ന്യൂഡൽഹി: റഷ്യയിൽ നിന്ന് വൻതോതിൽ ക്രൂഡ് ഓയിൽ വാങ്ങുന്ന രാജ്യങ്ങൾക്കെതിരെ 100 ശതമാനം വരെ തീരുവ ചുമത്താൻ അമേരിക്കൻ പ്രസിഡന്റിന് അധികാരം നൽകുന്ന ബിൽ യുഎസ് ജനപ്രതിനിധിസഭ പാസാക്കിയതോടെ ഇന്ത്യയും സമ്മർദത്തിൽ. ‘ലിൻഡ്സി ഒ. ഗ്രഹാം സാങ്ക്ഷനിംഗ് റഷ്യ ആൻഡ് ഇറാൻ ആക്ട് ഓഫ് 2026’ എന്ന ബിൽ സെപ്റ്റംബർ 16ന് 262-159 വോട്ടിനാണ് ജനപ്രതിനിധി സഭ പാസാക്കിയത്. ഓഗസ്റ്റിൽ സെനറ്റും 86-11 വോട്ടിന് ബിൽ അംഗീകരിച്ചിരുന്നു. ഇനി പ്രസിഡന്റ് ഡൊണാൾഡ് ട്രംപിന്റെ ഒപ്പിനായി ബിൽ പോകും.
എന്നാൽ ഇന്ത്യയ്ക്ക് നേരെ 100 ശതമാനം തീരുവ നിലവിൽ ഏർപ്പെടുത്തിയിട്ടില്ലെന്നതാണ് പ്രധാന കാര്യം. ബിൽ ട്രംപിന് പരമാവധി 100 ശതമാനം തീരുവ ചുമത്താനുള്ള അധികാരമാണ് നൽകുന്നത്. അത് എപ്പോൾ, ഏത് രാജ്യങ്ങൾക്കെതിരെ, എത്ര ശതമാനം എന്നതെല്ലാം പ്രസിഡന്റിന്റെ തീരുമാനത്തിന് വിധേയമായിരിക്കും.
റഷ്യയുടെ ഊർജമേഖലയും പ്രതിരോധമേഖലയും ലക്ഷ്യമിടുന്നതിനൊപ്പം ഉപരോധങ്ങൾ മറികടന്ന് റഷ്യൻ എണ്ണ കടത്തുന്ന ‘ഷാഡോ ഫ്ലീറ്റ്’ എന്നറിയപ്പെടുന്ന കപ്പൽ ശൃംഖലയെയും ബിൽ ലക്ഷ്യമിടുന്നുണ്ട്. റഷ്യയ്ക്ക് എണ്ണ, വാതക കയറ്റുമതിയിലൂടെ ലഭിക്കുന്ന വരുമാനം കുറയ്ക്കുകയാണ് നടപടിയുടെ പ്രധാന ലക്ഷ്യം. ഇന്ത്യയും ചൈനയും ഉൾപ്പെടെ റഷ്യൻ ഊർജത്തിന്റെ പ്രധാന ഉപഭോക്താക്കളെ സമ്മർദത്തിലാക്കാനും പുതിയ അധികാരം ഉപയോഗിക്കാനാകും.
Related Post
ഇന്ത്യയെ സംബന്ധിച്ച് ഭീഷണി ഗൗരവമുള്ളതാകുന്നത് റഷ്യൻ ക്രൂഡിനോടുള്ള രാജ്യത്തിന്റെ വർധിച്ച ആശ്രിതത്വം കാരണമാണ്. 2022ൽ ഇന്ത്യയുടെ ക്രൂഡ് ഇറക്കുമതിയിൽ റഷ്യൻ എണ്ണയുടെ പങ്ക് ഏകദേശം 15 ശതമാനമായിരുന്നെങ്കിൽ, 2025-26 സാമ്പത്തിക വർഷത്തിൽ ഇത് 30.3 ശതമാനമായി ഉയർന്നു. ഈ കാലയളവിൽ ഇന്ത്യ റഷ്യയിൽ നിന്ന് ഏകദേശം 40.8 ബില്യൺ ഡോളറിന്റെ ക്രൂഡ് ഇറക്കുമതി ചെയ്തതായി ഗ്ലോബൽ ട്രേഡ് റിസർച്ച് ഇനിഷ്യേറ്റീവ് (GTRI) കണക്കുകൾ പറയുന്നു.
2026ൽ മിഡിൽ ഈസ്റ്റിലെ സംഘർഷം മൂലം എണ്ണവിതരണത്തിൽ ഉണ്ടായ തടസ്സങ്ങൾ റഷ്യൻ ക്രൂഡിനോടുള്ള ഇന്ത്യയുടെ ആശ്രിതത്വം വീണ്ടും വർധിപ്പിച്ചു. ജൂണിൽ ഇന്ത്യയുടെ ക്രൂഡ് ഇറക്കുമതിയുടെ 48.6 ശതമാനം റഷ്യയിൽ നിന്നായിരുന്നു. ജൂലൈയിലെ കണക്ക് ഏകദേശം 52 ശതമാനമെന്നാണ് GTRIയുടെ കണക്ക്. ജൂലൈയിലെ കണക്ക് ലഭ്യമായ വ്യാപാര വിവരങ്ങളെ അടിസ്ഥാനമാക്കിയുള്ള ഒരു എസ്റ്റിമേറ്റാണെന്നും വിശദമായ രാജ്യ-ഉൽപ്പന്ന ഡാറ്റ പുറത്തുവരുമ്പോൾ ഇത് പരിഷ്കരിക്കപ്പെടാമെന്നും GTRI വ്യക്തമാക്കിയിട്ടുണ്ട്.
റഷ്യൻ എണ്ണയ്ക്ക് ഇന്ത്യയെ സംബന്ധിച്ച് വില മാത്രമല്ല പ്രാധാന്യം. മിഡിൽ ഈസ്റ്റിൽ നിന്നുള്ള വിതരണത്തിൽ തടസ്സങ്ങൾ ഉണ്ടാകുന്ന സാഹചര്യത്തിൽ സ്ഥിരമായ ക്രൂഡ് ലഭ്യത ഉറപ്പാക്കുന്നതിലും റഷ്യൻ വിതരണം നിർണായകമാണ്. അതുകൊണ്ടുതന്നെ പുതിയ യുഎസ് നിയമം ഇന്ത്യയുടെ എണ്ണവാങ്ങൽ നയത്തിലും വ്യാപാര ബന്ധങ്ങളിലും ഒരേസമയം സമ്മർദം സൃഷ്ടിക്കുന്ന സാഹചര്യമാണ് ഒരുക്കുന്നത്.
100 ശതമാനം തീരുവ ചുമത്തിയാൽ ഇന്ത്യയിൽ നിന്ന് അമേരിക്കയിലേക്ക് കയറ്റുമതി ചെയ്യുന്ന ഉൽപ്പന്നങ്ങളുടെ ചെലവ് ഗണ്യമായി ഉയരാൻ സാധ്യതയുണ്ട്. എന്നാൽ യഥാർഥ ആഘാതം കണക്കാക്കാൻ അമേരിക്ക ഏത് നിരക്കിലാണ് തീരുവ ചുമത്തുന്നത്, ഏതെല്ലാം ഉൽപ്പന്നങ്ങളെ ഉൾപ്പെടുത്തുന്നു, എപ്പോൾ പ്രാബല്യത്തിൽ വരുത്തുന്നു തുടങ്ങിയ കാര്യങ്ങൾ ആദ്യം വ്യക്തമാകേണ്ടതുണ്ട്. അതിനാൽ ഇപ്പോൾ ഇന്ത്യയുടെ അമേരിക്കൻ കയറ്റുമതിക്ക് 100 ശതമാനം തീരുവ നിലവിൽ വന്നുവെന്ന് പറയാനാകില്ല.
ഇന്ത്യ കഴിഞ്ഞ വർഷം റഷ്യൻ എണ്ണ വാങ്ങിയതിന്റെ പേരിൽ യുഎസ് ഏർപ്പെടുത്തിയ അധിക തീരുവകൾ നേരിട്ടപ്പോഴും റഷ്യൻ ക്രൂഡ് വാങ്ങൽ പൂർണമായി അവസാനിപ്പിച്ചിരുന്നില്ല. എന്നാൽ റഷ്യൻ എണ്ണക്കമ്പനികളായ ലുകോയിൽ, റോസ്നെഫ്റ്റ് എന്നിവയ്ക്കെതിരായ യുഎസ് ഉപരോധങ്ങൾ വന്നതോടെ ഇന്ത്യൻ റിഫൈനറികൾ റഷ്യൻ വാങ്ങലുകൾ കുറച്ചിരുന്നു. ഉപരോധങ്ങൾ എണ്ണയുടെ ഷിപ്പിങ്, ഇൻഷുറൻസ്, പണമിടപാട് തുടങ്ങിയ സംവിധാനങ്ങളെ നേരിട്ട് ബാധിക്കുന്നതിനാൽ വ്യാപാരത്തെ കൂടുതൽ ബുദ്ധിമുട്ടാക്കുന്നതാണ് ഇതിന് ഒരു കാരണം.
മിഡിൽ ഈസ്റ്റ് സംഘർഷം രൂക്ഷമായതോടെ ഇന്ത്യ വീണ്ടും റഷ്യൻ ക്രൂഡിലേക്ക് കൂടുതൽ തിരിഞ്ഞു. ജൂലൈയിൽ റഷ്യൻ എണ്ണയുടെ ഇന്ത്യയിലേക്കുള്ള വിതരണം റെക്കോർഡ് നിലയിലെത്തിയതായാണ് റിപ്പോർട്ടുകൾ. അതിനാൽ പുതിയ യുഎസ് തീരുവാ ഭീഷണി വന്നതോടെ ഇന്ത്യ ഉടൻ റഷ്യൻ എണ്ണ വാങ്ങൽ പൂർണമായി നിർത്തുമോ എന്ന കാര്യത്തിൽ ഇപ്പോൾ വ്യക്തമായ സൂചനയില്ല.
ഇന്ത്യൻ വിദേശകാര്യ മന്ത്രാലയവും വിഷയത്തിൽ ഊർജസുരക്ഷയ്ക്ക് പ്രാധാന്യം നൽകുന്ന നിലപാടാണ് വ്യക്തമാക്കിയിരിക്കുന്നത്. രാജ്യത്തിന്റെ സാമ്പത്തിക താൽപര്യങ്ങൾ സംരക്ഷിക്കുന്നതിന് ആവശ്യമായ നടപടികൾ സ്വീകരിക്കുമെന്നും 140 കോടി ജനങ്ങളുടെ ഊർജസുരക്ഷ ഉറപ്പാക്കാൻ ഇന്ത്യ പ്രതിജ്ഞാബദ്ധമാണെന്നും മന്ത്രാലയം വ്യക്തമാക്കി. വിപണിയിലെ സാഹചര്യങ്ങൾക്കനുസരിച്ച് വിവിധ രാജ്യങ്ങളിൽ നിന്ന് എണ്ണ വാങ്ങുന്ന രീതി തുടരുമെന്നും ഇന്ത്യ അറിയിച്ചു.
ഇന്ത്യയുടെ ക്രൂഡ് ഇറക്കുമതി റഷ്യയിൽ മാത്രം ആശ്രയിച്ചുള്ളതല്ല. നിരവധി രാജ്യങ്ങളിൽ നിന്നാണ് ഇന്ത്യ എണ്ണ വാങ്ങുന്നത്. എന്നാൽ നിലവിലെ മിഡിൽ ഈസ്റ്റ് സംഘർഷത്തിൽ പ്രധാന വിതരണ മാർഗങ്ങളിലുണ്ടായ തടസ്സങ്ങൾ കണക്കിലെടുക്കുമ്പോൾ റഷ്യൻ ക്രൂഡിന് പകരം വലിയ തോതിൽ പുതിയ വിതരണസ്രോതസ്സുകൾ കണ്ടെത്തുന്നത് ഉടൻ എളുപ്പമാകില്ലെന്നാണ് വിപണി വിശകലനങ്ങൾ സൂചിപ്പിക്കുന്നത്.
അതേസമയം, മിഡിൽ ഈസ്റ്റിലെ വിതരണ തടസ്സങ്ങൾ കുറയുകയും മറ്റ് രാജ്യങ്ങളിൽ നിന്നുള്ള എണ്ണയുടെ ലഭ്യത സാധാരണ നിലയിലാകുകയും ചെയ്താൽ റഷ്യൻ ക്രൂഡിനോടുള്ള ആശ്രിതത്വം കുറയ്ക്കാൻ ഇന്ത്യക്ക് കൂടുതൽ അവസരമുണ്ടാകും. ഇപ്പോഴത്തെ ഘട്ടത്തിൽ, റഷ്യൻ എണ്ണ വാങ്ങുന്നത് തുടരണോ കുറയ്ക്കണോ എന്ന തീരുമാനം ഇന്ത്യയ്ക്ക് എണ്ണവില, വിതരണം, റിഫൈനറികളുടെ പ്രവർത്തനം, ഷിപ്പിങ്-ഇൻഷുറൻസ് സൗകര്യം, അമേരിക്കൻ വ്യാപാരനടപടികളുടെ ആഘാതം എന്നിവ ഒരുമിച്ച് പരിഗണിച്ചായിരിക്കും എടുക്കേണ്ടത്.
അതിനാൽ ട്രംപ് ഇന്ത്യയ്ക്കെതിരെ 100 ശതമാനം തീരുവ ചുമത്താൻ തീരുമാനിച്ചിട്ടില്ല; എന്നാൽ അത്തരമൊരു നടപടി സ്വീകരിക്കാനുള്ള അധികാരത്തിലേക്കാണ് പുതിയ യുഎസ് നിയമം വഴി വഴി തുറന്നിരിക്കുന്നത്. ഇനി ട്രംപിന്റെ തീരുമാനം, തീരുവയുടെ പരിധി, നടപ്പാക്കുന്ന രീതി എന്നിവയാണ് ഇന്ത്യയുടെ കയറ്റുമതിയിലും റഷ്യൻ ക്രൂഡ് വാങ്ങൽ നയത്തിലും നിർണായകമാകുക.