കൊച്ചി: ബോബി ഗ്രൂപ് ഉടമ ബോബി ചെമ്മണൂരിനെതിരെ നടി ഹണി റോസ് എറണാകുളം സെന്ട്രല് സ്റ്റേഷനില് പരാതി നല്കി. സെന്ട്രല് പൊലീസ് കേസെടുത്ത് അന്വേഷണം ആരംഭിച്ചു. ലൈംഗികച്ചുവയോടെയുള്ള അശ്ലീല ഭാഷണത്തിനെതിരെ ഭാരതീയ ന്യായസംഹിതയിലെ 75(4) വകുപ്പു പ്രകാരവും ഇലക്ട്രോണിക് മാധ്യമത്തിലൂടെ അശ്ലീല പരാമര്ശം നടത്തുന്നതിനെതിരെ ഐടി ആക്ടിലെ 67 വകുപ്പു പ്രകാരവുമാണു കേസ് റജിസ്റ്റര് ചെയ്തത്.
നടിയുടെ ചിത്രം മോശമായ രീതിയില് തംബ്നെയില് ആയി ഉപയോഗിച്ച 20 യുട്യൂബര്മാര്ക്കെതിരെയും പരാതി നല്കിയിട്ടുണ്ട്. ഓഗസ്റ്റ് 7ന് ബോബി ചെമ്മണ്ണൂരിന്റെ കണ്ണൂര് ആലക്കോട് ജ്വല്ലറി ഉദ്ഘാടനത്തിന് ക്ഷണിച്ചപ്പോള് നേരിട്ട ലൈംഗികാതിക്രമങ്ങളും അതിനു ശേഷവും പല വേദികളിലും താന് നേരിട്ട ബുദ്ധിമുട്ടുകളും നടി പരാതിയില് എടുത്തുപറഞ്ഞിട്ടുണ്ട്.
ബോച്ചെയ്ക്ക് എതിരെ പരാതി നല്കിയ വിവരം നടി തന്റെ സമൂഹമാധ്യമ പേജുകള് വഴിയാണു പുറത്തുവിട്ടത്. എഡിജിപി മനോജ് ഏബ്രഹാം, കൊച്ചി സിറ്റി പൊലീസ് കമ്മിഷണര് പുട്ട വിമലാദിത്യ എന്നിവരെ നടി നേരിട്ടു കണ്ടിരുന്നു. ഇവരുടെ നിര്ദേശപ്രകാരമാണു പരാതി നല്കാന് തീരുമാനിച്ചത്. വൈകിട്ട് അഞ്ചരയോടെയാണു സെന്ട്രല് സ്റ്റേഷനിലെത്തി പരാതി കൈമാറിയത്.
‘അയാള്ക്ക് പണക്കൊഴുപ്പിന്റെ അഹങ്കാരം; ബോബി ചെമ്മണ്ണൂരും അറസ്റ്റില് ആകുമോ? തുടര്ച്ചയായി അശ്ലീല അധിക്ഷേപങ്ങള് നടത്തിയതിനെതിരെ ഹണി റോസിന്റെ പരാതി…
”ബോബി ചെമ്മണ്ണൂര്, താങ്കള് എനിക്കെതിരെ തുടര്ച്ചയായി നടത്തിയ അശ്ലീല അധിക്ഷേപങ്ങള്ക്കെതിരെ ഞാന് എറണാകുളം സെന്ട്രല് പൊലീസ് സ്റ്റേഷനില് പരാതി കൊടുത്തിട്ടുണ്ട്. താങ്കളുടെ തന്നെ മാനസികനിലയുള്ള താങ്കളുടെ കൂട്ടാളികള്ക്കെതിരെയുള്ള പരാതികള് പുറകെ ഉണ്ടാവും. താങ്കള് താങ്കളുടെ പണത്തിന്റെ ഹുങ്കില് വിശ്വസിക്കൂ, ഞാന് ഭാരതത്തിലെ നിയമവ്യവസ്ഥയുടെ ശക്തിയില് വിശ്വസിക്കുന്നു.” ഹണി റോസ് സമൂഹമാധ്യമത്തില് കുറിച്ചു.
Related Post
ഹണി റോസ് ഫെയ്സ്ബുക്കിലിട്ട കുറിപ്പിനു താഴെ അശ്ലീലവും അപകീര്ത്തികരവുമായ പരാമര്ശങ്ങള് നടത്തിയ 30 പേര്ക്കെതിരെ നേരത്തെ പൊലീസ് കേസെടുക്കുകയും ഒരാള് അറസ്റ്റിലാവുകയും ചെയ്തിരുന്നു. പിന്നാലെ ഇന്സ്റ്റഗ്രാം പേജിലും അധിക്ഷേപങ്ങള് നടത്തിയവര്ക്കെതിരെയും പൊലീസ് നടപടി എടുക്കാന് ഒരുങ്ങുന്നുണ്ട്. യുട്യൂബ് ചാനലുകകളും കുടുങ്ങിയേക്കും.
നാലു മാസം മുന്പു നടന്ന ഉദ്ഘാടന ചടങ്ങിനിടെ ബോബി ചെമ്മണ്ണൂര് നടത്തിയ വിവാദ പരാമര്ശങ്ങളെക്കുറിച്ച് വ്യവസായിയുടെ പേര് പരാമര്ശിക്കാതെ തന്നെ ഹണി റോസ് സമൂഹമാധ്യമങ്ങളില് കുറിപ്പ് പങ്കുവച്ചിരുന്നു. തനിക്കെതിരെ നിരന്തരം ലൈംഗികാധിക്ഷേപവും അപവാദ പ്രചരണങ്ങളും നടത്തുന്നെന്ന് ഇതില് ഹണി റോസ് വ്യക്തമാക്കിയിരുന്നു. ഇക്കാര്യത്തില് താന് മുന്നോട്ടു പോകുമെന്നും പ്രതികരിക്കാന് അറിയാത്തതിനാല് അല്ല നിശബ്ദയായിരുന്നത് എന്നും അവര് പറഞ്ഞിരുന്നു.
