ചെന്നൈ: സംസ്ഥാനത്തെ പൊതുഗതാഗത രംഗത്ത് വലിയ മാറ്റങ്ങൾക്ക് തുടക്കമിട്ട് തമിഴ്നാട് സർക്കാർ. ഇനി മുതൽ വാങ്ങുന്ന പുതിയ സർക്കാർ ബസുകളിൽ എയർ കണ്ടീഷനിംഗ് (എസി) സൗകര്യം ഉൾപ്പെടുത്താനാണ് തീരുമാനമെന്ന് ഗതാഗത മന്ത്രി വിജയ് തമിഴൻ പാർത്ഥിപൻ അറിയിച്ചു. യാത്രക്കാർക്ക് കൂടുതൽ സൗകര്യപ്രദവും നിലവാരമുള്ളതുമായ യാത്രാനുഭവം ഉറപ്പാക്കുകയാണ് ലക്ഷ്യമെന്ന് അദ്ദേഹം പറഞ്ഞു.
സേലത്ത് നടന്ന ഭരണകക്ഷിയായ ടിവികെയുടെ ചടങ്ങിൽ സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്. സംസ്ഥാനത്തിന്റെ എല്ലാ ഭാഗങ്ങളെയും കാര്യക്ഷമമായ ബസ് ശൃംഖലയിലൂടെ ബന്ധിപ്പിക്കണമെന്നാണ് മുഖ്യമന്ത്രി വിജയ് നൽകിയ നിർദേശമെന്നും അദ്ദേഹം പറഞ്ഞു.
സാധാരണ ജനങ്ങൾക്കും മികച്ച യാത്രാസൗകര്യം ലഭിക്കണമെന്നതാണ് മുഖ്യമന്ത്രിയുടെ കാഴ്ചപ്പാടെന്ന് മന്ത്രി വിശദീകരിച്ചു. അടുത്തിടെ ഒരു സർക്കാർ ബസിൽ യാത്ര ചെയ്തപ്പോഴാണ് പുതിയതായി വാങ്ങുന്ന എല്ലാ ബസുകളിലും എസി സൗകര്യം വേണമെന്ന ആഗ്രഹം മുഖ്യമന്ത്രി പങ്കുവെച്ചതെന്നും അദ്ദേഹം കൂട്ടിച്ചേർത്തു.
Related Post
ഇതിനിടെ സംസ്ഥാനത്തുടനീളം സർവീസ് നടത്തുന്നതിനായി 300 പുതിയ ബസുകൾ മുഖ്യമന്ത്രി ഫ്ലാഗ് ഓഫ് ചെയ്തു. ചടങ്ങിനിടെ ബസ് ജീവനക്കാരുമായും യാത്രക്കാരുമായും അദ്ദേഹം ആശയവിനിമയം നടത്തി.
127.21 കോടി രൂപ ചെലവഴിച്ചാണ് പുതിയ ബസുകൾ വാങ്ങിയത്. ഇതിൽ 164 ഡീസൽ ബസുകളും 136 ബി.എസ്-VI നിലവാരമുള്ള സി.എൻ.ജി. ബസുകളും ഉൾപ്പെടുന്നു. കോയമ്പേട്, കിളമ്പാക്കം തുടങ്ങിയ പ്രധാന ഗതാഗത കേന്ദ്രങ്ങളിൽ നിന്ന് ഇവ സർവീസിനിറക്കി യാത്രക്കാരുടെ കാത്തിരിപ്പ് സമയം കുറയ്ക്കാനും വിവിധ പ്രദേശങ്ങളിലേക്കുള്ള ബന്ധം ശക്തിപ്പെടുത്താനുമാണ് സർക്കാർ ലക്ഷ്യമിടുന്നത്.
പൊതുഗതാഗത സംവിധാനത്തെ കൂടുതൽ ആധുനികവും യാത്രക്കാരുടെ സൗഹൃദപരവുമാക്കാനുള്ള സംസ്ഥാന സർക്കാരിന്റെ ദീർഘകാല പദ്ധതിയുടെ ഭാഗമായാണ് പുതിയ നടപടികളെന്ന് അധികൃതർ അറിയിച്ചു.
