വാഷിങ്ടൺ: പശ്ചിമേഷ്യയിലെ യുദ്ധസാഹചര്യത്തിനിടെ ഇറാൻ ഹോർമുസ് കടലിടുക്കിൽ സ്ഥാപിച്ചിരുന്ന മൈനുകൾ വിജയകരമായി നീക്കം ചെയ്തതായി അമേരിക്കൻ സെൻട്രൽ കമാൻഡ്. ലോകത്തിലെ പ്രധാനപ്പെട്ട ഊർജ ഗതാഗത പാതകളിലൊന്നായ ഹോർമുസ് കടലിടുക്ക് ഇപ്പോൾ പൂർണമായും സുരക്ഷിതമാണെന്നും യു.എസ് സേന അവകാശപ്പെട്ടു.
ഗൾഫ് മേഖലയിലെ സംഘർഷാവസ്ഥയ്ക്കിടെ പ്രതിരോധത്തിന്റെ ഭാഗമായി ഇറാൻ ഹോർമുസ് കടലിടുക്ക് അടച്ചതോടെയാണ് പ്രതിസന്ധി രൂക്ഷമായത്. കടലിൽ മൈനുകൾ സ്ഥാപിച്ചതോടെ കപ്പൽ ഗതാഗതം തടസ്സപ്പെടുകയും എണ്ണ വ്യാപാരത്തെ കാര്യമായി ബാധിക്കുകയും ചെയ്തു. ഇതോടെ അന്താരാഷ്ട്ര വിപണിയിൽ ഇന്ധനവിലയും ഉയർന്നു.
ഇന്ധനനീക്കം തടസ്സപ്പെടാതിരിക്കാൻ യു.എസ് സേന നടത്തിയ ഇടപെടലിലൂടെ 75 കോടി ബാരൽ ക്രൂഡ് ഓയിൽ ഹോർമുസിന് പുറത്തേക്ക് എത്തിക്കാൻ സാധിച്ചതായും സെൻട്രൽ കമാൻഡ് അവകാശപ്പെട്ടു. ഇതുവരെ ഏകദേശം 1,500 ചരക്കുകപ്പലുകൾ ഹോർമുസ് കടലിടുക്കിലൂടെ സുരക്ഷിതമായി കടന്നുപോയതായും യു.എസ് സേന വ്യക്തമാക്കി.
Related Post
ഹോർമുസ് ജലപാത പൂർണമായും തുറന്നിരിക്കുകയാണെന്നും അന്താരാഷ്ട്ര കപ്പൽ ഗതാഗതത്തിന് നിലവിൽ തടസ്സമില്ലെന്നും മുൻ യു.എസ് പ്രസിഡന്റ് ഡോണൾഡ് ട്രംപ് നേരത്തെ പറഞ്ഞിരുന്നു. ഈ പ്രസ്താവനയ്ക്ക് കൂടുതൽ ശക്തി പകരുന്നതാണ് സെൻട്രൽ കമാൻഡിന്റെ പുതിയ അവകാശവാദം.
തന്ത്രപ്രധാനമായ ഹോർമുസ് മേഖലയിലെ തങ്ങളുടെ സാന്നിധ്യം ഉറപ്പാക്കാനും എണ്ണ വിപണിയിലെ ആശങ്കകൾ കുറയ്ക്കാനും നടപടി സഹായിക്കുമെന്ന് യു.എസ് സേന അറിയിച്ചു.
