കൊച്ചി: താരസംഘടനയായ ‘അമ്മ’യിലെ അംഗത്വത്തിൽ നിന്ന് രാജിവെച്ച് നടി മല്ലികാ സുകുമാരൻ. ഫേസ്ബുക്ക് പോസ്റ്റിലൂടെയാണ് അവർ രാജിക്കാര്യം അറിയിച്ചത്. കഴിഞ്ഞ ദിവസം ‘അമ്മ’യുടെ മുൻ അധ്യക്ഷ ശ്വേതാ മേനോൻ രാജിവെച്ചതിന് പിന്നാലെയാണ് മല്ലികാ സുകുമാരന്റെയും പടിയിറക്കം.
“‘സ്നേഹപൂർവം പടിയിറങ്ങുന്നു… ‘അമ്മ’യിൽ നിന്നും… സത്യത്തിനൊപ്പം… ന്യായത്തിനൊപ്പം… ശ്വേതയ്ക്കൊപ്പം'” എന്ന കുറിപ്പോടെയായിരുന്നു മല്ലികയുടെ ഫേസ്ബുക്ക് പോസ്റ്റ്. പോസ്റ്റ് പുറത്തുവന്നതിന് പിന്നാലെ നിരവധി പേരാണ് അവരുടെ തീരുമാനത്തെ പിന്തുണച്ച് പ്രതികരണങ്ങളുമായി രംഗത്തെത്തിയത്.
കഴിഞ്ഞ ദിവസം നടന്ന ‘അമ്മ’ ജനറൽ ബോഡി യോഗം കടുത്ത വാഗ്വാദങ്ങൾക്കും വിമർശനങ്ങൾക്കും വേദിയായിരുന്നു. യോഗത്തിനൊടുവിൽ ശ്വേതാ മേനോന്റെ നേതൃത്വത്തിലുള്ള ഭരണസമിതി ഒന്നടങ്കം രാജിവെക്കുകയും ചെയ്തു.
Related Post
തുടർന്ന് മാധ്യമങ്ങളോട് പ്രതികരിച്ച മല്ലികാ സുകുമാരൻ ശ്വേതാ മേനോന് പരസ്യ പിന്തുണ പ്രഖ്യാപിച്ചിരുന്നു. ശ്വേതയല്ല, സംഘടനയിലെ ജനറൽ സെക്രട്ടറിയും ട്രഷററുമാണ് രാജിവെക്കേണ്ടിയിരുന്നതെന്നാണ് മല്ലികയുടെ വിമർശനം.
“ശ്വേതയ്ക്കുപരി മറ്റുള്ളവരായിരുന്നു തെറ്റ് പറ്റിയെന്ന് സമ്മതിച്ച് ക്ഷമ ചോദിക്കുകയും രാജിവെക്കുകയും ചെയ്യേണ്ടിയിരുന്നത്. അതുണ്ടായില്ല. അതുകൊണ്ടാണ് ശ്വേത ആ തീരുമാനം എടുത്തത്. ഭരണസമിതിക്ക് ഒരുപാട് വീഴ്ചകൾ സംഭവിച്ചിട്ടുണ്ട്,” എന്നായിരുന്നു മല്ലികാ സുകുമാരന്റെ പ്രതികരണം.
മല്ലികാ സുകുമാരന്റെ രാജിയോടെ ‘അമ്മ’യിലെ പ്രതിസന്ധി കൂടുതൽ ചർച്ചയാകുകയാണ്. ജനറൽ ബോഡി യോഗത്തിന് പിന്നാലെ ഉയർന്ന ആരോപണങ്ങളും ഭരണസമിതിയുടെ കൂട്ടരാജിയും സംഘടനയ്ക്കുള്ളിലെ ഭിന്നതകൾ കൂടുതൽ തുറന്നുകാട്ടുന്നു.
