Related Post
ഇംഫാല്‍: കലാപം വിട്ടൊഴിയാതെ മണിപ്പൂര്‍. ചുരാചന്ദ്പൂരില്‍ ഹമാര്‍, സോമി സമുദായങ്ങള്‍ തമ്മിലുണ്ടായ ഏറ്റുമുട്ടലില്‍ ഒരാള്‍ കൊല്ലപ്പെട്ടു. നിരവധിപേര്‍ക്ക് പരിക്ക്. ചൊവ്വാഴ്ച രാത്രിയാണ് സംഘര്‍ഷം ആരംഭിച്ചത്.സോമി സായുധ സംഘത്തിന്റെ പതാക ചിലര്‍ നീക്കം ചെയ്യാന്‍ ശ്രമിച്ചതോടെയാണ് സംഘര്‍ഷം ആളിക്കത്തിയത്. ഇരു വിഭാഗങ്ങളിലെയും അംഗങ്ങല്‍ പരസ്പരം വെടിയുതിര്‍ക്കുകയും കല്ലെറിയുകയും ചെയ്തു. സുരക്ഷാ സേന ആക്രമികള്‍ക്കുനേരെ കണ്ണീര്‍വാതകം പ്രയോഗിച്ചു. ഏറ്റമുട്ടലില്‍ 53 കാരനായ ലാല്‍ റോപുയി പകുമാറ്റെ എന്നയാള്‍ കൊല്ലപ്പെട്ടതായി പൊലീസ് പറഞ്ഞു. ഞായറാഴ്ച ഹമാര്‍ ഗോത്രനേതാവിനെ മര്‍ദിച്ച സംഭവത്തില്‍ പ്രദേശത്ത് സംഘര്‍ഷാവസ്ഥ നിലനിന്നിരുന്നു.തുടര്‍ന്ന് കഴിഞ്ഞ ദിവസം ഇരു വിഭാഗങ്ങളും കൂടിക്കാഴ്ച നടത്തുകയും ധാരണയിലെത്തുകയും ചെയ്തിരുന്നു. ഇതിന് മണിക്കൂറുകള്‍ക്ക് ശേഷമാണ് സംഘര്‍ഷം പൊട്ടിപ്പുറപ്പെട്ടത്. പ്രദേശത്ത് കൂടുതല്‍ സേനയെ വിന്യസിച്ചതായി പൊലീസ് അറിയിച്ചു.
