കൊച്ചി: ബ്രസീൽ ഫുട്‌ബോളിലെയും ഇന്ത്യൻ ഫുട്‌ബോളിലെയും ഇതിഹാസ താരങ്ങൾ ഏറ്റുമുട്ടുന്ന ‘റിട്ടേൺ ഓഫ് ദ് ടൈറ്റൻസ്’ പ്രദർശന മത്സരത്തിനായി ബ്രസീലിയൻ താരങ്ങൾ കൊച്ചിയിലെത്തി. ബ്രസീലിയൻ ഫുട്‌ബോൾ ഇതിഹാസം റൊണാൾഡീഞ്ഞോ ഉൾപ്പെടുന്ന ആറംഗ സംഘമാണ് നെടുമ്പാശ്ശേരി വിമാനത്താവളത്തിലെത്തിയത്. സെപ്റ്റംബർ 23ന് വൈകിട്ട് 7.30ന് കലൂർ ജവഹർലാൽ നെഹ്‌റു സ്റ്റേഡിയത്തിലാണ് ബ്രസീൽ ലെജൻഡ്സും ഇന്ത്യൻ ഓൾ സ്റ്റാർസും തമ്മിലുള്ള മത്സരം.
ചൊവ്വാഴ്ച രാവിലെ 9.55ന് എമിറേറ്റ്സ് എയർലൈൻസ് വിമാനത്തിൽ ദുബായ് വഴിയാണ് റൊണാൾഡീഞ്ഞോയും സംഘവും കൊച്ചിയിലെത്തിയത്. എന്നാൽ സംഘത്തിലെ രണ്ടുപേർക്ക് യെല്ലോ ഫീവർ പ്രതിരോധ കുത്തിവെപ്പ് എടുത്തതിന്റെ സാധുവായ സർട്ടിഫിക്കറ്റ് കൈവശമുണ്ടായിരുന്നില്ല. ഇതോടെ വിമാനത്താവളത്തിലെ ആരോഗ്യ വിഭാഗം ഇവരെ ഉടൻ ടെർമിനലിന് പുറത്തേക്ക് പോകാൻ അനുവദിച്ചില്ല.
ഇതുമൂലം റൊണാൾഡീഞ്ഞോ ഉൾപ്പെടെയുള്ള സംഘത്തിന് ടെർമിനലിൽ നിന്ന് പുറത്തിറങ്ങാൻ വൈകി. രാവിലെ 11.05ഓടെയാണ് റൊണാൾഡീഞ്ഞോ വിമാനത്താവളത്തിന് പുറത്തേക്ക് എത്തിയത്.
യെല്ലോ ഫീവർ ബാധിത രാജ്യങ്ങളിലൂടെ യാത്ര ചെയ്യുന്നവർക്ക് സാധുവായ യെല്ലോ ഫീവർ വാക്സിനേഷൻ സർട്ടിഫിക്കറ്റ് നിർബന്ധമാണെന്നാണ് ആരോഗ്യ വിഭാഗത്തിന്റെ ചട്ടം. സാധുവായ സർട്ടിഫിക്കറ്റ് ഇല്ലാത്ത യാത്രക്കാർക്ക് ക്വാറന്റീൻ ഉൾപ്പെടെയുള്ള നടപടികൾ സ്വീകരിക്കാമെന്ന് കൊച്ചി എയർപോർട്ട് ഹെൽത്ത് ഓർഗനൈസേഷനും വ്യക്തമാക്കുന്നു.
പിന്നീട് വാക്സിനേഷൻ സർട്ടിഫിക്കറ്റിന്റെ ഡിജിറ്റൽ പകർപ്പ് ഓൺലൈനായി ഡൗൺലോഡ് ചെയ്ത് വിമാനത്താവളത്തിലെ ആരോഗ്യ വിഭാഗത്തിന് സമർപ്പിച്ചതോടെയാണ് സംഘാംഗങ്ങൾക്ക് പുറത്തിറങ്ങാൻ അനുമതി ലഭിച്ചത്.
