തിരുവനന്തപുരം: ശബരിമലയിൽ നവീകരണ പ്രവർത്തനങ്ങൾ നട തുറന്ന സമയത്ത് നടത്തിയതിൽ ദേവസ്വം ബോർഡിനെതിരെ അതൃപ്തി പരസ്യമാക്കി ദേവസ്വം മന്ത്രി കെ. മുരളീധരൻ. ദേവസ്വം ബോർഡ് പ്രസിഡന്റുമായി അഭിപ്രായവ്യത്യാസമുണ്ടെന്നും മന്ത്രി വ്യക്തമാക്കി.
ശബരിമല നട അടച്ചിടുന്ന സമയത്താണ് നവീകരണ പ്രവർത്തനങ്ങൾ നടത്തേണ്ടതെന്ന് മന്ത്രി പറഞ്ഞു. എന്നാൽ നട തുറന്ന സമയത്താണ് ഇത്തരം പ്രവർത്തനങ്ങൾ നടത്തിയത്. ഇപ്പോൾ തന്നെ ഇതാണ് സ്ഥിതിയെങ്കിൽ മണ്ഡലകാലത്ത് എന്തായിരിക്കും അവസ്ഥയെന്ന ആശങ്ക ഭക്തർക്കുണ്ടെന്നും അദ്ദേഹം പറഞ്ഞു.
ഭക്തർക്ക് യാതൊരു ബുദ്ധിമുട്ടും ഉണ്ടാകാതെ നോക്കേണ്ടത് സർക്കാരിന്റെ ഉത്തരവാദിത്തമാണ്. സർക്കാർ കാര്യങ്ങൾ നിരീക്ഷിക്കുന്നുണ്ട്. ഇത്തരം കാര്യങ്ങൾ മുൻകൂട്ടി കാണാൻ ദേവസ്വം ബോർഡിന് കഴിയാതിരുന്നത് വീഴ്ചയാണെന്നും മന്ത്രി വിമർശിച്ചു. ശബരിമലയിൽ എന്തെങ്കിലും പ്രശ്നമുണ്ടായാൽ വിമർശനം ബോർഡ് പ്രസിഡന്റിനെ മാത്രമല്ല, മന്ത്രിയെയും സർക്കാരിനെയും കൂടി ബാധിക്കുമെന്നും അതിനാൽ ഇത്തരം വിഷയങ്ങളിൽ പ്രതികരിക്കാതിരിക്കാനാകില്ലെന്നും അദ്ദേഹം വ്യക്തമാക്കി.
Related Post
കോന്നി മെഡിക്കൽ കോളേജിലെ എക്സ്-റേ വിവാദത്തിലും മന്ത്രി പ്രതികരിച്ചു. സംഭവത്തിൽ നടപടി ഉണ്ടായിട്ടുണ്ടെന്നും അത് ഒരാളിൽ മാത്രം ഒതുങ്ങില്ലെന്നും അദ്ദേഹം പറഞ്ഞു. ആരോഗ്യവകുപ്പിലെ സംവിധാനത്തിന് കുഴപ്പമൊന്നുമില്ലെന്നും മന്ത്രി വ്യക്തമാക്കി.
കെ.എം. ഷാജിയുടെ ആഡംബരക്കാർ വിവാദത്തെക്കുറിച്ചുള്ള ചോദ്യത്തിന്, ഔദ്യോഗിക ആവശ്യങ്ങൾക്ക് താൻ സർക്കാർ വാഹനം മാത്രമാണ് ഉപയോഗിക്കുന്നതെന്നും കെ. മുരളീധരൻ പറഞ്ഞു.
