വാഷിങ്ടൺ: യു.എസ്. പ്രസിഡന്റ് ഡൊണാൾഡ് ട്രംപിന്റെ 80-ാം പിറന്നാളിനോടനുബന്ധിച്ച് വൈറ്റ് ഹൗസിൽ വൻ യു.എഫ്.സി. (അൾട്ടിമേറ്റ് ഫൈറ്റിങ് ചാമ്പ്യൻഷിപ്പ്) പോരാട്ടം സംഘടിപ്പിക്കാൻ തീരുമാനം. ജൂൺ 14-ന് നടക്കുന്ന പരിപാടിക്ക് ‘യു.എഫ്.സി. ഫ്രീഡം 250’ എന്നാണ് പേര് നൽകിയിരിക്കുന്നത്. അമേരിക്കയുടെ 250-ാം സ്വാതന്ത്ര്യവാർഷികാഘോഷങ്ങളുടെ ഭാഗമായും പരിപാടി അവതരിപ്പിക്കപ്പെടുന്നു.
വൈറ്റ് ഹൗസിന്റെ തെക്കുഭാഗത്തുള്ള പുൽത്തകിടിയിൽ 92 അടി ഉയരമുള്ള ‘ദ ക്ലോ’ എന്ന ഭീമൻ കൂടാരം ഇതിനായി ഒരുക്കും. അതിനുള്ളിൽ പ്രത്യേക പോരാട്ടവേദിയും സജ്ജീകരിക്കും. യു.എഫ്.സി.യിലെ 14 താരങ്ങൾ വിവിധ പോരാട്ടങ്ങളിൽ ഏറ്റുമുട്ടുമെന്നാണ് റിപ്പോർട്ട്.
പരിപാടിക്കായി ഏകദേശം ആറുകോടി ഡോളർ (571 കോടി രൂപ) ചെലവിടുന്നതായാണ് വിവരം. സാമ്പത്തിക പ്രതിസന്ധിയും വിലക്കയറ്റവും നേരിടുന്ന സാഹചര്യത്തിൽ ഇത്രയും വലിയ തുക ചെലവഴിക്കുന്നതിനെതിരെ വിമർശനങ്ങളും ഉയർന്നിട്ടുണ്ട്. അക്രമാസക്തമായ പോരാട്ടങ്ങളിലൂടെ രാജ്യത്തിന്റെ സ്വാതന്ത്ര്യവാർഷികം ആഘോഷിക്കുന്നത് ഉചിതമാണോ എന്ന ചോദ്യവും ഉയരുന്നുണ്ട്.
Related Post
പരിപാടി സംഘടിപ്പിക്കുന്നത് യു.എഫ്.സി. സി.ഇ.ഒ. ഡാന വൈറ്റുമായി നടത്തിയ ധാരണയുടെ ഭാഗമായാണെന്ന് യു.എസ്. വിദേശകാര്യ സെക്രട്ടറി Marco Rubio വ്യക്തമാക്കി. അമേരിക്കൻ ജനതയ്ക്കുള്ള പ്രത്യേക സമ്മാനമായാണ് ഈ പരിപാടിയെ കാണുന്നതെന്നും അദ്ദേഹം പറഞ്ഞു.
വൈറ്റ് ഹൗസിന്റെ രണ്ടുനൂറ്റാണ്ടിലേറെ നീളുന്ന ചരിത്രത്തിൽ ഇതുപോലൊരു പോരാട്ടമേള ആദ്യമായാണ് അരങ്ങേറുന്നത്. ഏകദേശം 4,000 പേർ ‘ദ ക്ലോ’യ്ക്കുള്ളിൽ നിന്ന് പരിപാടി നേരിട്ട് കാണുമെന്നാണ് പ്രതീക്ഷ. കൂടാതെ വൈറ്റ് ഹൗസിന് പുറത്തുള്ള ഭീമൻ സ്ക്രീനുകളിലൂടെ 1.25 ലക്ഷം പേരോളം പോരാട്ടങ്ങൾ വീക്ഷിക്കുമെന്നും സംഘാടകർ കണക്കുകൂട്ടുന്നു.
ശ്രദ്ധേയമായ കാര്യം, ‘ദ ക്ലോ’ സ്ഥാപിക്കുന്ന അതേ സ്ഥലത്താണ് 1993-ൽ ഒസ്ലോ സമാധാനക്കരാറുകൾ ഒപ്പുവെച്ചത്. സമാധാനത്തിന്റെ പ്രതീകമായിരുന്ന ആ വേദി ഇപ്പോൾ പോരാട്ടവേദിയായി മാറുന്നതും ചർച്ചകൾക്ക് വഴിവെച്ചിട്ടുണ്ട്.
