തിരുവനന്തപുരം: സാമൂഹികമാധ്യമങ്ങളിൽ ശ്രദ്ധ നേടിയ ‘കുട്ടിസഖാക്കൾ’ക്ക് വീഡിയോ കോളിൽ വിളിച്ച് സിപിഎം നേതാവ് പിണറായി വിജയൻ. മലപ്പുറം തിരൂർ വെട്ടം പഞ്ചായത്തിലെ മുറിവഴിക്കൽ ഹെൽത്ത് സെന്റർ യൂണിറ്റിലെ ബാലസംഘം പ്രവർത്തകരായ മുഹമ്മദ് സിയാനും കൂട്ടുകാരുമായാണ് പിണറായി വിജയൻ വീഡിയോ കോളിലൂടെ സംവദിച്ചത്.
മുഹമ്മദ് സിയാനും സുഹൃത്തുക്കളും ചേർന്ന് ‘കുട്ടിസഖാവ്’ എന്ന പേരിലുള്ള ഇൻസ്റ്റഗ്രാം അക്കൗണ്ടിൽ പങ്കുവെച്ച വീഡിയോയാണ് നേരത്തെ സാമൂഹികമാധ്യമങ്ങളിൽ വൈറലായത്. ബാലസംഘം പ്രവർത്തകരെയും കുട്ടികൾ ചേർന്ന് നിർമിച്ച പാർട്ടി ഓഫീസിനെയും പരിചയപ്പെടുത്തുന്നതായിരുന്നു വീഡിയോ.
വീഡിയോ ശ്രദ്ധ നേടിയതിന് പിന്നാലെ ‘കുട്ടിസഖാവ്’ എന്ന ഇൻസ്റ്റഗ്രാം അക്കൗണ്ട് മെറ്റ നീക്കം ചെയ്തിരുന്നു. എന്നാൽ പുതിയ അക്കൗണ്ടിലൂടെ മുഹമ്മദ് സിയാനും കൂട്ടുകാരും വീണ്ടും സാമൂഹികമാധ്യമങ്ങളിൽ സജീവമാണ്.
‘തിരൂർ വെട്ടം പഞ്ചായത്തിലെ മുറിവഴിക്കൽ ഹെൽത്ത് സെന്റർ യൂണിറ്റിലെ ബാലസംഘം കൂട്ടുകാരായ മുഹമ്മദ് സിയാന്റെയും സുഹൃത്തുക്കളുടെയും വിശേഷങ്ങൾ കേട്ടു’ എന്ന കുറിപ്പോടെയാണ് പിണറായി വിജയൻ വീഡിയോ കോളിന്റെ ദൃശ്യങ്ങൾ ഫെയ്സ്ബുക്കിൽ പങ്കുവെച്ചത്.
