പത്തനംതിട്ട: സിപിഎം അടൂർ ഏരിയ കമ്മിറ്റി യോഗത്തിൽ സംസ്ഥാന സെക്രട്ടറി എം.വി. ഗോവിന്ദനെതിരെ രൂക്ഷ വിമർശനം. ഗോവിന്ദന്റെ പത്രസമ്മേളനങ്ങളെ പരിഹസിച്ചുകൊണ്ട് ചില അംഗങ്ങൾ കടുത്ത ഭാഷയിലാണ് പ്രതികരിച്ചത്.
“ജയന്റെ സിനിമയിലെ ‘ചാം ചച്ച ചോം ചച്ച’ എന്ന ഗാനത്തെപ്പോലെയാണ് ഗോവിന്ദന്റെ പത്രസമ്മേളനം. പാട്ട് എഴുതിയവനും സംഗീതം നൽകിയവനും പാടിയവനും കേട്ടവനും അതിന്റെ അർഥം മനസിലാകാത്തതുപോലെ ഗോവിന്ദന്റെ വിശദീകരണങ്ങളും അവ്യക്തമാണ്” എന്ന രീതിയിലായിരുന്നു വിമർശനം.
തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ മുഖ്യമന്ത്രി പിണറായി വിജയൻ പ്രതിപക്ഷ നേതൃസ്ഥാനത്ത് നിന്ന് ഒഴിഞ്ഞ് മാതൃക കാട്ടണമെന്നും യോഗത്തിൽ ചിലർ ആവശ്യപ്പെട്ടു.
Related Post
അടൂരിൽ ചില സമുദായ നേതാക്കൾ എൽഡിഎഫിന് വോട്ട് ഉറപ്പുനൽകുമെന്ന് പറഞ്ഞ് പണം വാങ്ങിയെന്ന ആരോപണവും യോഗത്തിൽ ഉയർന്നു. ഇക്കാര്യം അന്വേഷിക്കണമെന്ന് അംഗങ്ങൾ ആവശ്യപ്പെട്ടു. “എല്ലാ വോട്ടും എൽഡിഎഫിന് ലഭിക്കുമെന്ന് പറഞ്ഞാണ് പണം വാങ്ങിയത്” എന്ന വിമർശനവും ഉയർന്നു.
അടൂർ മണ്ഡലത്തിലെ തോൽവിയെക്കുറിച്ചും കടുത്ത വിമർശനമുണ്ടായി. “സിപിഐ ഒന്നും ചെയ്തില്ല. ചിറ്റയം ഗോപകുമാറിനെതിരായ നെഗറ്റീവ് വോട്ടാണ് തോൽവിക്ക് കാരണം. പ്രിജി കണ്ണൻ എന്ന സൗമ്യ മുഖത്തെ മുന്നിലെത്തിച്ചതാണ് സിപിഐയുടെ ഏക സംഭാവന” എന്നായിരുന്നു ചിലരുടെ പ്രതികരണം.
ഇതിനിടെ സിപിഎം കേന്ദ്രകമ്മിറ്റി യോഗം ദില്ലിയിൽ ആരംഭിച്ചു. മൂന്ന് ദിവസത്തെ യോഗത്തിൽ കേരളത്തിലെ തിരഞ്ഞെടുപ്പ് തോൽവി പ്രധാന ചർച്ചാവിഷയമാകും. തിരഞ്ഞെടുപ്പ് ഫലം സംബന്ധിച്ച വിശദമായ വിലയിരുത്തൽ നടത്താൻ പോളിറ്റ് ബ്യൂറോ നേരത്തെ സംസ്ഥാന ഘടകത്തോട് നിർദേശിച്ചിരുന്നു.
സംസ്ഥാന സെക്രട്ടേറിയറ്റും സംസ്ഥാന കമ്മിറ്റിയും തയ്യാറാക്കിയ പ്രാഥമിക റിപ്പോർട്ട് കേന്ദ്രകമ്മിറ്റിയിൽ അവതരിപ്പിക്കും. പിണറായി വിജയനെ പ്രതിപക്ഷ നേതാവാക്കാനുള്ള സംസ്ഥാന കമ്മിറ്റിയുടെ തീരുമാനത്തിനെതിരെ പോളിറ്റ് ബ്യൂറോ യോഗത്തിൽ തന്നെ ചില അംഗങ്ങൾ എതിർപ്പ് രേഖപ്പെടുത്തിയിരുന്നു. കേന്ദ്രകമ്മിറ്റിയിലും വിഷയത്തിൽ ചർച്ച ഉണ്ടാകാനാണ് സാധ്യത.
എന്നാൽ പിണറായി വിജയനെ പ്രതിപക്ഷ നേതൃസ്ഥാനത്ത് നിന്ന് മാറ്റില്ലെന്ന് സംസ്ഥാന സെക്രട്ടറി എം.വി. ഗോവിന്ദൻ ഡൽഹിയിൽ വ്യക്തമാക്കി. പോളിറ്റ് ബ്യൂറോയുടെ അംഗീകാരത്തോടെയാണ് തീരുമാനം എടുത്തതെന്നും അദ്ദേഹം പറഞ്ഞു.
