വാഷിംഗ്ടൺ: ജി-7 ഉച്ചകോടിക്കിടെ ഇറ്റാലിയൻ പ്രധാനമന്ത്രി ജോർജിയ മെലോനി തനിക്കൊപ്പം ഫോട്ടോ എടുക്കാൻ നിരന്തരം അഭ്യർഥിച്ചെന്ന പരാമർശം വിവാദമായതിന് പിന്നാലെ, അമേരിക്കൻ പ്രസിഡന്റ് ഡൊണാൾഡ് ട്രംപ് വീണ്ടും മെലോനിക്കെതിരെ രംഗത്തെത്തി. ട്രൂത്ത് സോഷ്യലിൽ പങ്കുവെച്ച പുതിയ കുറിപ്പിലാണ് മെലോനിയുടെ ജനപ്രീതിയെയും വിദേശനയ നിലപാടുകളെയും ട്രംപ് വിമർശിച്ചത്.
ഇറ്റലിയിൽ മെലോനിയുടെ ജനപ്രീതി ഗണ്യമായി കുറഞ്ഞിരിക്കുകയാണെന്നും, ഇറാന്റെ ആണവ പദ്ധതിക്കെതിരെ അമേരിക്ക സ്വീകരിച്ച നിലപാടിനെ പിന്തുണയ്ക്കുന്നതിൽ അവർ പരാജയപ്പെട്ടതാണ് അതിന് പ്രധാന കാരണമെന്നും ട്രംപ് ആരോപിച്ചു. ഇറാനെ സൈനികമായി പരാജയപ്പെടുത്തിയതിന് ശേഷം സ്വന്തം രാഷ്ട്രീയ പ്രതിച്ഛായ മെച്ചപ്പെടുത്താനാണ് മെലോനി ഇപ്പോൾ അമേരിക്കയുമായും തന്നോടും കൂടുതൽ അടുപ്പം കാണിക്കാൻ ശ്രമിക്കുന്നതെന്നും അദ്ദേഹം പരിഹസിച്ചു.
നേരത്തെ ഇറ്റാലിയൻ ടെലിവിഷൻ ചാനലായ ലാ7-ന് നൽകിയ അഭിമുഖത്തിലും ട്രംപ് സമാനമായ അവകാശവാദങ്ങൾ ഉന്നയിച്ചിരുന്നു. ജി-7 ഉച്ചകോടിക്കിടെ മെലോനി തനിക്കൊപ്പം ഫോട്ടോ എടുക്കാൻ ആവർത്തിച്ച് ആവശ്യപ്പെട്ടുവെന്നും, അവരോട് സഹതാപം തോന്നിയതിനാലാണ് സമ്മതിച്ചതെന്നും ട്രംപ് പറഞ്ഞിരുന്നു.
എന്നാൽ ഈ ആരോപണങ്ങളെ ശക്തമായി തള്ളിക്കളഞ്ഞ മെലോനി, ട്രംപിന്റെ പ്രസ്താവനകൾ അടിസ്ഥാനരഹിതവും കെട്ടിച്ചമച്ചതുമാണെന്ന് പ്രതികരിച്ചു. എക്‌സ് പ്ലാറ്റ്‌ഫോമിൽ പങ്കുവെച്ച വീഡിയോ സന്ദേശത്തിലൂടെയാണ് അവർ മറുപടി നൽകിയത്.
“സ്വന്തം സഖ്യകക്ഷികളോട് അമേരിക്കൻ പ്രസിഡന്റ് ഇത്തരത്തിൽ പെരുമാറുന്നത് എന്തിനാണെന്ന് മനസ്സിലാകുന്നില്ല. ശത്രുക്കളോട് പോലും കാണിക്കാത്ത കടുപ്പം സുഹൃത്തുരാജ്യങ്ങളോട് കാണിക്കുന്നത് നിരാശാജനകമാണ്. ഇറ്റലിയും ഞാനും ആരുടെയും മുന്നിൽ യാചിക്കാറില്ല,” മെലോനി പറഞ്ഞു.
ഇറാനുമായി ബന്ധപ്പെട്ട സംഘർഷകാലത്ത് ഇറ്റലിയിലെ റൺവേകളും ലാൻഡിംഗ് സ്ട്രിപ്പുകളും അമേരിക്കൻ സൈനിക ആവശ്യങ്ങൾക്കായി ഉപയോഗിക്കാൻ അനുവദിച്ചില്ലെന്നും ഇത് അമേരിക്കയ്ക്ക് വലിയ ലോജിസ്റ്റിക്കൽ വെല്ലുവിളികൾ സൃഷ്ടിച്ചുവെന്നും ട്രംപ് ആരോപിച്ചു. എൻബിസി ന്യൂസിന് നൽകിയ അഭിമുഖത്തിലും അദ്ദേഹം ഇക്കാര്യം പരാമർശിച്ചിരുന്നു.
അതേസമയം, മാർപ്പാപ്പ ലിയോ പതിനാലാമനെതിരെ ട്രംപ് നടത്തിയ വിമർശനങ്ങളെ മെലോനി നേരത്തെ എതിർത്തതും ഇരുനേതാക്കളും തമ്മിലുള്ള ബന്ധത്തിൽ വിള്ളൽ വീഴാൻ കാരണമായിരുന്നു. പുതിയ വിവാദത്തിന്റെ പശ്ചാത്തലത്തിൽ ഇറ്റാലിയൻ വിദേശകാര്യമന്ത്രി ആന്റോണിയോ തയാനി തന്റെ അമേരിക്കൻ സന്ദർശനം റദ്ദാക്കി. യു.എസ് സ്റ്റേറ്റ് സെക്രട്ടറി മാർക്കോ റൂബിയോയുമായി അടുത്ത ആഴ്ച നടത്താനിരുന്ന കൂടിക്കാഴ്ചയും ഇതോടെ ഒഴിവായി.
കൂടാതെ, മിയാമിയിൽ നടക്കാനിരുന്ന ഇറ്റലി–അമേരിക്ക ബിസിനസ് ഫോറവും റദ്ദാക്കിയിട്ടുണ്ട്. വിഷയത്തിൽ വൈറ്റ് ഹൗസോ യു.എസ് സ്റ്റേറ്റ് ഡിപ്പാർട്ട്‌മെന്റോ ഇതുവരെ ഔദ്യോഗിക പ്രതികരണം നടത്തിയിട്ടില്ല.
