തിരുവനന്തപുരം: 8, 9, 10 ക്ലാസുകളിലെ സബ്ജക്ട് മിനിമം മാർക്ക് സംവിധാനവുമായി ബന്ധപ്പെട്ട സർക്കാർ തീരുമാനത്തിനെതിരെ മുൻ വിദ്യാഭ്യാസ മന്ത്രി വി. ശിവൻകുട്ടി. യാതൊരു അക്കാദമിക് ചർച്ചയും നടത്താതെയാണ് തീരുമാനമെടുത്തതെന്നും ഇത് പൊതുവിദ്യാഭ്യാസ മേഖലയെ പിന്നോട്ടടിക്കുന്നതാണെന്നും അദ്ദേഹം ആരോപിച്ചു.
വിദ്യാർഥികളുടെ പഠനനിലവാരം ഉയർത്തുക എന്ന ലക്ഷ്യത്തോടെയാണ് ഓരോ വിഷയത്തിനും കുറഞ്ഞത് 30 ശതമാനം മാർക്ക് എന്ന വ്യവസ്ഥ കൊണ്ടുവന്നത്. 8, 9 ക്ലാസുകളിൽ മിനിമം മാർക്ക് ലഭിക്കാത്ത വിദ്യാർഥികൾക്ക് പ്രത്യേക പഠനപിന്തുണയും വീണ്ടും പരീക്ഷ എഴുതാനുള്ള അവസരവും നൽകിയിരുന്നു.
മിനിമം മാർക്ക് സംവിധാനം ഒഴിവാക്കുന്നതോടെ വിദ്യാർഥികൾക്ക് ലഭിച്ചിരുന്ന പഠനപിന്തുണാ ക്ലാസുകളും ഇല്ലാതാകുമെന്നാണ് ശിവൻകുട്ടിയുടെ ആരോപണം. വിദ്യാർഥികളുടെ പഠനനിലവാരം ഉറപ്പാക്കുന്നതിനായി നടപ്പാക്കിയ സംവിധാനത്തിന് ദേശീയ തലത്തിൽ പോലും അംഗീകാരം ലഭിച്ചിരുന്നുവെന്നും അദ്ദേഹം പറഞ്ഞു.
Related Post
പരീക്ഷയിൽ കുറഞ്ഞ മാർക്ക് നേടിയാലും വിജയിക്കാവുന്ന സാഹചര്യം വീണ്ടും ഉണ്ടാകുന്നത് വിദ്യാർഥികളുടെ പഠന നിലവാരത്തെ ബാധിക്കുമെന്നും ശിവൻകുട്ടി ആരോപിച്ചു. വിദ്യാർഥികളുടെ ഭാവി പരിഗണിക്കാതെയാണ് തീരുമാനമെടുത്തതെന്നും അദ്ദേഹം വിമർശിച്ചു.
അതേസമയം, പ്ലസ് വൺ ബാച്ച്, സീറ്റ് അലോട്ട്മെന്റ് എന്നിവയുമായി ബന്ധപ്പെട്ട് ഉയരുന്ന അഴിമതി ആരോപണങ്ങളിൽ വിജിലൻസ് അന്വേഷണം നടത്തണമെന്നും ശിവൻകുട്ടി ആവശ്യപ്പെട്ടു. വിദ്യാഭ്യാസ മേഖലയെ കച്ചവടവത്കരിക്കാനും എയ്ഡഡ് മാനേജ്മെന്റുകളെ സഹായിക്കാനുമാണ് നീക്കം നടക്കുന്നതെന്നും അദ്ദേഹം ആരോപിച്ചു.
അതേസമയം, 2026–27 അധ്യയനവർഷത്തിൽ എസ്എസ്എൽസി പരീക്ഷയ്ക്ക് ഓരോ വിഷയത്തിലും എഴുത്തുപരീക്ഷയിൽ 30 ശതമാനം മിനിമം മാർക്ക് നിർബന്ധമാക്കാനുള്ള തീരുമാനം തൽക്കാലം നടപ്പാക്കേണ്ടതില്ലെന്നാണ് സർക്കാർ നിലപാട്. 8, 9 ക്ലാസുകളിൽ നേരത്തെ നടപ്പാക്കിയ മിനിമം മാർക്ക് സംവിധാനം തുടരുമെന്നും സർക്കാർ വ്യക്തമാക്കിയിട്ടുണ്ട്.