കോഴിക്കോട്: സംസ്ഥാനത്തെ സഹകരണ ബാങ്കിങ് മേഖലയിലെ ഘടനാപരമായ മാറ്റങ്ങൾ വീണ്ടും ചർച്ചയാകുന്നതിനിടെ, കേരള ബാങ്കിന് പകരം ജില്ലാ സഹകരണ ബാങ്കുകൾ പുനഃസ്ഥാപിക്കുന്ന കാര്യം സർക്കാരിന്റെ സജീവ പരിഗണനയിലുണ്ടെന്ന് സൂചന. ഒന്നാം പിണറായി വിജയൻ സർക്കാരിന്റെ കാലത്ത് രൂപീകരിച്ച കേരള ബാങ്ക് സഹകരണ മേഖലയ്ക്ക് പ്രതീക്ഷിച്ച നേട്ടങ്ങൾ സമ്മാനിച്ചില്ലെന്ന വിലയിരുത്തൽ ഒരു വിഭാഗം സഹകാരികൾ ഉയർത്തുന്നുണ്ട്.
2019-ലാണ് സംസ്ഥാന സഹകരണ ബാങ്കും 13 ജില്ലാ സഹകരണ ബാങ്കുകളും ലയിപ്പിച്ച് കേരള ബാങ്ക് രൂപീകരിച്ചത്. അതിനു മുൻപ് പ്രൈമറി സഹകരണ ബാങ്കുകൾ, ജില്ലാ ബാങ്കുകൾ, സംസ്ഥാന സഹകരണ ബാങ്ക് എന്നീ ത്രിതല സംവിധാനമായിരുന്നു സംസ്ഥാനത്ത് നിലനിന്നിരുന്നത്. പുതിയ ക്രമീകരണത്തോടെ ജില്ലാ ബാങ്കുകൾ ഒഴിവാക്കി പ്രൈമറി ബാങ്കുകളും കേരള ബാങ്കും ഉൾപ്പെടുന്ന ദ്വിതല സംവിധാനത്തിലേക്കാണ് മാറ്റം വരുത്തിയത്.
കേരള ബാങ്ക് നിലവിൽ വന്നതോടെ പ്രൈമറി ബാങ്കുകൾക്ക് കുറഞ്ഞ പലിശനിരക്കിൽ വായ്പ ലഭ്യമാകുമെന്നും നിക്ഷേപകർക്ക് കൂടുതൽ ആനുകൂല്യങ്ങൾ ഉറപ്പാക്കാനാകുമെന്നും അന്ന് അവകാശപ്പെട്ടിരുന്നു. എന്നാൽ ഈ ലക്ഷ്യങ്ങൾ പൂർണമായും കൈവരിക്കാനായില്ലെന്നാണ് ഒരു വിഭാഗം സഹകാരികളുടെ വിമർശനം.
പ്രൈമറി ബാങ്കുകൾ, ജില്ലാ ബാങ്ക്, സംസ്ഥാന സഹകരണ ബാങ്ക് എന്നിങ്ങനെ ത്രിതല ബാങ്കിങ് സംവിധാനമായിരുന്നു നേരത്തെ കേരളത്തിലുണ്ടായിരുന്നത്. ഇതിൽ ജില്ലാ ബാങ്കുകളെ ഒഴിവാക്കി പ്രൈമറി ബാങ്കും കേരള ബാങ്കും ആക്കി ക്രമീകരിച്ചത് 2019ലാണ്. ജില്ലാ ബാങ്ക് ഒഴിവാകുമ്പോൾ കുറഞ്ഞ പലിശ നിരക്കിൽ വായ്പ ലഭ്യമാകുമെന്നും നിക്ഷേപത്തിന് കൂടുതൽ പലിശ ലഭിക്കുമെന്നുമായിരുന്നു സഹകരണ ബാങ്കുകൾക്കും ഉപഭോക്താക്കൾക്കും നൽകിയ വാഗ്ദാനം. എന്നാൽ കേരള ബാങ്ക് നടപ്പാക്കിയതോടെ ഈ അനുകൂല്യങ്ങളൊന്നും ലഭിച്ചില്ലെന്നാണു യുഡിഎഫ് സഹകാരികളുടെ വാദം.
ജില്ലാ ബാങ്കുകൾ പ്രവർത്തിച്ചിരുന്ന കാലത്ത് പ്രൈമറി ബാങ്കുകൾ നേരിടുന്ന സാമ്പത്തിക പ്രതിസന്ധികളിൽ പ്രാദേശികതലത്തിൽ ഇടപെട്ട് പരിഹാരം കണ്ടെത്താൻ സാധിച്ചിരുന്നുവെന്നും അവർ ചൂണ്ടിക്കാട്ടുന്നു. കേരള ബാങ്ക് നിലവിൽ വന്നതോടെ റിസർവ് ബാങ്കിന്റെ ചട്ടങ്ങളും നിയന്ത്രണങ്ങളും കൂടുതൽ ബാധകമായതിനാൽ അടിയന്തര ഇടപെടലുകൾക്ക് പരിമിതികളുണ്ടായെന്നാണ് വിലയിരുത്തൽ.
പല ജില്ലകളിലെയും പ്രൈമറി ബാങ്കുകൾ പ്രതിസന്ധി നേരിട്ടപ്പോൾ ആവശ്യമായ പിന്തുണ ലഭിച്ചില്ലെന്നും, ജില്ലാ ബാങ്കുകൾ നിലനിന്നിരുന്നെങ്കിൽ ചില പ്രതിസന്ധികൾ ലഘൂകരിക്കാനാകുമായിരുന്നുവെന്നും വിമർശകർ പറയുന്നു. സഹകരണ മേഖലയുമായി ബന്ധപ്പെട്ട ചില വിവാദങ്ങളും നിക്ഷേപകരുടെ വിശ്വാസ്യതയെ ബാധിച്ചതായും അവർ ചൂണ്ടിക്കാണിക്കുന്നു. ജില്ലാ ബാങ്ക് ഉണ്ടായിരുന്നെങ്കിൽ കരുവന്നൂർ അടക്കം നിക്ഷേപകർക്ക് പണം നഷ്ടപ്പെടില്ലായിരുന്നു എന്നും ഇതു സഹകരണ മേഖലയുടെ വിശ്വാസ്യത വലിയ രീതിയിൽ ഇടിച്ചുവെന്നുമാണ് ഈ വിഭാഗത്തിന്റെ വാദം.
അതേസമയം, കേരള ബാങ്കിനെ പിരിച്ചുവിട്ട് പഴയ സംവിധാനത്തിലേക്ക് മടങ്ങുക പ്രായോഗികമല്ലെന്നാണ് നിലവിലെ നേതൃത്വത്തിന്റെ നിലപാട്. റിസർവ് ബാങ്കിന്റെ അനുമതിയോടെയാണ് ബാങ്കുകളുടെ ലയനം നടപ്പാക്കിയതെന്നും, ഇപ്പോൾ തിരിച്ചുപോക്ക് നടത്തുന്നത് നിയമപരവും ഭരണപരവുമായി സങ്കീർണമായ നടപടികളിലേക്ക് നയിക്കുമെന്നും അവർ വിലയിരുത്തുന്നു.
സഹകരണ മേഖലയെ കൂടുതൽ ശക്തിപ്പെടുത്താൻ ഏകീകൃത ബാങ്കിങ് സംവിധാനം സഹായകമാണെന്നും, പഴയ മാതൃകയിലേക്കുള്ള മടക്കം മേഖലയെ പിന്നോട്ടടിക്കുമെന്നുമാണ് നേതൃത്വത്തിന്റെ വാദം. ഇതോടെ കേരള ബാങ്കിന്റെ ഭാവിയും സഹകരണ ബാങ്കിങ് മേഖലയിലെ തുടർപരിഷ്കാരങ്ങളും വീണ്ടും ചർച്ചകളുടെ കേന്ദ്രബിന്ദുവായിരിക്കുകയാണ്.
