ജെറൂസലേം: ഇറാനുമായുള്ള ഏതൊരു അന്തിമ ആണവകരാറും ആ രാജ്യത്തിന്റെ ആണവശേഷി പൂർണമായി ഇല്ലാതാക്കുന്നതായിരിക്കണമെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കി. അമേരിക്കൻ പ്രസിഡന്റ് ഡൊണാൾഡ് ട്രംപുമായുള്ള ടെലിഫോൺ സംഭാഷണത്തിനുശേഷമാണ് ഇസ്രായേൽ നിലപാട് കൂടുതൽ ശക്തമായി മുന്നോട്ടുവെച്ചത്.
ഇറാന്റെ യുറേനിയം സമ്പുഷ്ടീകരണ കേന്ദ്രങ്ങൾ പൂർണമായും പൊളിച്ചുനീക്കുകയും സമ്പുഷ്ടീകരിച്ച ആണവ വസ്തുക്കൾ രാജ്യത്തുനിന്ന് മാറ്റുകയും വേണമെന്നാണ് നെതന്യാഹുവിന്റെ ആവശ്യം. ആണവായുധ ശേഷിയിലേക്ക് ഇറാൻ നീങ്ങാൻ അനുവദിക്കില്ലെന്ന കാര്യത്തിൽ അമേരിക്കക്കും വ്യക്തമായ നിലപാടുണ്ടെന്ന് അദ്ദേഹം പറഞ്ഞു.
ഇറാൻ ഒരു കാരണവശാലും ആണവായുധം കൈവശപ്പെടുത്തരുതെന്നത് അമേരിക്കയുടെ പ്രധാന നയമാണെന്ന് ട്രംപും സംഭാഷണത്തിൽ ആവർത്തിച്ചതായി ഇസ്രായേൽ വൃത്തങ്ങൾ അറിയിച്ചു. പശ്ചിമേഷ്യയിലെ സുരക്ഷാ സാഹചര്യങ്ങളും മേഖലയിലെ വർധിച്ചുവരുന്ന സംഘർഷ സാധ്യതകളും ചർച്ചയിൽ പ്രധാന വിഷയങ്ങളായി.
Related Post
തന്ത്രപ്രധാനമായ ഹൊർമുസ് കടലിടുക്ക് വീണ്ടും തുറക്കുന്നതുമായി ബന്ധപ്പെട്ട നീക്കങ്ങളും ഇരുനേതാക്കളും ചർച്ച ചെയ്തു. ആഗോള എണ്ണക്കച്ചവടത്തിന് നിർണായകമായ കടൽപാതയായ ഹോർമുസ് കടലിടുക്കിലെ അനിശ്ചിതത്വം ലോക സാമ്പത്തികരംഗത്തെയും ബാധിക്കുന്ന സാഹചര്യത്തിലാണ് ചർച്ചകൾ പുരോഗമിക്കുന്നത്.
അതേസമയം, ലെബനൻ ഉൾപ്പെടെ വിവിധ മേഖലകളിൽ നിന്നുള്ള ഭീഷണികൾക്കെതിരെ പ്രതിരോധ നടപടികൾ സ്വീകരിക്കാനുള്ള ഇസ്രായേലിന്റെ അവകാശത്തെ അമേരിക്ക പിന്തുണച്ചതായും നെതന്യാഹു വ്യക്തമാക്കി. യുദ്ധഭൂമിയിലും നയതന്ത്ര തലത്തിലും അമേരിക്ക-ഇസ്രായേൽ ബന്ധം കൂടുതൽ ശക്തമായിക്കൊണ്ടിരിക്കുകയാണെന്നും അദ്ദേഹം പറഞ്ഞു.
ഇറാനുമായുള്ള അന്തിമ ആണവകരാറിനെ ചുറ്റിപ്പറ്റി നിർണായക ചർച്ചകൾ നടക്കാനിരിക്കെയാണ് പുതിയ നീക്കങ്ങൾ. ചർച്ചകൾ പുരോഗമിക്കുകയാണെന്നും കാര്യങ്ങൾ അനുകൂല ദിശയിലാണെന്നുമായിരുന്നു ട്രംപിന്റെ നേരത്തെ ഉണ്ടായ പ്രതികരണം. എന്നാൽ ഇറാനിൽനിന്നുള്ള ആണവ ഭീഷണി പൂർണമായും അവസാനിപ്പിക്കാതെ യാതൊരു ഒത്തുതീർപ്പിനും തയ്യാറാകില്ലെന്ന ഉറച്ച നിലപാടിലാണ് ഇസ്രായേൽ.
