മുംബൈ: പുണെയിലെ ഭോറിൽ പീഡിപ്പിക്കപ്പെട്ട 4 വയസുകാരിയെ കൊലപ്പെടുത്തിയതു ശ്വാസംമുട്ടിച്ചാണെന്നു പോസ്റ്റ്മോർട്ടത്തിൽ സ്ഥിരീകരണം. കുട്ടിയുടെ കരച്ചിൽ പുറത്തു കേൾക്കാതിരിക്കാൻ വായിൽ തുണി തിരുകിയ ശേഷമാണു പ്രതി കുട്ടിയെ പീഡിപ്പിച്ചത്. കുട്ടിയുടെ തലയിൽ കല്ലുകൊണ്ട് അടിച്ചതിന്റെ മാരകമായ പരുക്കുകളും നെഞ്ചിലും ശരീരത്തിന്റെ മറ്റു ഭാഗങ്ങളിലും മർദനമേറ്റ പാടുകളുമുണ്ട്.
മേയ് 1-നാണ് ഭോർ താലൂക്കിലെ നാസ്രാപൂരിൽ ബാലികയെ ക്രൂരമായി പീഡിപ്പിച്ച് കൊലപ്പെടുത്തിയതായി റിപ്പോർട്ട്. അമ്മൂമ്മയുടെ വീട്ടിൽ വിരുന്നിനെത്തിയ പെൺകുട്ടിയെ ഭക്ഷണം നൽകാമെന്നു പറഞ്ഞാണു പ്രതി കന്നുകാലി ഷെഡിലേക്കു കൊണ്ടുപോയി പീഡിപ്പിച്ചത്.
അതേസമയം അറസ്റ്റിലായ ദിവസവേതന തൊഴിലാളി ഭീംറാവു കാംബ്ലിക്കെതിരെ 1998ൽ പീഡനക്കേസും 2015ൽ പ്രായപൂർത്തിയാകാത്ത കുട്ടിയെ ഉപദ്രവിച്ചതിനു പോക്സോ കേസും റജിസ്റ്റർ ചെയ്തിരുന്നു. എന്നാൽ തെളിവുകളുടെ അഭാവത്തിൽ ഇയാളെ കോടതി വിട്ടയയ്ക്കുകയായിരുന്നു.
Related Post
കുറ്റവാളിക്കു വധശിക്ഷ ലഭിക്കുന്നതുവരെ സർക്കാർ വിശ്രമിക്കില്ലെന്നും പെൺകുട്ടിയുടെ കുടുംബത്തിനു നീതി ഉറപ്പാക്കുമെന്നും ഭോറിലെ ജനങ്ങളെ കണ്ട ഉപമുഖ്യമന്ത്രി ഏക്നാഥ് ഷിൻഡെ പറഞ്ഞു. കുറ്റക്കാരനെ തൂക്കിലേറ്റാതെ സർക്കാർ ശാന്തമാകില്ലെന്ന് അദ്ദേഹം വ്യക്തമാക്കി. ഗ്രാമം സന്ദർശിച്ച അദ്ദേഹം നാട്ടുകാരുമായി കൂടിക്കാഴ്ച നടത്തി അവരുടെ ആശങ്കകൾ കേട്ടു.
കേസിൽ പ്രതിക്കെതിരെ ശക്തമായ തെളിവുകൾ ശേഖരിച്ച് കുറ്റപത്രം സമർപ്പിക്കാൻ പോലീസിന് നിർദേശം നൽകിയതായി ഷിൻഡെ പറഞ്ഞു. 65-കാരനായ പ്രതിക്കെതിരെ മുൻപും സമാന കുറ്റകൃത്യങ്ങൾ ഉണ്ടായിരുന്നുവെന്ന് നാട്ടുകാർ ആരോപിച്ചു. മുഖ്യമന്ത്രി ദേവേന്ദ്ര ഫഡ്നാവിസ് കേസിൽ പ്രതിക്ക് മരണദണ്ഡം ഉറപ്പാക്കാൻ സർക്കാർ ശ്രമിക്കുമെന്നും വിചാരണ അതിവേഗത്തിൽ പൂർത്തിയാക്കുമെന്നും നേരത്തെ അറിയിച്ചിരുന്നു. രണ്ട് ആഴ്ചയ്ക്കകം കുറ്റപത്രം സമർപ്പിക്കാനും കേസിന് പരിചയസമ്പന്നനായ പബ്ലിക് പ്രോസിക്യൂട്ടറെ നിയമിക്കാനും സർക്കാർ നിർദേശം നൽകിയിട്ടുണ്ട്. ദിവസേന വിചാരണ നടത്താൻ കോടതിയോട് അഭ്യർത്ഥിക്കുമെന്നും അധികൃതർ വ്യക്തമാക്കി.
അതുപോലെ കേസിന്റെ അന്വേഷണം നടത്താൻ പ്രത്യേക അന്വേഷണസംഘം (SIT) രൂപീകരിച്ചിട്ടുണ്ടെന്നും, എസ്പിയും ഡിജിപിയുമടങ്ങുന്ന ഉന്നത ഉദ്യോഗസ്ഥർ അന്വേഷണം നിരീക്ഷിക്കുമെന്നും ഷിൻഡെ പറഞ്ഞു. പ്രതിക്ക് പ്രായമോ മാനസികാവസ്ഥയോ ചൂണ്ടിക്കാട്ടി ഇളവ് ലഭിക്കാതിരിക്കാൻ കടുത്ത നിയമവ്യവസ്ഥകൾ പ്രകാരം കേസ് രജിസ്റ്റർ ചെയ്യാൻ നിർദേശം നൽകിയിട്ടുണ്ട്.
ഇതിനിടെ, MNS നേതാവ് രാജ്താക്കറെ സംഭവത്തിൽ സർക്കാരിനെ വിമർശിച്ചു. ഇത്തരം കേസുകളിൽ ‘ഫാസ്റ്റ് ട്രാക്ക്’ നടപടി എന്നത് എന്താണെന്ന് വ്യക്തത വേണമെന്നും, സ്ത്രീകൾക്കും കുട്ടികൾക്കും നേരെയുള്ള കുറ്റകൃത്യങ്ങൾ വർധിക്കുന്നതിന്റെ കാരണങ്ങൾ ഗൗരവമായി പരിശോധിക്കണമെന്നും അദ്ദേഹം ആവശ്യപ്പെട്ടു.
പ്രതിഷേധക്കാർക്കെതിരെ പോലീസ് ലാത്തിച്ചാർജ് നടത്തിയെന്ന റിപ്പോർട്ടുകൾക്കും അദ്ദേഹം പ്രതികരിച്ചു. കുറ്റവാളികൾക്കെതിരെ കർശന നടപടി എടുക്കുന്നതിൽ സർക്കാർ മന്ദഗതിയാകുമ്പോൾ പ്രതിഷേധക്കാരെ നേരിടുന്നതിൽ മാത്രമാണ് വേഗം കാണിക്കുന്നതെന്ന് അദ്ദേഹം കുറ്റപ്പെടുത്തി. മഹാരാഷ്ട്ര പോലുള്ള സംസ്ഥാനത്ത് സ്ത്രീസുരക്ഷ ഉറപ്പാക്കാൻ സമഗ്രമായ നടപടികൾ ആവശ്യമാണ് എന്നും അദ്ദേഹം കൂട്ടിച്ചേർത്തു.
