ബെംഗളൂരു: ആത്മഹത്യ ചെയ്ത ആരാധകന്റെ സംസ്‌കാരച്ചടങ്ങിൽ പങ്കെടുക്കാതിരുന്നതിന്റെ കാരണം വ്യക്തമാക്കി കന്നഡ നടൻ യഷ്. ഇത്തരം പ്രവൃത്തികളെ പ്രോത്സാഹിപ്പിക്കുന്ന തരത്തിലുള്ള സന്ദേശം സമൂഹത്തിന് നൽകാൻ ആഗ്രഹിച്ചിരുന്നില്ലെന്നും അങ്ങനെ ചെയ്താൽ തെറ്റായ കീഴ്വഴക്കത്തിന് വഴിയൊരുങ്ങുമെന്നും യഷ് പറഞ്ഞു. ഇന്ത്യ ടി.വിയുടെ ‘ആപ് കീ അദാലത്’ പരിപാടിയിൽ അവതാരകന്റെ ചോദ്യത്തിന് മറുപടി നൽകുകയായിരുന്നു താരം.
2021 ഫെബ്രുവരിയിലാണ് കർണാടകയിലെ മാണ്ഡ്യ ജില്ലയിലെ കൊടിദൊഡ്ഡി ഗ്രാമത്തിൽ രാമകൃഷ്ണ (25) എന്ന യഷിന്റെ ആരാധകൻ മരിച്ചത്. തന്റെ സംസ്‌കാരച്ചടങ്ങിൽ നടൻ യഷും മുൻമുഖ്യമന്ത്രി സിദ്ധരാമയ്യയും പങ്കെടുക്കണമെന്ന ആഗ്രഹം ഇയാൾ കുറിപ്പിൽ രേഖപ്പെടുത്തിയിരുന്നു. സിദ്ധരാമയ്യ ചടങ്ങിൽ പങ്കെടുത്തെങ്കിലും യഷ് എത്തിയിരുന്നില്ല.
ഇതേക്കുറിച്ചുള്ള ചോദ്യത്തിനാണ് യഷ് തന്റെ നിലപാട് വ്യക്തമാക്കിയത്. ഇത്തരം സംഭവങ്ങൾക്ക് പിന്നാലെ താൻ സംസ്‌കാരച്ചടങ്ങിൽ പങ്കെടുക്കുന്നത് മറ്റുള്ളവരിൽ തെറ്റായ ചിന്താഗതി ഉണ്ടാക്കാൻ ഇടയാക്കുമെന്നാണ് യഷ് പറഞ്ഞത്.
‘ഇത്തരത്തിൽ എന്തെങ്കിലും ചെയ്താൽ ഞാൻ വരുമെന്ന് മറ്റുള്ളവർ കരുതാൻ സാധ്യതയുണ്ട്. ആ ചിന്താഗതി തന്നെ തെറ്റാണ്. ഒരാൾ മരിച്ചതിന് ശേഷം ഞാൻ സംസ്‌കാരച്ചടങ്ങിൽ പങ്കെടുത്തതുകൊണ്ട് എന്താണ് കാര്യം? ഇത്തരം പ്രവൃത്തികളെ പ്രോത്സാഹിപ്പിക്കുന്നത് ശരിയല്ല. അദ്ദേഹത്തിന്റെ മരണത്തിൽ എനിക്ക് ഏറെ വിഷമവും സങ്കടവുമുണ്ടായിരുന്നു. എന്നാൽ ഞാൻ അവിടെ പോയിരുന്നെങ്കിൽ മറ്റുള്ളവരും അത് പിന്തുടരാൻ സാധ്യതയുണ്ടായിരുന്നു’, യഷ് വ്യക്തമാക്കി.
തന്നെ കാണണമെന്ന ആഗ്രഹമുള്ള ആരാധകർ എന്തെങ്കിലും നേട്ടം കൈവരിച്ചശേഷം തന്നെ സമീപിച്ചാൽ കഴിയുന്നത്ര അവർക്കൊപ്പം നിൽക്കാൻ ശ്രമിക്കുമെന്നും യഷ് പറഞ്ഞു. എന്നാൽ, ഇത്തരം സംഭവങ്ങളിലൂടെ ശ്രദ്ധ നേടാനുള്ള ശ്രമങ്ങളെ പ്രോത്സാഹിപ്പിക്കാൻ കഴിയില്ലെന്നും അദ്ദേഹം കൂട്ടിച്ചേർത്തു.
‘ആരെങ്കിലും എന്തെങ്കിലും നേട്ടം കൈവരിച്ച ശേഷം യഷ് വരണമെന്ന് ആവശ്യപ്പെട്ടാൽ, സാധിക്കുന്ന സാഹചര്യത്തിൽ ഞാൻ പോകാൻ ശ്രമിക്കും. എന്നാൽ ഇത്തരം പ്രവൃത്തികളെ പ്രോത്സാഹിപ്പിക്കുന്നത് തെറ്റായ കീഴ്വഴക്കമായി മാറും. അതുകൊണ്ടാണ് അന്ന് ഞാൻ പോകാതിരുന്നത്’, യഷ് പറഞ്ഞു.
അതേസമയം, ഗീതു മോഹൻദാസ് സംവിധാനം ചെയ്യുന്ന ‘ടോക്‌സിക്: എ ഫെയറി ടെയിൽ ഫോർ ഗ്രോൺ അപ്‌സ്’ ആണ് യഷിന്റേതായി പുറത്തിറങ്ങാനിരിക്കുന്ന ചിത്രം. കിയാര അദ്വാനി, നയൻതാര, ഹുമ ഖുറേഷി, താരാ സുതാരിയ, രുക്മിണി വസന്ത് എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. ഓഗസ്റ്റ് 26ന് ചിത്രം തിയേറ്ററുകളിലെത്തും.
ദുൽഖർ സൽമാൻ ചിത്രം ‘ഐ ആം ഗെയിം’ സെപ്റ്റംബർ 3 ന്; ഒരുങ്ങുന്നത് വമ്പൻ ആഗോള റിലീസിന്
