ടെഹ്റാൻ: അമേരിക്കയുമായുള്ള വെടിനിർത്തൽ കരാർ ലംഘിച്ച് ലബനനിൽ ഇസ്രയേൽ നടത്തിയ ആക്രമണങ്ങളിൽ കടുത്ത പ്രതിഷേധവുമായി ഇറാൻ. ഇസ്രയേലിന്റെ നടപടിയെ കരാറിന്റെ നഗ്നമായ ലംഘനമെന്ന് വിശേഷിപ്പിച്ച ഇറാൻ, നിർണായകമായ ഹോർമുസ് കടലിടുക്ക് വീണ്ടും അടച്ചതായി പ്രഖ്യാപിച്ചു. ഇതോടെ പശ്ചിമേഷ്യയിൽ വീണ്ടും സംഘർഷാവസ്ഥ രൂക്ഷമാകുമെന്ന ആശങ്ക അന്താരാഷ്ട്ര തലത്തിൽ ശക്തമായിരിക്കുകയാണ്.
തങ്ങളുടെ മരവിപ്പിച്ച സ്വത്തുക്കൾ വകമാറ്റി ഗൾഫ് രാജ്യങ്ങൾക്ക് നഷ്ടപരിഹാരം നൽകാനുള്ള അന്താരാഷ്ട്ര നീക്കങ്ങളെ ഒരു കാരണവശാലും അംഗീകരിക്കില്ലെന്നും ഇറാൻ മുന്നറിയിപ്പ് നൽകി. രാജ്യത്തിന്റെ സാമ്പത്തിക താത്പര്യങ്ങൾ സംരക്ഷിക്കുന്നതിൽ യാതൊരു വിട്ടുവീഴ്ചയും ഉണ്ടാകില്ലെന്നാണ് ടെഹ്റാന്റെ നിലപാട്.
ഇതിനിടെ, ഇന്ന് ജനീവയിൽ നടക്കാനിരുന്ന അമേരിക്ക–ഇറാൻ ചർച്ചകൾ റദ്ദായി. അമേരിക്കൻ വൈസ് പ്രസിഡണ്ട് ജെ.ഡി. വാൻസ് ചർച്ചയിൽ നിന്ന് പിന്മാറിയതോടെയാണ് കൂടിക്കാഴ്ച ഉപേക്ഷിക്കപ്പെട്ടത്. ലബനനിൽ ഇസ്രയേൽ തുടരുന്ന കനത്ത ആക്രമണങ്ങളും അതുമൂലം മേഖലയിൽ രൂപപ്പെട്ട അസ്ഥിരതയുമാണ് പിന്മാറ്റത്തിന് കാരണമായതെന്നാണ് റിപ്പോർട്ടുകൾ.
Related Post
ലബനനിൽ അർധരാത്രി മുതൽ തുടരുന്ന ആക്രമണത്തിൽ മരണസംഖ്യ ഉയരുന്നതിനിടെയാണ് ഇറാൻ ഹോർമുസ് കടലിടുക്ക് അടച്ചത്. ഇസ്രയേലിന്റെ സൈനിക നടപടികൾ അവസാനിപ്പിക്കണമെന്ന് ഫ്രാൻസ് ഉൾപ്പെടെയുള്ള രാജ്യങ്ങൾ ആവശ്യപ്പെട്ടിട്ടുണ്ട്. സംഘർഷം നിയന്ത്രണാതീതമാകാതിരിക്കാൻ അടിയന്തര നയതന്ത്ര ഇടപെടൽ വേണമെന്ന ആവശ്യവും വിവിധ രാജ്യങ്ങൾ ഉയർത്തിയിട്ടുണ്ട്.
അതേസമയം, അമേരിക്കൻ വൈസ് പ്രസിഡണ്ട് ജെ.ഡി. വാൻസ് ഇസ്രയേലിനെതിരെ നടത്തിയ പരാമർശവും ശ്രദ്ധ നേടുകയാണ്. ഇസ്രയേലിന്റെ പ്രതിരോധത്തിനായി ഉപയോഗിച്ച ആയുധങ്ങളിൽ മൂന്നിൽ രണ്ട് ഭാഗവും അമേരിക്കൻ നികുതിദായകരുടെ പണത്തിലൂടെയാണ് ലഭിച്ചതെന്നായിരുന്നു അദ്ദേഹത്തിന്റെ പ്രസ്താവന. വിഷയത്തിൽ ഇസ്രയേൽ ഇതുവരെ ഔദ്യോഗിക പ്രതികരണം നടത്തിയിട്ടില്ല.
ഹോർമുസ് കടലിടുക്ക് അടച്ചതോടെ ആഗോള എണ്ണവിപണിയിലും പ്രത്യാഘാതങ്ങൾ ഉണ്ടാകുമോയെന്ന ആശങ്ക ഉയർന്നിട്ടുണ്ട്. ലോകത്തെ എണ്ണക്കയറ്റുമതിയുടെ വലിയൊരു വിഹിതം ഈ കടലിടുക്കിലൂടെയാണ് കടന്നുപോകുന്നത്. അതിനാൽ പശ്ചിമേഷ്യയിലെ പുതിയ സംഘർഷം ആഗോള സാമ്പത്തിക മേഖലയെയും ബാധിക്കുമെന്നാണ് വിദഗ്ധരുടെ മുന്നറിയിപ്പ്.
