ഗോയ: ഐച്ചി-നഗോയ ഏഷ്യൻ ഗെയിംസിന്റെ നാലാം ദിനത്തിൽ മീരാബായ് ചാനുവിന് ചരിത്ര നേട്ടം. ഭാരോദ്വഹനത്തിൽ വനിതകളുടെ 49 കിലോഗ്രാം വിഭാഗത്തിൽ വെള്ളി മെഡൽ നേടിയാണ് ചാനു ചരിത്രത്തിലേക്ക് ചുവടുവച്ചത്. ഏഷ്യൻ ഗെയിംസ് കരിയറിലെ മീരാബായ് ചാനുവിന്റെ ആദ്യ മെഡൽ നേട്ടമാണിത്. ഭാരോദ്വഹനത്തിൽ ഇന്ത്യയുടെ 28 വർഷത്തെ കാത്തിരിപ്പാണ് മീരാബായി ചാനു അവസാനിപ്പിച്ചത്. ഭാരോദ്വഹനത്തിൽ 1998 ഗെയിംസിനു ശേഷമുള്ള ഇന്ത്യയുടെ ആദ്യ മെഡലാണിത്.
അതേസമയം ഏഷ്യൻ ഗെയിംസ് സോഫ്റ്റ് ടെന്നീസിലും ഇന്ത്യ ചരിത്രത്തിലേക്ക് നടന്നുകയറുകയാണ്. ഈ വിഭാഗത്തിൽ ഇന്ത്യയുടെ ആദ്യ മെഡൽ ഉറപ്പാക്കി ജയ് മീനയാണ് ചരിത്രം കുറിച്ചത്. ആവേശകരമായ മത്സരത്തിൽ ഫിലിപ്പീൻസിന്റെ ഷെർവിൻ നുഗുയിറ്റിനെ പരാജയപ്പെടുത്തിയാണ് ജയ് മീന സെമിഫൈനലിൽ പ്രവേശിച്ചത്.
വെടിക്കെട്ട് പോരാട്ടത്തിൽ 4-3 (0-4, 4-2, 2-4, 5-3, 2-4, 7-5) എന്ന സ്‌കോറിനായിരുന്നു ജയ് മീനയുടെ വിജയം. സെമിഫൈനലിൽ എത്തിയതോടെ ഏഷ്യൻ ഗെയിംസ് സോഫ്റ്റ് ടെന്നീസിന്റെ ചരിത്രത്തിൽ ഇന്ത്യ നേടുന്ന ആദ്യ മെഡലായി ഇത് മാറി.
