കോഴിക്കോട്: കോളേജിനകത്ത് പട്ടാപ്പകൽ കാട്ടുപന്നിയുടെ വിളയാട്ടം. കോഴിക്കോട് ബാലുശ്ശേരി സംസ്കൃത കോളേജിലാണ് കഴിഞ്ഞ ദിവസം കാട്ടുപന്നിയുടെ ആക്രമണമുണ്ടായത്. തനിക്കുനേരെ പാഞ്ഞടുത്ത കാട്ടുപന്നിയുടെ ആക്രമണത്തിൽ നിന്ന് അധ്യാപകനായ മനോജ് കുമാർ കഷ്ടിച്ച് രക്ഷപ്പെടുകയായിരുന്നു.
കഴിഞ്ഞ ദിവസം വൈകീട്ട് 3.30 ഓടെയാണ് കോളേജ് കോംപൗണ്ടിനകത്ത് കാട്ടുപന്നി പ്രവേശിച്ചത്. ഈ സമയം അധ്യാപകനായ മനോജ് കുമാർ ലൈബ്രറിയിൽ നിന്നും ഓഫീസിലേക്ക് കോളേജ് വരാന്തയിലൂടെ നടന്നു വരികയായിരുന്നു. അധ്യാപകനെ കണ്ടപാടെ പന്നി പാഞ്ഞടുത്തു. പൊടുന്നനെ മനോജ് കുമാർ ഒഴിഞ്ഞു മാറിയതിനാൽ ബാലൻസ് കിട്ടാതെ പന്നി ചുമരിൽ പോയി ഇടിക്കുകയായിരുന്നു. പെട്ടെന്ന് തന്നെ സമീപത്തെ കുറ്റിക്കാട്ടിലേക്ക് ഓടി മറയുകയും ചെയ്തു.
സംഭവ സമയം വിദ്യാർത്ഥികളാരും പുറത്തില്ലാതിരുന്നതിനാൽ വൻ അപകടം ഒഴിവായി. ബാലുശ്ശേരി ടൗണിനോട് ചേർന്ന് പ്രവർത്തിക്കുന്ന സംസ്കൃത കോളേജിന്റെ പരിസരമാകെ കാടുപിടിച്ച നിലയിലാണ്. ഇവിടെ മൃഗങ്ങൾ താവളമാക്കുന്നുണ്ടെന്ന് നാട്ടുകാർ പറയുന്നു.
Related Post
