ചെന്നൈ: സഹോദരി രാധ ഉന്നയിച്ച 46 കോടി രൂപയുടെ ചെക്ക് തട്ടിപ്പ് ആരോപണം തള്ളി നടി അംബിക. തന്നെ വഞ്ചിച്ചത് സഹോദരി രാധയാണെന്നും 50 സെന്റ് ഭൂമിയും സ്വർണവുമടക്കം തട്ടിയെടുത്തതായും അംബിക ആരോപിച്ചു. തർക്കപരിഹാരത്തിന്റെ ഭാഗമായി രാധ തനിക്ക് ചെക്കുകൾ കൈമാറിയിരുന്നെന്നും ഇക്കാര്യം മറച്ചുവെച്ചാണ് തനിക്കെതിരെ വ്യാജ ആരോപണം ഉന്നയിക്കുന്നതെന്നും അംബിക പറഞ്ഞു.
അംബികയ്ക്കും സഹോദരൻ മല്ലികാർജുന കുഞ്ഞൻ നായർക്കുമെതിരെ 46 കോടി രൂപയുടെ ചെക്ക് തട്ടിപ്പ് ആരോപിച്ചാണ് രാധ ചെന്നൈ സിറ്റി പോലീസ് കമ്മിഷണർ ഓഫീസിൽ പരാതി നൽകിയത്. ഒപ്പിട്ട ബ്ലാങ്ക് ചെക്കുകൾ കൈവശപ്പെടുത്തി അക്കൗണ്ടിൽനിന്ന് 46 കോടി രൂപ പിൻവലിക്കാൻ ഇരുവരും ശ്രമിച്ചെന്നാണ് രാധയുടെ ആരോപണം.
‘എ.ആർ.എസ്. ഗാർഡൻ’ സ്റ്റുഡിയോയുടെ പേരിലുള്ള ചെക്കുകളാണ് ദുരുപയോഗം ചെയ്തതെന്നും രാധ പരാതിയിൽ പറയുന്നു. സ്റ്റുഡിയോയുടെ ദൈനംദിന ചെലവുകൾക്കായി ഒപ്പിട്ട് വീട്ടിൽ സൂക്ഷിച്ചിരുന്ന ബ്ലാങ്ക് ചെക്കുകളാണ് കൈവശപ്പെടുത്തിയതെന്നാണ് ആരോപണം.
2025 ജനുവരിയിൽ സ്റ്റുഡിയോയുടെ പേര് ‘ആർ.ആർ. ഗാർഡൻസ്’ എന്നാക്കി മാറ്റിയതിനെ തുടർന്ന് ബാങ്കിൽനിന്ന് പുതിയ ചെക്ക് ബുക്ക് ലഭിച്ചിരുന്നു. ഇതോടെ പഴയ ചെക്കുകൾ ഉപയോഗിക്കുന്നത് നിർത്തിയിരുന്നു. ഇതിനിടെയാണ് അഞ്ച് ചെക്കുകൾ അംബികയുടെ പേരിൽ ബാങ്കിൽ സമർപ്പിച്ചതായി അറിയുന്നതെന്നും രാധ പറയുന്നു. ബാങ്കിൽനിന്ന് എസ്.എം.എസ്. ലഭിച്ചതോടെ ഇടപാട് തടയാൻ നിർദേശം നൽകിയെന്നും പരാതിയിൽ വ്യക്തമാക്കുന്നു.
അംബികയുമായി തനിക്ക് യാതൊരു സാമ്പത്തിക ഇടപാടുകളും ഉണ്ടായിരുന്നില്ലെന്നും ചെക്കുകളിൽ തുക രേഖപ്പെടുത്തിയത് സഹോദരൻ മല്ലികാർജുനനാണെന്നും രാധ ആരോപിച്ചു. സംഭവത്തിൽ അന്വേഷണം നടത്തി ഇരുവർക്കുമെതിരെ ക്രിമിനൽ നടപടി സ്വീകരിക്കണമെന്നും പരാതിയിൽ ആവശ്യപ്പെട്ടിട്ടുണ്ട്.
അതേസമയം, ആരോപണങ്ങൾ അംബിക നിഷേധിച്ചു. രാധയാണ് തന്നെ വഞ്ചിച്ചതെന്നും 50 സെന്റ് ഭൂമിയും സ്വർണവുമടക്കം തട്ടിയെടുത്തെന്നും അംബിക ആരോപിച്ചു. തർക്കപരിഹാരത്തിനായി രാധ തന്നെയാണ് ചെക്കുകൾ കൈമാറിയതെന്നും ഈ വസ്തുത മറച്ചുവെച്ചാണ് ഇപ്പോൾ തനിക്കെതിരെ ആരോപണം ഉന്നയിക്കുന്നതെന്നും അംബിക പറഞ്ഞു. തന്റെ പരാതിയിൽ നേരത്തെ പൊലീസ് കേസെടുത്തിരുന്നുവെന്നും അംബിക വ്യക്തമാക്കി.
