ചെന്നൈ: തമിഴ്നാട്ടിൽ മുഖ്യമന്ത്രി സി. ജോസഫ് വിജയിന്റെ ലണ്ടൻ സന്ദർശനത്തിൽ വ്യവസായ മന്ത്രി എസ്. കീർത്തന പങ്കെടുക്കാതിരുന്നതുമായി ബന്ധപ്പെട്ട് രാഷ്ട്രീയ വിവാദം. ആരോഗ്യപരമായ കാരണങ്ങളാൽ നാല് ദിവസത്തേക്ക് മന്ത്രി വിട്ടുനിന്നെന്ന മന്ത്രി ആദവ് അർജുനയുടെ വിശദീകരണത്തെ ഡിഎംകെ നേതാവ് വൈഷ്ണവി ചോദ്യം ചെയ്തതാണ് വിവാദത്തിന് തുടക്കമായത്. നാല് ദിവസം എന്ന പരാമർശം സ്ത്രീകളുടെ സ്വാഭാവിക ശാരീരിക പ്രക്രിയയായ ആർത്തവവുമായി ബന്ധപ്പെട്ടതാണോ എന്നായിരുന്നു വൈഷ്ണവിയുടെ ചോദ്യം.
അജിത് കുമാറിന്റെ കാർ റേസിന് തുടക്കം കുറിക്കാനും തമിഴ്നാട്ടിലേക്ക് പുതിയ നിക്ഷേപങ്ങൾ ആകർഷിക്കാനുമായി വിജയ് അടുത്തിടെ ലണ്ടൻ സന്ദർശിച്ചിരുന്നു. സംസ്ഥാനത്തിന്റെ നിക്ഷേപ പ്രോത്സാഹനവുമായി ബന്ധപ്പെട്ട ചുമതലയുള്ള വ്യവസായ മന്ത്രി കീർത്തനയും സംഘത്തിൽ ഉണ്ടാകുമെന്നായിരുന്നു പ്രതീക്ഷ. എന്നാൽ അവർ യാത്രയിൽ പങ്കെടുത്തില്ല.
കീർത്തനയുടെ അഭാവത്തെക്കുറിച്ച് ആദവ് അർജുന നൽകിയ വിശദീകരണം ചൂണ്ടിക്കാട്ടിയാണ് വൈഷ്ണവി രംഗത്തെത്തിയത്. ആരോഗ്യപരമായ കാരണങ്ങളാൽ വ്യവസായ മന്ത്രി നാല് ദിവസത്തേക്ക് എത്തിയില്ലെന്നായിരുന്നു ആദവ് അർജുന പറഞ്ഞത്. “വ്യവസായ മന്ത്രി ആരോഗ്യപരമായ കാരണങ്ങളാൽ നാല് ദിവസത്തേക്ക് വന്നില്ലെന്നാണ് ആദവ് അർജുന പറയുന്നത്. ആ നാല് ദിവസത്തെക്കുറിച്ചുള്ള വിശദീകരണം എന്താണ്? അത് സ്ത്രീകൾക്ക് സ്വാഭാവികമായി ഉണ്ടാകുന്ന ആർത്തവം പോലുള്ള ശാരീരിക മാറ്റത്തെ സൂചിപ്പിക്കുന്നതാണെങ്കിൽ, അതിനെ ഒരു കാരണമായി പരസ്യമായി പറയേണ്ടത് എന്തിനാണ്?” വൈഷ്ണവി ചോദിച്ചു.
Related Post
സ്ത്രീകളുടെ ശാരീരിക പ്രത്യേകതകളെക്കുറിച്ചുള്ള അടിസ്ഥാന ധാരണ പോലും കായിക മേഖലയുടെ ചുമതലയുള്ള മന്ത്രിക്ക് ഇല്ലേയെന്നും അവർ ചോദിച്ചു. “ഇന്നത്തെ വനിതാ കായികതാരങ്ങൾ ആർത്തവത്തെ സ്വാഭാവികമായ ശാരീരിക പ്രക്രിയയായി കാണുകയും അതനുസരിച്ച് പരിശീലനവും മത്സരങ്ങളും ആസൂത്രണം ചെയ്യുകയും ചെയ്യുന്നു. സ്ത്രീകളുടെ ശാരീരികാവസ്ഥയെക്കുറിച്ചുള്ള ഈ അടിസ്ഥാന ധാരണ പോലും കായിക മേഖലയുമായി ബന്ധപ്പെട്ട ചുമതലയുള്ള മന്ത്രിക്കില്ലേയെന്നും” വൈഷ്ണവി ചോദിച്ചു.
അതേസമയം, കീർത്തനയുടെ അഭാവത്തിന്റെ യഥാർഥ കാരണം പൊതുജനങ്ങളെ അറിയിച്ചിട്ടുണ്ടോയെന്നും വൈഷ്ണവി ചോദിച്ചു. ഒരു മന്ത്രി ഒരു പരിപാടിയിൽ പങ്കെടുക്കാത്തതിന്റെ യഥാർഥ കാരണം വ്യക്തമായി പൊതുജനങ്ങളെ അറിയിക്കുന്നതാണ് സുതാര്യമായ സമീപനമെന്നും അവർ പറഞ്ഞു. വ്യവസായ മന്ത്രി ലണ്ടൻ യാത്രയിൽ പങ്കെടുക്കാതിരുന്നതിന്റെ യഥാർഥ കാരണം എന്താണെന്ന് ആദവ് അർജുന വ്യക്തമാക്കണമെന്നും വൈഷ്ണവി ആവശ്യപ്പെട്ടു.
വിവാദം ശക്തമായതോടെ കീർത്തനയ്ക്ക് പിന്തുണയുമായി ടിവികെ നേതാവ് കനിമൊഴി സന്തോഷ് രംഗത്തെത്തി. കീർത്തന കോളർബോൺ ശസ്ത്രക്രിയയ്ക്ക് ശേഷം വിശ്രമത്തിലായിരുന്നതിനാലാണ് ലണ്ടൻ യാത്രയിൽ പങ്കെടുക്കാതിരുന്നതെന്ന് അവർ പറഞ്ഞു.
“ഒരു സ്ത്രീ എന്ന നിലയിൽ, ഇത് ഞാൻ നേരിട്ട് കണ്ടതുകൊണ്ടാണ് പറയുന്നത്. കോളർബോൺ ശസ്ത്രക്രിയയ്ക്ക് ശേഷം കീർത്തനയെ കാമാക്ഷി ആശുപത്രിയിൽ ഞാൻ കണ്ടിരുന്നു. ഡോക്ടർമാർ ഏകദേശം 20 ദിവസത്തെ വിശ്രമം നിർദേശിച്ചിരുന്നു. എന്നാൽ സംസ്ഥാനത്തോടുള്ള പ്രതിബദ്ധത കാരണം നാല് ദിവസത്തിനകം തന്നെ അവർ ജോലിയിൽ തിരിച്ചെത്തി,” കനിമൊഴി സന്തോഷ് പറഞ്ഞു.
ആശുപത്രിയിൽ കഴിയുമ്പോഴും വിജയിന്റെ ലണ്ടൻ സന്ദർശനവുമായി ബന്ധപ്പെട്ട ഒരുക്കങ്ങളുടെ ഏകോപനം കീർത്തന നടത്തിയിരുന്നുവെന്നും സന്തോഷ് അവകാശപ്പെട്ടു. ആശുപത്രിക്കിടക്കയിൽ കഴിയുമ്പോഴും ഓരോ ദിവസവും അവർ ആദ്യം അന്വേഷിച്ചിരുന്നത് തന്റെ വേദനയെക്കുറിച്ചോ മരുന്നുകളെക്കുറിച്ചോ ആയിരുന്നില്ലെന്നും പകരം ലണ്ടൻ സന്ദർശനവുമായി ബന്ധപ്പെട്ട എല്ലാ കമ്പനികളുടെയും മറ്റ് ക്രമീകരണങ്ങളുടെയും പ്രവർത്തനങ്ങൾ സമയബന്ധിതമായി നടക്കുന്നുണ്ടോ എന്നായിരുന്നു എന്നും സന്തോഷ് പറഞ്ഞു.
“ഞാൻ അവരോട് വിശ്രമിക്കാൻ പറഞ്ഞു. പക്ഷേ അവർ അതിന് തയ്യാറായിരുന്നില്ല. ഓരോ കമ്പനിയുമായുള്ള കാര്യങ്ങളും എല്ലാ ക്രമീകരണങ്ങളും സമയത്ത് നടക്കുന്നുണ്ടോ എന്നതായിരുന്നു അവരുടെ പ്രധാന ആശങ്ക,” സന്തോഷ് പറഞ്ഞു.
കീർത്തനയ്ക്ക് അസുഖമാണെന്ന് ആദവ് അർജുന പറഞ്ഞതിനെ ചിലർ ആർത്തവവുമായി ബന്ധപ്പെടുത്തി വ്യാഖ്യാനിച്ചതിനെയും സന്തോഷ് വിമർശിച്ചു. മന്ത്രിക്ക് ഏതാനും ദിവസങ്ങളായി അസുഖമാണെന്ന് പറഞ്ഞപ്പോൾ അതിന്റെ യഥാർഥ കാരണം എന്താണെന്നോ അവർ എന്തുതരത്തിലുള്ള ആരോഗ്യപ്രശ്നത്തിലൂടെയാണ് കടന്നുപോയതെന്നോ അന്വേഷിക്കുന്നതിന് പകരം പ്രതിപക്ഷവുമായി ബന്ധപ്പെട്ടവർ നേരിട്ട് ആർത്തവത്തിലേക്ക് ചിന്തിച്ചുവെന്നാണ് സന്തോഷിന്റെ ആരോപണം.
ഒരു സ്ത്രീയുടെ അഭാവത്തിന് പിന്നിൽ ഒരേയൊരു കാരണമേ ഉണ്ടാകൂ എന്ന തരത്തിലുള്ള ചിന്താഗതിയാണ് ഇതിലൂടെ പ്രകടമാകുന്നതെന്നും അവർ പറഞ്ഞു. സ്ത്രീകളെ അവരുടെ ആർത്തവചക്രം കൊണ്ട് മാത്രം നിർവചിക്കാനാകില്ലെന്നും രോഗം, പരുക്ക്, കുടുംബ ചുമതലകൾ, ജോലി തുടങ്ങിയവ ഒരേസമയം കൈകാര്യം ചെയ്യുന്നവരാണ് സ്ത്രീകളെന്നും സന്തോഷ് ചൂണ്ടിക്കാട്ടി.
“ഒരു സ്ത്രീയുടെ ജോലിയെ വിമർശിക്കാൻ കഴിയാത്തപ്പോൾ അവരുടെ ശരീരത്തെ കേന്ദ്രീകരിച്ച് ആക്രമിക്കുക എന്നത് പഴയ രീതിയാണ്. സ്ത്രീകളുടെ വിശദീകരിക്കപ്പെടാത്ത ഓരോ അഭാവത്തെയും അവരുടെ ശരീരശാസ്ത്രവുമായി മാത്രം ബന്ധിപ്പിക്കുന്നത് പിന്തിരിപ്പൻ മനോഭാവമാണ്,” സന്തോഷ് പറഞ്ഞു.