പൂനെ: ലോഹഗഡ് കോട്ടയിൽ തള്ളിയിട്ട് യുവ വ്യവസായി കേതൻ അഗർവാളിനെ (26) കൊലപ്പെടുത്തിയ കേസിൽ പ്രതികളായ സിയ ഗോയൽ (20)യും കാമുകൻ ചേതൻ ചൗധരി (22)യും കൊലപാതകത്തിനു മുമ്പ് റിഹേഴ്സൽ നടത്തിയതായി പോലീസ് കണ്ടെത്തൽ. പൂനെയിലെ ലുള്ളാനഗർ പ്രദേശത്തെ ഒരു കുന്നിൻമുകളിൽ നിന്നാണ് ഇരുവരും കേതനെ എങ്ങനെ തള്ളിയിടാമെന്ന് പരിശീലനം നടത്തിയതെന്നാണ് അന്വേഷണത്തിൽ വ്യക്തമായത്.
പ്രതികൾ റിഹേഴ്സൽ നടത്തിയ സ്ഥലം സിയയുടെ വീടായ ‘ലീല കുഞ്ച്’ (മാർക്കറ്റ് യാർഡ് പ്രദേശം) നിന്ന് ഏറെ ദൂരെയല്ലെന്ന് പോലീസ് വ്യക്തമാക്കി. കേസുമായി ബന്ധപ്പെട്ട് സിയയെ വീട്ടിലേക്ക് കൊണ്ടുപോയ പോലീസ്, സംഭവദിവസം ധരിച്ചിരുന്ന വസ്ത്രങ്ങൾ പിടിച്ചെടുത്തിരുന്നു. തുടർന്ന്, റിഹേഴ്സൽ നടത്തിയ കുന്നിൻമുകളിലേക്കും സിയയെ തെളിവെടുപ്പിനായി കൊണ്ടുപോയി.
ലുള്ളാനഗർ സെക്ടർ-37-ൽ വെച്ചാണ് കൊലപാതക ഗൂഢാലോചന തയ്യാറാക്കിയതെന്ന് അന്വേഷണ സംഘം കണ്ടെത്തി. കേതനെ ലോഹഗഡ് കോട്ടയിൽ നിന്ന് എങ്ങനെ തള്ളിയിടാമെന്ന് ഇരുവരും ലുള്ളാനഗറിലെ ഒരു ക്ലബ്ബിനടുത്തുള്ള തുറസായ സ്ഥലത്ത് പരിശീലനം നടത്തിയിരുന്നു. സിയയെ ഇന്നലെ ആ സ്ഥലത്ത് എത്തിച്ച് അവൾ തന്നെയാണ് റിഹേഴ്സൽ നടന്ന സ്ഥലം തിരിച്ചറിഞ്ഞത്, എന്ന് പൂനെ റൂറൽ പോലീസ് ഉദ്യോഗസ്ഥൻ വ്യക്തമാക്കി.
ഞായറാഴ്ച സിയയെ കൂട്ടി പോലീസ് സംഭവം പുനരാവിഷ്കരിച്ചു. ഒരു ഡമ്മിയെ കുന്നിൽ നിന്ന് തള്ളിയിടുകയും ചെയ്തു. മൂന്ന് ദിവസങ്ങൾക്ക് ശേഷം ചേതനെയും സ്ഥലത്തെത്തിച്ച് സമാനമായ രീതിയിൽ സംഭവക്രമം പുനർനിർമ്മിച്ചു. അതേസമയം കേസിൽ കൂടുതൽ തെളിവുകൾ കണ്ടെത്തുന്നതിനായി പ്രതികളിൽ പോളിഗ്രാഫ് (ലൈ ഡിറ്റക്ടർ) പരിശോധന നടത്താൻ പോലീസ് കോടതിയെ സമീപിച്ചിട്ടുണ്ട്. പരിശോധനാഫലങ്ങൾ അടിസ്ഥാനമാക്കി പ്രതികളുടെ മൊഴികൾ പരിശോധിക്കുകയും തമ്മിൽ താരതമ്യം ചെയ്യുകയും ചെയ്യാനാണ് തീരുമാനം.
ഇതിനുമുമ്പ് നടത്തിയ അന്വേഷണത്തിൽ, കേതനെ കൊലപ്പെടുത്താനുള്ള മാർഗങ്ങൾ ഗൂഗിളിൽ തിരഞ്ഞതായി കണ്ടെത്തിയിരുന്നു. കൊലപാതകം നടത്തുന്നതിന് മുമ്പ് ഇരുവരും കോട്ടയിൽ ഒറ്റയ്ക്ക് പോയി പരിശീലനം നടത്തിയതായും, പിടിക്കപ്പെട്ടാൽ എന്ത് മറുപടി നൽകണമെന്നതുവരെ തയ്യാറാക്കിയതായും പോലീസ് പറയുന്നു. സംശയം ഒഴിവാക്കാൻ വേഷം മാറാനും ഇരുവരും പദ്ധതിയിട്ടിരുന്നു.
ഇലക്ട്രോണിക് തെളിവുകൾ ഒഴിവാക്കാൻ ചേതൻ ടോൾപ്ലാസകളിലൂടെ പോകാതിരിക്കാൻ സ്കൂട്ടർ ഉപയോഗിച്ചാണ് ലോഹഗഡ് കോട്ടയിലെത്തിയത്. സംഭവത്തിന് ശേഷം അതേ സ്കൂട്ടറിൽ തന്നെ പൂനെയിലേക്ക് മടങ്ങുകയും ചെയ്തു. പോലീസ് പിന്നീട് ഈ വാഹനം പിടിച്ചെടുത്തു.
സംഭവസമയത്ത് മുഖം മറയ്ക്കാൻ ചേതൻ ഹൂഡി ധരിച്ചിരുന്നു. എന്നാൽ 33 ഡിഗ്രി ചൂടിൽ ഹൂഡി ധരിച്ചത് തന്നെ അന്വേഷണത്തിൽ സംശയം ഉയർത്തിയ പ്രധാന സൂചനയായി മാറി. മേയ് മാസാവസാനത്തോടെ തന്നെ കൊലപാതക പദ്ധതി അന്തിമമാക്കിയിരുന്നുവെന്നും പോലീസ് കണ്ടെത്തി. ജൂൺ 18-നാണ് ലോഹഗഡ് കോട്ടയിലെ കുന്നിൻമുകളിൽ നിന്ന് കേതൻ അഗർവാളിനെ തള്ളിയിട്ട് കൊലപ്പെടുത്തിയത്. കേസിൽ ഇരുവരും ജൂലൈ 3 വരെ പോലീസ് കസ്റ്റഡിയിൽ തുടരുകയാണ്.
