ന്യൂഡല്‍ഹി: ഭരണഘടനയില്‍ നിന്ന് സോഷ്യലിസം, മതേതരത്വം എന്നീ വാക്കുകള്‍ നീക്കം ചെയ്യണമെന്നും ഇന്ദിരാഗാന്ധി സര്‍ക്കാര്‍ ഏര്‍പ്പെടുത്തിയ അടിയന്തരാവസ്ഥയ്ക്ക് കോണ്‍ഗ്രസ് മാപ്പ് പറയണമെന്നും ആര്‍എസ്എസ് ജനറല്‍ സെക്രട്ടറി ദത്താത്രേയ ഹൊസബാളെ. അടിയന്തരാവസ്ഥക്കാലത്ത്, 1976-ല്‍ ഇന്ദിരാഗാന്ധിയുടെ നേതൃത്വത്തിലുള്ള കോണ്‍ഗ്രസ് സര്‍ക്കാര്‍ ആ വാക്കുകള്‍ ഭരണഘടനയിലെ ആമുഖത്തിലേക്ക് ചേര്‍ത്തതാണെന്നും, അതിനെ പിന്തുടരേണ്ടതില്ലെന്നും ഹൊസബാളെ പറഞ്ഞു.
അന്നത്തെ അടിയന്തരാവസ്ഥയ്ക്കിടെ ആയിരക്കണക്കിന് ആളുകളെ അന്യായമായി തടവിലാക്കിയതായും, പീഡിപ്പിച്ചതായും ഹൊസബാളെ പറഞ്ഞു. നീതിന്യായവ്യവസ്ഥയുടെയും മാധ്യമങ്ങളുടെയും സ്വാതന്ത്ര്യം അതിക്രമിച്ചതായി അദ്ദേഹം ചൂണ്ടിക്കാട്ടി. വലിയ തോതില്‍ നിര്‍ബന്ധിത വന്ധ്യീകരണങ്ങള്‍ നടപ്പാക്കിയതും ഈ കാലഘട്ടത്തിലാണെന്നും ഹൊസബാളെ ആരോപിച്ചു.
‘അന്നത്തെ നിഷേധങ്ങളെ മറന്ന്, ഇപ്പോള്‍ ഭരണഘടനയുടെ പകര്‍പ്പുമായി പ്രദര്‍ശിപ്പിക്കുകയാണ് ചിലര്‍. എന്നാല്‍ ഇതുവരെ കോണ്‍ഗ്രസ് അതിനായി ക്ഷമ ചോദിച്ചിട്ടില്ല,’ ഹൊസബാളെ പറഞ്ഞു. അത്തരം അധികാരദൗര്‍ബല്യങ്ങള്‍ രാജ്യത്തിന് വീണ്ടും നേരിടേണ്ടിവരരുതെന്നത് എല്ലാവരുടെയും ഉത്തരവാദിത്തമാണെന്ന് ഹൊസബാളെ കൂട്ടിച്ചേര്‍ത്തു. ഭരണഘടനയുടെ മൂലതത്വങ്ങള്‍ സംരക്ഷിക്കുന്നതിന് സത്യസന്ധതയും ചരിത്രബോധവുമുണ്ടായിരിക്കണമെന്നും അദ്ദേഹം ആഹ്വാനം ചെയ്തു. ഭരണഘടനയില്‍ ‘സോഷ്യലിസ്റ്റ്’, ‘സെക്യുലര്‍’, ‘അഖണ്ഡത’ എന്നീ വാക്കുകള്‍ ചേര്‍ത്ത 42-ാമത് ഭേദഗതിക്കെതിരെ ഉന്നയിച്ച ഹര്‍ജികള്‍ സുപ്രീം കോടതി നേരത്തെ തള്ളിയിരുന്നു.
Related Post
