ന്യൂഡൽഹി: ഡൽഹി പ്രീമിയർ ലീഗിൽ വീണ്ടും വൈറലായ തന്റെ ‘നോട്ട്ബുക്ക് സെലിബ്രേഷൻ’ പുറത്തെടുത്ത് ലഖ്‌നൗ സൂപ്പർ ജയന്റ്സ് താരം ദിഗ്‌വേഷ് റാത്തി. പഞ്ചാബ് കിങ്സിന്റെ പ്രിയാൻഷ് ആര്യയെ പുറത്താക്കിയതിന് പിന്നാലെയാണ് റാത്തി തന്റെ പതിവ് ആഘോഷവുമായി എത്തിയത്. ഔട്ടർ ഡൽഹി വാരിയേഴ്സും പുരാനി ഡൽഹി 6ഉം തമ്മിലുള്ള മത്സരത്തിലായിരുന്നു സംഭവം.
10-ാം ഓവറിലെ ആദ്യ പന്തിലായിരുന്നു പ്രിയാൻഷ് ആര്യയുടെ വിക്കറ്റ് നഷ്ടമായത്. ഓഫ് സ്റ്റംപിന് പുറത്തേക്ക് ബാക്ക് ഓഫ് എ ലെങ്തിൽ റാത്തി എറിഞ്ഞ പന്ത് നേരെ ഗ്രൗണ്ടിന് മുകളിലൂടെ അടിച്ചകറ്റാനായിരുന്നു ആര്യയുടെ ശ്രമം. എന്നാൽ കൃത്യമായി കണക്ട് ചെയ്യാൻ സാധിക്കാതെ വന്നതോടെ പന്ത് ലോങ് ഓണിൽ ക്യാച്ചായി.
റോഹൻ റാത്തി ക്യാച്ചെടുത്തതോടെ ദിഗ്‌വേഷ് റാത്തി നേരെ പ്രിയാൻഷ് ആര്യയുടെ അടുത്തേക്ക് ഓടിയെത്തി തന്റെ പ്രശസ്തമായ ‘നോട്ട്ബുക്ക് സെലിബ്രേഷൻ’ നടത്തി. 21 പന്തിൽ രണ്ട് ഫോറും ഒരു സിക്‌സും ഉൾപ്പെടെ 30 റൺസെടുത്താണ് ആര്യ പുറത്തായത്. എന്നാൽ ആഘോഷം റാത്തിക്ക് തിരിച്ചടിയായി. പ്രിയാൻഷ് ആര്യയ്ക്ക് ‘send-off’ നൽകിയതിനെ തുടർന്ന് മത്സരത്തിന്റെ കോഡ് ഓഫ് കണ്ടക്ട് ആർട്ടിക്കിൾ 2.5 പ്രകാരം റാത്തിക്കെതിരെ നടപടി സ്വീകരിച്ചു. മത്സര ഫീസിന്റെ 30 ശതമാനം പിഴ ചുമത്തിയതിനൊപ്പം രണ്ട് ഡീമെറിറ്റ് പോയിന്റും താരത്തിന് ലഭിച്ചു.
മത്സരത്തിൽ ആദ്യം ബാറ്റ് ചെയ്ത ഔട്ടർ ഡൽഹി വാരിയേഴ്സ് 20 ഓവറിൽ 5 വിക്കറ്റ് നഷ്ടത്തിൽ 219 റൺസ് എന്ന കൂറ്റൻ സ്കോർ പടുത്തുയർത്തി. യജസ് ശർമയാണ് വാരിയേഴ്സിന്റെ ഇന്നിങ്സിന് വേഗം നൽകിയത്. വെറും 36 പന്തിൽ 10 ഫോറും അഞ്ച് സിക്‌സും സഹിതം 86 റൺസ് നേടിയ യജസ് മികച്ച പ്രകടനം പുറത്തെടുത്തു.അക്ഷയ് സൈനി 23 പന്തിൽ പുറത്താകാതെ 49 റൺസെടുത്ത് മികച്ച പിന്തുണ നൽകി. ഹർഷ് ത്യാഗി 15 പന്തിൽ 32 റൺസും നേടി. ഇതോടെ പുരാനി ഡൽഹി 6ന് മുന്നിൽ 220 റൺസിന്റെ വിജയലക്ഷ്യമാണ് വാരിയേഴ്സ് ഉയർത്തിയത്.
മറുപടി ബാറ്റിങ്ങിൽ പുരാനി ഡൽഹി 6 മികച്ച തുടക്കമാണ് നേടിയത്. ഓപ്പണർമാരായ സമർത് സേത്തും ആര്യൻ ഗൗറും ചേർന്ന് ആദ്യ വിക്കറ്റിൽ 104 റൺസ് കൂട്ടിച്ചേർത്തതോടെ മത്സരം പുരാനി ഡൽഹിയുടെ നിയന്ത്രണത്തിലേക്ക് നീങ്ങുമെന്ന് തോന്നിച്ചു. ആര്യൻ ഗൗർ തകർപ്പൻ ബാറ്റിങ്ങുമായി മുന്നിൽ നിന്നു. 37 പന്തിൽ 65 റൺസാണ് താരം നേടിയത്. സമർത് സേത്ത് 24 പന്തിൽ 42 റൺസും നേടി. എന്നാൽ ആദ്യ വിക്കറ്റ് വീണതോടെ വാരിയേഴ്സ് ശക്തമായി തിരിച്ചുവന്നു.
വാരിയേഴ്സിന്റെ തിരിച്ചുവരവിൽ നിർണായക പങ്കുവഹിച്ചത് അമൻ ചൗധരിയാണ്. ആദ്യ മൂന്ന് ഓവറുകളിൽ തന്നെ മൂന്ന് വിക്കറ്റുകൾ വീഴ്ത്തിയ താരം പുരാനി ഡൽഹി 6ന്റെ റൺചേസിന്റെ താളം തെറ്റിച്ചു. നാല് ഓവറിൽ 38 റൺസ് വഴങ്ങി നാല് വിക്കറ്റ് എന്ന മികച്ച ബൗളിങ് പ്രകടനത്തോടെയാണ് അമൻ ചൗധരി മത്സരം അവസാനിപ്പിച്ചത്. തുടർച്ചയായ വിക്കറ്റുകൾ പുരാനി ഡൽഹി 6ന്റെ ബാറ്റിങ് നിരയിൽ ചെറിയ തകർച്ചയ്ക്ക് വഴിവെച്ചു. തുടക്കത്തിൽ ശക്തമായ നിലയിലായിരുന്ന ടീം പിന്നീട് സമ്മർദത്തിലാകുകയായിരുന്നു.
അതേസമയം, ദിഗ്‌വേഷ് റാത്തിയുടെ നോട്ട്ബുക്ക് ആഘോഷം മത്സരത്തിലെ മറ്റൊരു പ്രധാന ചർച്ചയായി. നേരത്തെയും സമാനമായ ‘send-off’ ആഘോഷങ്ങളിലൂടെ ശ്രദ്ധ നേടിയിട്ടുള്ള റാത്തി, ഇത്തവണയും അതേ രീതിയിലുള്ള ആഘോഷം ആവർത്തിച്ചതിന് പിന്നാലെ പിഴയും ഡീമെറിറ്റ് പോയിന്റുകളും ഏറ്റുവാങ്ങുകയായിരുന്നു
Digvesh Rathi vs Priyansh Arya!🤯#AdaniDPL2026 #AdaniDPL #DPL #DelhiPremierLeague #ODWvsPD6 #digvesh #priyansh #digveshrathi #priyansharya pic.twitter.com/DZLyjZO0xh
— Delhi Premier League T20 (@DelhiPLT20) August 16, 2026
