ്ങൾ വികസിപ്പിക്കുന്ന കമ്പനികൾക്ക് മാസങ്ങളോ വർഷങ്ങളോ വിക്ഷേപണത്തിനായി കാത്തിരിക്കേണ്ട സാഹചര്യം കുറയും. നിലവിൽ ഐ.എസ്.ആർ.ഒ. സർക്കാർ പദ്ധതികൾക്കും ദേശീയ സുരക്ഷാ ദൗത്യങ്ങൾക്കും മുൻഗണന നൽകുന്നതിനാൽ വാണിജ്യ ഉപഗ്രഹങ്ങൾക്ക് വിക്ഷേപണ അവസരങ്ങൾ പരിമിതമാണ്. സ്വകാര്യ വിക്ഷേപണ സേവനങ്ങൾ വ്യാപകമാകുന്നതോടെ ഈ മേഖലയ്ക്ക് വലിയ ഉണർവ് ലഭിക്കും.
അതേസമയം ഐ.എസ്.ആർ.ഒയ്ക്കും ഇത് വലിയ ആശ്വാസമാകും. വാണിജ്യ ഉപഗ്രഹ വിക്ഷേപണങ്ങളുടെ ഒരു ഭാഗം സ്വകാര്യ കമ്പനികൾ ഏറ്റെടുക്കുന്നതോടെ ഗഗൻയാൻ, ചന്ദ്ര-മംഗൾ ദൗത്യങ്ങൾ, ശാസ്ത്രീയ ഗവേഷണ പദ്ധതികൾ തുടങ്ങിയ നിർണായക ദൗത്യങ്ങളിൽ കൂടുതൽ ശ്രദ്ധ കേന്ദ്രീകരിക്കാൻ ഐ.എസ്.ആർ.ഒയ്ക്ക് സാധിക്കും.
ലോകത്ത് അതിവേഗം വളരുന്ന ഉപഗ്രഹ വിക്ഷേപണ വിപണിയിൽ ഇന്ത്യയുടെ പങ്കാളിത്തം വർധിപ്പിക്കാനും ഈ നേട്ടം വഴിയൊരുക്കും. ഐ.എസ്.ആർ.ഒയും സ്വകാര്യ കമ്പനികളും കൈകോർക്കുന്ന പുതിയ ബഹിരാകാശ യുഗത്തിലേക്കാണ് വിക്രം-1ന്റെ വിജയം രാജ്യത്തെ നയിക്കുന്നതെന്നാണ് വിദഗ്ധരുടെ വിലയിരുത്തൽ.
