തിരുവനന്തപുരം: മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി ഡോ കെ എം ഏബ്രഹാം തന്നെ അധിക്ഷേപിച്ചെന്നു കാണിച്ചു നിയമനടപടി ആരംഭിച്ചതോടെ അധിക്ഷേപ പരാമർശങ്ങൾ നിരുപാധികം പിൻവലിച്ച് മാപ്പ് പറഞ്ഞ് റിട്ട. ജസ്റ്റീസ് കെമാൽ പാഷ. ‘ജസ്റ്റീസ് കെമാൽ പാഷ വോയിസ്’ എന്ന സ്വന്തം യൂട്യൂബ് ചാനൽ വഴി ഡോ കെ എം ഏബ്രഹാമിനെതിരെ നടത്തിയ വ്യക്തിപരമായ അധിക്ഷേപ പരാമർശങ്ങൾക്കെതിരെയാണ് കെഎം ഏബ്രഹാം വക്കീൽ നോട്ടീസയച്ചത്. വരവിൽ കവിഞ്ഞ സ്വത്ത് സമ്പാദന കേസിൽ ഹൈക്കോടതി ഏബ്രഹാമിനെതിരെ സിബിഐ അന്വേഷണത്തിന് ഉത്തരവിട്ടിരുന്നു.
ഇതിനു പിന്നാലെ വ്യക്തി അധിക്ഷേപ പരാമർശങ്ങളോടെ കെമാൽ പാഷ സ്വന്തം യൂട്യൂബ് ചാനലിൽ വീഡിയോ പോസ്റ്റ് ചെയ്തത്. അന്വേഷണത്തിന് ഹൈക്കോടതി ഉത്തരവിടുക മാത്രം ചെയ്ത കേസിൽ കെഎം ഏബ്രഹാമിനെ കാട്ടുകള്ളൻ, അഴിമതി വീരൻ, കൈക്കൂലി വീരൻ തുടങ്ങിയ വാക്കുകളിലൂടെ അധിക്ഷേപിച്ചിരുന്നു. തുടർന്നാണ് വീഡിയോ പിൻവലിച്ച് പരസ്യമായി മാപ്പ് പറയണമെന്നും മുൻനിര പത്രങ്ങളിലടക്കം മാപ്പപേക്ഷ പ്രസിദ്ധീകരിക്കണമെന്നും ആവശ്യപ്പെട്ട് കെഎംഏബ്രഹാം വക്കീൽ നോട്ടീസ് അയച്ചത്.
ഈ പറഞ്ഞതുപോലെ ചെയ്തില്ലെങ്കിൽ രണ്ടു കോടി രൂപ നഷ്ടപരിഹാരം ആവശ്യപ്പെട്ട് മാനനഷ്ടക്കേസ് നൽകുമെന്നും അദേഹം വ്യക്തമാക്കിയിരുന്നു. തുടർന്നാണ് അദേഹം വീഡിയോ പിൻവലിച്ച് ക്ഷമാപണം നടത്തിയത്.
Related Post
