ബ്രാറ്റിസ്ലാവ: സ്വതന്ത്ര രാഷ്ട്രമായി രൂപീകൃതമായതിന് ശേഷം സ്ലൊവാക്യ സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയായി നരേന്ദ്ര മോദി ചരിത്രം കുറിക്കുന്നു. സ്ലൊവാക്യൻ പ്രധാനമന്ത്രി റോബർട്ട് ഫിക്കോയുടെ ക്ഷണപ്രകാരം ഞായറാഴ്ച വൈകിട്ടാണ് സ്ലൊവാക്യ തലസ്ഥാനമായ ബ്രാറ്റിസ്ലാവയിലെത്തിയ മോദി, ചൊവ്വാഴ്ച ( ജൂൺ 16 വരെ) നീളുന്ന ഔദ്യോഗിക സന്ദർശനത്തിന്റെ ഭാഗമായി വിവിധ ഉഭയകക്ഷി ചർച്ചകളിൽ പങ്കെടുക്കും.
ഇന്ത്യയും സ്ലൊവാക്യയും തമ്മിലുള്ള നയതന്ത്ര, സാമ്പത്തിക, പ്രതിരോധ, സാങ്കേതിക മേഖലകളിലെ സഹകരണം കൂടുതൽ ശക്തിപ്പെടുത്തുകയാണ് സന്ദർശനത്തിന്റെ പ്രധാന ലക്ഷ്യം. സമീപ വർഷങ്ങളിൽ ഇരുരാജ്യങ്ങളും തമ്മിലുള്ള ബന്ധം കൂടുതൽ സജീവമായിരുന്നു. വ്യാപാര രംഗത്ത് ശ്രദ്ധേയമായ വളർച്ചയാണ് ഉണ്ടായിരിക്കുന്നത്. കഴിഞ്ഞ വർഷം ഇരുരാജ്യങ്ങളും തമ്മിലുള്ള വ്യാപാര മൂല്യം 1.8 ബില്യൺ ഡോളറിലെത്തിയെന്നാണ് കണക്ക്.
പ്രമുഖ ഇന്ത്യൻ വ്യവസായ സ്ഥാപനങ്ങൾക്ക് സ്ലൊവാക്യയിൽ ശക്തമായ സാന്നിധ്യമുണ്ട്. യൂറോപ്യൻ വിപണിയിലേക്കുള്ള പ്രധാന കവാടങ്ങളിലൊന്നായാണ് സ്ലൊവാക്യയെ ഇന്ത്യൻ വ്യവസായ ലോകം കാണുന്നത്. പ്രതിരോധ മേഖലയിലും സഹകരണം വർധിച്ചിട്ടുണ്ട്. പീരങ്കികൾ, കവചിത വാഹനങ്ങൾ തുടങ്ങിയവയുടെ സംയുക്ത നിർമാണത്തിനായി ഇന്ത്യൻ കമ്പനികളും സ്ലൊവാക്യൻ സ്ഥാപനങ്ങളും തമ്മിൽ വിവിധ കരാറുകൾ നിലവിലുണ്ട്.
ഡിജിറ്റൽ സാങ്കേതികവിദ്യ, സൈബർ സുരക്ഷ, നവീന സാങ്കേതിക ഗവേഷണം തുടങ്ങിയ മേഖലകളിലും ഇരുരാജ്യങ്ങളും തമ്മിൽ ചർച്ചകൾ പുരോഗമിക്കുകയാണ്. ബഹിരാകാശ മേഖലയിലെ സഹകരണത്തിനും പ്രത്യേക പ്രാധാന്യമുണ്ട്. സ്ലൊവാക്യയുടെ ആദ്യ ഉപഗ്രഹം ഇന്ത്യയുടെ വിക്ഷേപണ വാഹനത്തിലൂടെയാണ് ഭ്രമണപഥത്തിലെത്തിയത്.
1993-ലാണ് സ്ലൊവാക്യ സ്വതന്ത്ര രാഷ്ട്രമായി പ്രഖ്യാപിക്കപ്പെട്ടത്. നിലവിൽ പതിനൊന്നായിരത്തോളം ഇന്ത്യക്കാർ താമസിക്കുന്നുണ്ട്. ഇവരിൽ നൂറുകണക്കിന് വിദ്യാർഥികൾ വിവിധ സർവകലാശാലകളിൽ ഉന്നതപഠനം നടത്തുന്നവരാണ്. വിദ്യാഭ്യാസ-സാംസ്കാരിക രംഗങ്ങളിലും ഇരുരാജ്യങ്ങൾ തമ്മിലുള്ള ബന്ധം വളർന്നുവരികയാണ്. ഇന്ത്യൻ തത്വചിന്തയുടെ പ്രധാന ഗ്രന്ഥങ്ങളിലൊന്നായ ഉപനിഷത്തുകൾ സ്ലൊവാക്യൻ ഭാഷയിലേക്ക് വിവർത്തനം ചെയ്യപ്പെട്ടത് ഈ ബന്ധത്തിന്റെ ശ്രദ്ധേയ ഉദാഹരണമായി കണക്കാക്കപ്പെടുന്നു.
ഇന്ത്യയും യൂറോപ്യൻ യൂണിയനും തമ്മിലുള്ള സ്വതന്ത്ര വ്യാപാര കരാറിനെ സ്ലൊവാക്യ പിന്തുണയ്ക്കുന്നതും ഇന്ത്യയ്ക്ക് അനുകൂല ഘടകമായാണ് വിലയിരുത്തപ്പെടുന്നത്. പ്രതീകാത്മക സന്ദർശനത്തിനപ്പുറം ദീർഘകാല തന്ത്രപരമായ പങ്കാളിത്തത്തിന് അടിത്തറ പാകുന്നതായിരിക്കും മോദിയുടെ സ്ലൊവാക്യൻ സന്ദർശനമെന്നാണ് വിലയിരുത്തൽ.
