വെള്ളിയാഴ്ച നടന്ന റിലയന്സ് ഫൗണ്ടേഷന് ഡെവലപ്മെന്റ് ലീഗ് (ആര്എഫ്ഡിഎല്) സോണല് ഗ്രൂപ്പ് സ്റ്റേജിന്റെ സമാപന മല്സരത്തില് മുത്തൂറ്റ് എഫ്എ, കിക്ക്സ്റ്റാര്ട്ട് എഫ്സി, ശ്രീനിധി ഡെക്കാന് എഫ്സി എന്നീ ടീമുകള് ദേശീയ ഗ്രൂപ്പ് സ്റ്റേജിലേക്ക് യോഗ്യത നേടി. മത്സരത്തിന്റെ അടുത്ത ഘട്ടത്തില് മൂന്ന് ടീമുകളും ഡെംപോ എസ്സി, എഫ്സി ഗോവ, മുംബൈ സിറ്റി എഫ്സി എന്നിവയ്ക്കൊപ്പം മാറ്റുരയ്ക്കും.
ടൂര്ണമെന്റിന്റെ അവസാന ദിനത്തില്, മഹാരാജാസ് കോളേജ് ഗ്രൗണ്ടില് ലീഗ് നേതാക്കളായ മുത്തൂറ്റ് എഫ്എയും രണ്ടാം സ്ഥാനക്കാരായ ശ്രീനിധി ഡെക്കാന് എഫ്സിയും 1-1ന് സമനിലയില് പിരിഞ്ഞു. മുത്തൂറ്റ് എഫ്എയ്ക്കുവേണ്ടി മുഹമ്മദ് സിയാസിന്റെ 26-ാം മിനിറ്റിലെ സ്ട്രൈക്ക് ശ്രീനിധി ഡെക്കാന് എഫ്സിയുടെ ലാംഗുന്ലാല് കിപ്ജെന് അഞ്ച് മിനിറ്റിനുള്ളില് മടക്കി. ആര്എഫ്ഡിഎല് നാഷണല് ഗ്രൂപ്പ് സ്റ്റേജില് ഇരുടീമുകളും തങ്ങളുടെ സ്ഥാനം ഉറപ്പിച്ചതിനാലാകാം അവസാന വിസില് മുഴക്കം കേള്ക്കുന്നതുവരെ സ്കോര് 1-1 എന്ന നിലയില് തുടര്ന്നു.
ഈ ലെവലില് മത്സരിക്കുന്നത് കളിക്കാരെ സംയമനം, ടീം വര്ക്ക്, ഉയര്ന്ന സമ്മര്ദ്ദത്തില് ഫുട്ബോള് കളിക്കുന്നതിന്റെ അനുഭവം എന്നീ ഘടകങ്ങള് മെച്ചപ്പെടുത്താന് സഹായിച്ചു- മുത്തൂറ്റ് എഫ്എയുടെ മുഖ്യ പരിശീലകന് അനീസ് കെ പറഞ്ഞു.
Related Post
തുടര്ച്ചയായ മൂന്നാം വര്ഷവും ആര്എഫ്ഡിഎല് ദേശീയ റൗണ്ടിലേക്ക് യോഗ്യത നേടാന് ഞങ്ങള്ക്ക് സാധിച്ചു. അക്കാദമി ശക്തമായ അടിത്തറ കെട്ടിപ്പടുക്കുകയും ഹൈ പ്രഷര് ഗെയിമുകളില് മികച്ച അനുഭവപരിചയം നേടി എന്നതിന്റെയും പ്രതിഫലനമാണിത്. ദേശീയ റൗണ്ട് രാജ്യത്തുടനീളമുള്ള മികച്ച ടീമുകളെ ഒരുമിച്ച് കൊണ്ടുവരുന്നു, മുത്തൂറ്റ് എഫ്എ കൂടുതല് വൈവിധ്യമാര്ന്ന കളിരീതികളും ഉയര്ന്ന തലത്തിലുള്ള നൈപുണ്യവും ശാരീരികക്ഷമതയും നേരിടും. നിലവിലെ പ്രകടനം നിലനിര്ത്തുകയും ഞങ്ങളുടെ തന്ത്രങ്ങള് നന്നായി നടപ്പിലാക്കുകയും ചെയ്താല്, നാഷണല് ഗ്രൂപ്പ് സ്റ്റേജില് മികച്ച സ്ഥാനം നേടിയെടുക്കാന് സാധിക്കുമെന്നതില് സംശയമില്ല-അദ്ദേഹം കൂട്ടിച്ചേര്ത്തു.
ആവേശകരമായ മറ്റൊരു മല്സരത്തില്, കിക്ക്സ്റ്റാര്ട്ട് എഫ്സി കര്ണാടകയും കേരള ബ്ലാസ്റ്റേഴ്സ് എഫ്സിയും സമനിലയില് പിരിഞ്ഞു. 1-1 സ്കോറിനാണ് ഇരുടീമുകളും മല്സരമവസാനിപ്പിച്ചത്. ഒരു പോയിന്റിന്റെ ബലത്തില് കിക്ക്സ്റ്റാര്ട്ട് എഫ്സി അടുത്ത റൗണ്ടിലേക്ക് പ്രവേശിച്ചു.
മഹാരാജാസ് കോളേജ് ഗ്രൗണ്ടില് 25-ാം മിനിറ്റില് ദേവോ അതോക്പം ബ്ലാസ്റ്റേഴ്സിന് ലീഡ് നല്കിയിരുന്നു. എന്നാല് കിക്ക്സ്റ്റാര്ട്ട് എഫ്സി സമനിലയില് പിടിച്ചു നിന്നു. 87-ാം മിനിറ്റിലായിരുന്നു പ്രെമിഷ് ടിയുടെ സമനില ഗോള്. ഗോകുലം കേരള എഫ്സിയും റൂട്ട്സ് എഫ്സിയും തമ്മിലുള്ള മൂന്നാം മത്സരം ഗോള് രഹിത സമനിലയില് അവസാനിച്ചു.
ആര്ഡിഎഫ്എല് നാഷണല് ഗ്രൂപ്പ് സ്റ്റേജിലേക്ക് ആറ് ടീമുകള് സ്ഥാനമുറപ്പിച്ചുകഴിഞ്ഞു. മേഘാലയയില് നിന്നും കൊല്ക്കത്തയില് നിന്നുമുള്ള ടീമുകള് ചേരാന് കാത്തിരിക്കുമ്പോള് മത്സരത്തിന്റെ അടുത്ത ഘട്ടം എങ്ങനെ രൂപപ്പെടും എന്നതായിരിക്കും എല്ലാവരുടെയും ശ്രദ്ധ.
അവസാന മല്സരത്തിലെ സ്കോറുകള്:
മുത്തൂറ്റ് എഫ്എ 1 (26′ മുഹമ്മദ് സിയാസ്)- ശ്രീനിധി ഡെക്കാന് എഫ്സി 1 (31′ ലാംഗുന്ലാല് കിപ്ജെന്)
കേരള ബ്ലാസ്റ്റേഴ്സ് എഫ്സി 1 (25′ ദേവോ അതോക്പാം)- കിക്ക്സ്റ്റാര്ട്ട് എഫ്സി കര്ണാടക 1 (87′ പ്രെമിഷ് ടി)
ഗോകുലം കേരള എഫ്സി 0- റൂട്ട്സ് എഫ്സി 0
