തൃശൂർ: ഓടിച്ചുകൊണ്ടിരുന്ന കെഎസ്ആർടിസി ബസ് പാലിയേക്കര ടോൾപ്ലാസയ്ക്കു സമീപം നിർത്തി ഇറങ്ങിപ്പോയ ഡ്രൈവറെ തൂങ്ങി മരിച്ച നിലയിൽ കണ്ടെത്തി. പാലക്കാട് നെന്മാറ ചാത്തമംഗലം സ്വദേശി നമ്പൂതിരിപ്പറമ്പ് വീട്ടിൽ ബാബുവിനെയാണ് (45) മണലി പാലത്തിനു താഴെ മരിച്ച നിലയിൽ കണ്ടെത്തിയത്. ശനിയാഴ്ച വൈകിട്ടായിരുന്നു സംഭവം.
എറണാകുളത്തു നിന്ന് പാലക്കാട്ടേക്കുള്ള ഫാസ്റ്റ് പാസഞ്ചർ ബസായിരുന്നു ബാബു ഓടിച്ചിരുന്നത്. പാലിയേക്കര ടോൾപ്ലാസയ്ക്കു സമീപം എത്തിയപ്പോൾ ബസ് നിർത്തിയിട്ട് ബാബു ഇറങ്ങിപ്പോവുകയായിരുന്നു. തുടർന്ന് യാത്രക്കാരെ കണ്ടക്ടർ ഇടപെട്ട് മറ്റൊരു ബസിൽ കയറ്റിവിട്ടു. പിന്നീട് ബസ് പുതുക്കാട് ഡിപ്പോയിലേക്ക് മാറ്റുകയും ചെയ്തു.
ഇതിനിടെ ബന്ധുക്കൾ പുതുക്കാട് പോലീസിൽ പരാതി നൽകുകയും അന്വേഷണം ആരംഭിക്കുകയും ചെയ്തു. അന്വേഷണത്തിനിടെ മണലി പാലത്തിന് സമീപത്തുനിന്ന് ബാബുവിൻ്റെ മൊബൈൽ ഫോൺ കണ്ടെത്തുകയായിരുന്നു. ഞായറാഴ്ച രാവിലെയാണ് പാലത്തിന് സമീപത്ത് ബാബുവിനെ മരിച്ച നിലയിൽ കണ്ടെത്തിയത്.
Related Post
