കാലിഫോർണിയ: ഫിഫ ലോകകപ്പ് ഗ്രൂപ്പ് ജിയിലെ ആവേശകരമായ പോരാട്ടത്തിൽ കരുത്തരായ ഇറാൻ, ന്യൂസിലൻഡിനെ 2-2ന് സമനിലയിൽ തളച്ചു. രണ്ടുതവണ ലീഡ് നേടിയ ന്യൂസിലൻഡിനെ പിന്തുടർന്ന് തിരിച്ചടിച്ച ഇറാൻ നിർണായക പോയിന്റ് സ്വന്തമാക്കി. ഈ ലോകകപ്പിലെ ഏറ്റവും ആവേശകരമായ മത്സരങ്ങളിലൊന്നായാണ് കളി വിലയിരുത്തപ്പെടുന്നത്.
ന്യൂസിലൻഡിനായി എലിജ ജസ്റ്റ് ഇരട്ടഗോൾ നേടിയപ്പോൾ, ഇറാന്റെ രക്ഷകരായി റാമിൻ റെസായൻ, മൊഹമ്മദ് മൊഹെബി എന്നിവർ വലകുലുക്കി.
രാഷ്ട്രീയ സംഘർഷങ്ങളും വിസ സംബന്ധമായ വിവാദങ്ങളും കാരണം മത്സരത്തിന് മുമ്പ് തന്നെ വാർത്തകളിൽ നിറഞ്ഞിരുന്ന ഇറാൻ ടീമിന് കനത്ത സുരക്ഷയിലാണ് കളത്തിലിറങ്ങേണ്ടി വന്നത്. ലോസ് ആഞ്ചലസിന് സമീപത്തെ സ്റ്റേഡിയത്തിൽ വലിയ ഇറാനിയൻ പ്രവാസി സാന്നിധ്യവും ശ്രദ്ധേയമായി.
Related Post
മത്സരം തുടങ്ങി ഏഴാം മിനിറ്റിൽ തന്നെ ന്യൂസിലൻഡ് മുന്നിലെത്തി. ക്യാപ്റ്റൻ ക്രിസ് വുഡ് നൽകിയ പാസിൽ നിന്ന് എലിജ ജസ്റ്റ് ലക്ഷ്യം കണ്ടു. ഗോൾ വഴങ്ങിയതോടെ ആക്രമണം ശക്തമാക്കിയ ഇറാൻ 32-ാം മിനിറ്റിൽ റാമിൻ റെസായന്റെ ഗോളിലൂടെ സമനില പിടിച്ചു.
രണ്ടാം പകുതിയുടെ 54-ാം മിനിറ്റിൽ ക്രിസ് വുഡ്–എലിജ ജസ്റ്റ് കൂട്ടുകെട്ട് വീണ്ടും ഫലം കണ്ടതോടെ ന്യൂസിലൻഡ് 2-1ന് മുന്നിലെത്തി. എന്നാൽ തോൽവി സമ്മതിക്കാതിരുന്ന ഇറാൻ 64-ാം മിനിറ്റിൽ വീണ്ടും തിരിച്ചടിച്ചു. റെസായന്റെ ക്രോസിൽ നിന്ന് മുഹമ്മദ് മൊഹെബി നേടിയ ഹെഡ്ഡറാണ് ഇറാന് സമനില സമ്മാനിച്ചത്.
അവസാന മിനിറ്റുകളിൽ ഇരുടീമുകളും വിജയഗോളിനായി ശ്രമിച്ചെങ്കിലും പ്രതിരോധനിരകൾ ഉറച്ചുനിന്നതോടെ മത്സരം 2-2ന് അവസാനിച്ചു. ലോക റാങ്കിങ്ങിൽ 20-ാം സ്ഥാനത്തുള്ള ഇറാനെതിരെ 85-ാം റാങ്കുകാരായ ന്യൂസിലൻഡ് നേടിയ സമനില ടൂർണമെന്റിലെ ശ്രദ്ധേയ ഫലങ്ങളിലൊന്നായാണ് വിലയിരുത്തപ്പെടുന്നത്.
