തിരുവനന്തപുരം: വയനാട് കള്ളാടി തുരങ്കപാത നിർമാണ സ്ഥലത്ത് ഉണ്ടായ മണ്ണിടിച്ചിൽ ദുരന്തമേഖല മുഖ്യമന്ത്രി വിഡി സതീശൻ സന്ദർശിക്കും. രാവിലെ 11.30 ന് തിരുവനന്തപുരം വിമാനത്താവളത്തിൽ നിന്നും ഹെലികോപ്ടറിൽ യാത്ര തിരിക്കുന്ന മുഖ്യമന്ത്രി ഉച്ചയ്ക്ക് ഒരു മണിയോടെ ദുരന്തമേഖലയിലെത്തും. പൂർണ പരിശോധന നടത്താൻ വേണ്ടി, മണ്ണിടിച്ചിൽ സ്ഥലത്തേക്കുള്ള പ്രവേശനം നിരോധിച്ചിരിക്കുകയാണ്.
ചൊവ്വാഴ്ച രാവിലെ പതിനൊന്നരയോടെയാണ് കള്ളാടിയിൽ മീനാക്ഷി പാലത്തിന് സമീപം തുരങ്കപാത നിർമാണ മേഖലയിലേക്ക് കുന്നിടിഞ്ഞുവീണത്. നിർമാണ ജോലികളിൽ ഏർപ്പെട്ടിരുന്ന തൊഴിലാളികളും സുരക്ഷാ ജീവനക്കാരും മേൽനോട്ട ചുമതലയിലുണ്ടായിരുന്നവരുമാണ് അപകടത്തിൽപ്പെട്ടത്.
അപകടത്തിൽ അഞ്ച് പേർ മരിച്ചതായാണ് ഔദ്യോഗിക വിവരം. അതിഥി തൊഴിലാളികളായ മൂന്ന് പേരുടെ മൃതദേഹങ്ങൾ തിരിച്ചറിഞ്ഞിട്ടുണ്ട്. കാണാതായവർക്കായുള്ള തെരച്ചിൽ രാത്രി വൈകിയും തുടരുകയാണ്.
Related Post
അപകടത്തെ തുടർന്ന് സമീപ പ്രദേശങ്ങളിലെ താമസക്കാരെ ചുള്ളിക്ക സർക്കാർ എൽ.പി. സ്കൂളിൽ ആരംഭിച്ച ദുരിതാശ്വാസ ക്യാമ്പിലേക്ക് മാറ്റി. മേപ്പാടിയിൽ നിന്ന് ചൂരൽമലയിലേക്കുള്ള ഏക റോഡിലാണ് മണ്ണിടിച്ചിൽ ഉണ്ടായത്. ഇതോടെ ചൂരൽമല–അട്ടമല മേഖലകളിലേക്കുള്ള ഗതാഗതം തടസ്സപ്പെട്ടു. വിനോദസഞ്ചാരികളോ മറ്റാരെങ്കിലുമോ മണ്ണിനടിയിൽ കുടുങ്ങിക്കിടക്കാനുള്ള സാധ്യതയും പരിശോധിച്ചുവരികയാണ്.
