തിരുവനന്തപുരം: മുഖ്യമന്ത്രി പിണറായി വിജയന്‍ നിയമസഭയില്‍ നവീന്‍ ബാബുവിൻ്റെ മരണവുമായി ബന്ധപ്പെട്ടു നല്‍കിയ മറുപടിയില്‍ കടുത്ത അതൃപ്തി പ്രകടിപ്പിച്ച് നവീന്‍ ബാബുവിൻ്റെ കുടുംബം. പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തരുതെന്നു ബന്ധുക്കള്‍ പൊലീസിനോട് ആവശ്യപ്പെട്ടിരുന്നില്ല എന്നാണു മുഖ്യമന്ത്രി നല്‍കിയിരിക്കുന്ന മറുപടി. തിടുക്കപ്പെട്ട് ഇന്‍ക്വസ്റ്റ് നടത്തിയിട്ടില്ലെന്നും എല്ലാ നടപടിക്രമങ്ങളും പാലിച്ചിട്ടുണ്ടെന്നും മുഖ്യമന്ത്രിയുടെ മറുപടിയില്‍ പറയുന്നു.
അതേസമയം, പരിയാരം മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തരുതെന്ന് എസിപിയെയും ജില്ലാ കലക്ടറെയും നേരിട്ടു വിളിച്ച് ആവശ്യപ്പെട്ടിരുന്നുവെന്നു നവീൻ ബാബുവിന്റെ അടുത്ത ബന്ധുക്കള്‍ പറഞ്ഞതായി മനോരമ റിപ്പോർട്ട് ചെയ്തു. എസിപി പറഞ്ഞത് അനുസരിച്ചാണ് കലക്ടറുമായി ബന്ധപ്പെട്ടത്. ആദ്യം കലക്ടര്‍ ഫോണ്‍ എടുത്തില്ല. പിന്നെ ഒപ്പമുള്ളയാളെ വിളിച്ച് കലക്ടറെ വിവരം അറിയിച്ചശേഷമാണു ഫോണില്‍ സംസാരിച്ചത്. ആരോപണവിധേയയുടെ ഭര്‍ത്താവും പ്രശാന്തനും പരിയാരം മെഡിക്കല്‍ കോളജില്‍ ജോലി ചെയ്യുന്നുണ്ടെന്ന് അറിഞ്ഞുവെന്നും അതുകൊണ്ട് പരിയാരത്ത് പോസ്റ്റ്‌മോര്‍ട്ടം നടത്തരുതെന്നുമാണു കലക്ടറോടു പറഞ്ഞത്. നിങ്ങള്‍ പേടിക്കേണ്ട എന്നായിരുന്നു കലക്ടറുടെ മറുപടി. ഒരു കാരണവശാലും പരിയാരം മെഡിക്കല്‍ കോളജില്‍ പോസ്റ്റുമോര്‍ട്ടം നടത്തില്ല എന്നു കലക്ടര്‍ ഉറപ്പിച്ചു പറഞ്ഞിരുന്നു. ഇക്കാര്യത്തില്‍ കലക്ടര്‍ നല്‍കിയ ഉറപ്പു മുഖവിലയ്‌ക്കെടുക്കുകയായിരുന്നു. അപ്പോഴത്തെ മാനസികാവസ്ഥയില്‍ കോളുകള്‍ റെക്കോര്‍ഡ് ചെയ്തിരുന്നില്ല. ഇപ്പോഴാണെങ്കില്‍ റെക്കോര്‍ഡ് ചെയ്യുമായിരുന്നു.
കേസില്‍ പ്രശാന്തനെ പ്രതിയാക്കണമെന്ന കുടുംബത്തിന്റെ പരാതി ഇതുവരെ പൊലീസ് പരിഗണിച്ചിട്ടില്ല. ആ പരാതിയുടെ പേരില്‍ മാത്രം പൊലീസിന് പ്രശാന്തനെ പ്രതിയാക്കാവുന്നതാണെന്നും നവീന്റെ കുടുംബം പറഞ്ഞു. അറസ്റ്റ് ചെയ്യുമോ ഇല്ലയോ എന്നതു രണ്ടാമത്തെ കാര്യമാണ്. പ്രതിയാക്കി അന്വേഷണം നടത്താവുന്നതായിരുന്നു. അന്വേഷണം നടത്തിയാല്‍ കോള്‍ ഹിസ്റ്ററി ഉള്‍പ്പെടെ പരിശോധിക്കേണ്ടിവരും. പ്രശാന്തന്‍ ആരെയൊക്കെ ബന്ധപ്പെട്ടിരുന്നുവെന്നു നോക്കേണ്ടിവരും. അതുകൊണ്ടാണ് ആ നടപടിയിലേക്കു പോകാത്തത്. ഇക്കാര്യം കോടതിയിലും പറഞ്ഞിട്ടുണ്ടെന്നു നവീന്റെ ബന്ധുക്കള്‍ പറഞ്ഞു.
Related Post
നവീന്‍ ബാബുവിന്റെ അടിവസ്ത്രത്തില്‍ രക്തക്കറ ഉണ്ടായിരുന്നതായി ഇന്‍ക്വസ്റ്റ് റിപ്പോര്‍ട്ടില്‍ പരാമര്‍ശിച്ചിട്ടുണ്ടോ എന്നും ഇതു സംബന്ധിച്ച നിഗമനങ്ങള്‍ പോസ്റ്റ്‌മോര്‍ട്ടം റിപ്പോര്‍ട്ടില്‍ ഉള്‍പ്പെടുത്താതിന്റെ കാരണം പരിശോധിച്ചിട്ടുണ്ടോ എന്നുമുള്ള ചോദ്യത്തിന് വിശദമായ അന്വേഷണം നടത്തി വരികയാണെന്നാണു മുഖ്യമന്ത്രി മറുപടി നല്‍കിയിരിക്കുന്നത്.
നവീന്‍ ബാബുവിന്റെ മരണത്തില്‍ സിബിഐ അന്വേഷണം വേണ്ടെന്ന ഹൈക്കോടതി സിംഗിള്‍ ബെഞ്ച് വിധിക്കെതിരെ നവീന്‍ ബാബുവിന്റെ ഭാര്യ കെ.മഞ്ജുഷ ഡിവിഷന്‍ ബെഞ്ചില്‍ അപ്പീല്‍ നല്‍കിയിരിക്കുകയാണ്. വസ്തുതകള്‍ പരിഗണിക്കാതെയാണു സിംഗിള്‍ ബെഞ്ച് വിധിയെന്നാണ് അപ്പീലിലെ പ്രധാന വാദം. സിംഗിള്‍ ബെഞ്ചിന്റെ വിധിയില്‍ പിഴവുകളുണ്ട്. ഭരണകക്ഷി നേതാവും മുന്‍ ജില്ലാ പഞ്ചായത്ത് പ്രസിഡന്റുമായ ആളാണ് പ്രതിസ്ഥാനത്ത്. സംസ്ഥാന പൊലീസ് നടത്തുന്ന അന്വേഷണത്തില്‍ വിശ്വാസ്യതയില്ലെന്നും അപ്പീലില്‍ ആരോപിക്കുന്നു.
Naveen Babu Death: Family alleges flawed police investigation and disputes the Chief Minister’s statement regarding his death. Naveen Babu Death ADM Naveen Babu Death Police Pinarayi Vijayan Kerala News
