തിരുവനന്തപുരം: നെയ്യാറ്റിന്കരയിലെ വിവാദ സമാധിയിടത്തില് കണ്ടെത്തിയ മൃതദേഹം പോസ്റ്റ്മോര്ട്ടത്തിനായി തിരുവനന്തപുരം മെഡിക്കല് കോളേജ് ആശുപത്രിയിലേക്ക് മാറ്റി. കല്ലറയില്നിന്ന് കണ്ടെടുത്ത മൃതദേഹം ഗോപന്സ്വാമിയുടേത് തന്നെയാണെന്നാണ് പ്രാഥമിക നിഗമനം. കല്ലറ പൊളിച്ച് പുറത്തെടുത്ത മൃതദേഹം പൂർണമായി അഴുകിയിട്ടില്ലാത്തതിനാൽ വ്യാഴാഴ്ച രാവിലെ ഒമ്പതരയോടെ പോസ്റ്റ്മോര്ട്ടത്തിനായി തിരുവനന്തപുരം മെഡിക്കല് കോളേജിലേക്ക് മാറ്റി. ഗോപന്സ്വാമിയുടെ മകനെയും പോലീസ് മെഡിക്കല് കോളേജ് ആശുപത്രിലേക്ക് കൊണ്ടുപോയിട്ടുണ്ട്. ഉച്ചയോടെ പോസ്റ്റ്മോര്ട്ടം പൂര്ത്തിയാക്കും.
സമാധി മണ്ഡപം പൊളിച്ച് മൃതദേഹം പുറത്തെടുക്കുന്നതുള്പ്പെടെ നടപടി ക്രമങ്ങള് സമാധാനപരമായി പൂര്ത്തിയാക്കാന് കഴിഞ്ഞുവെന്ന് സബ് കലക്ടര് ഒവി അല്ഫ്രഡ് പറഞ്ഞു. വിശദമായ ശാസ്ത്രീയ പരിശോധനകള്ക്കു ശേഷം മൃതദേഹം ബന്ധുക്കള്ക്കു വിട്ടുനല്കും. വീട്ടുകാരുമായി ഞാനും ഡിവൈഎസ്പിയും സംസാരിച്ച് കാര്യങ്ങള് ബോധ്യപ്പെടുത്തി. നിയമപരമായി പൊലീസും ജില്ലാ ഭരണകൂടവും എല്ലാ ഒരുക്കങ്ങളും നടത്തിയിരുന്നുവെന്നും സബ് കലക്ടര് പറഞ്ഞു.
വ്യാഴാഴ്ച രാവിലെ ഏഴുമണിയോടെയാണ് വിവാദമായ ഗോപന്സ്വാമിയുടെ സമാധിയിടം പൊളിച്ചുതുടങ്ങിയത്. സബ് കളക്ടര് ഉള്പ്പെടെയുള്ള ഉദ്യോഗസ്ഥരുടെ സാന്നിധ്യത്തിലായിരുന്നു നടപടികള്. സ്ലാബ് പൊളിച്ചുമാറ്റിയതിന് പിന്നാലെ കല്ലറയ്ക്കുള്ളില് ഇരിക്കുന്ന നിലയില് മൃതദേഹം കണ്ടെത്തി. കല്ലറയ്ക്കുള്ളില് മൃതദേഹത്തിന്റെ നെഞ്ചുവരെ ഭസ്മവും പൂജാദ്രവ്യങ്ങളും കൊണ്ട് നിറച്ചനിലയിലായിരുന്നു. തുടര്ന്ന് മൃതദേഹം കല്ലറയ്ക്കുള്ളില്നിന്ന് പുറത്തെടുത്ത് ഇന്ക്വസ്റ്റ് നടത്തി.
Related Post
സമാധിയിരുത്തിയത് ഹൃദയഭാഗം വരെ കര്പ്പൂരവും ഭസ്മവും അടക്കമുള്ള സുഗന്ധദ്രവ്യങ്ങള്കൊണ്ടു മൂടിയിരിക്കുകയാണെന്നും മുഖത്തും ശിരസ്സിലും വിഗ്രഹത്തില് ചാര്ത്തുന്നതുപോലെ കളഭം ചാര്ത്തി, പിന്നീട് പിതാവ് വാങ്ങിവച്ചിരുന്ന ശിലയെടുത്ത് സമാധിമണ്ഡപം മൂടി എന്നാണ് മക്കള് പൊലീസിനു മൊഴി നല്കിയത്. കല്ലറ പൊളിച്ചപ്പോള് മക്കള് പറഞ്ഞതു ശരിവയ്ക്കുന്ന തരത്തിലാണ് മൃതദേഹം ഇരുന്നിരുന്നത്. മരണത്തില് എന്തെങ്കിലും അസ്വാഭാവികത ഉണ്ടോ എന്ന് അറിയാനുള്ള ഫൊറന്സിക് പരിശോധനയാണു പോലീസ് നടത്തുക.
മൃതദേഹം പുറത്തെടുക്കുമ്പോൾ കല്ലറയ്ക്കുള്ളില് ഭസ്മവും കര്പ്പൂരവും അടക്കമുള്ള സുഗന്ധദ്രവ്യങ്ങള് കുത്തിനിറച്ച നിലയിലായിരുന്നു. ഇതു പൂര്ണമായി മാറ്റിയ ശേഷമാണ് അഴുകിത്തുടങ്ങിയ മൃതദേഹം പുറത്തെടുത്തത്. കല്ലറയിലെ മൃതദേഹത്തിന്, കാണാതായതായി കേസ് റജിസ്റ്റര് ചെയ്തിരിക്കുന്ന ഗോപന് സ്വാമിയുമായി സാദൃശ്യമുണ്ടെന്നു പൊലീസ് അനൗദ്യോഗികമായി വ്യക്തമാക്കുന്നു. ഇതു സ്ഥിരീകരിക്കാന് ഡിഎന്എ പരിശോധന ഉള്പ്പെടെ നടത്തും. മരണകാരണവും കണ്ടെത്താനുണ്ട്.
സ്ഥലത്തെ സംഘർഷ സാധ്യത കണക്കിലെടുത്ത് രണ്ട് ഡിവൈഎസ്പിമാരുടെ നേതൃത്വത്തിൽ വൻ പൊലീസ് സന്നാഹം പുലർച്ചെതന്നെ എത്തിയിരുന്നു. ജില്ലാ ഭരണകൂടമാണു കാര്യങ്ങൾ ഏകോപിപ്പിക്കുന്നത്. കല്ലറയിലേക്കുള്ള വഴി രാവിലെത്തന്നെ അടച്ചിരുന്നു.
ഹൃദയഭാഗം വരെ കര്പ്പൂരവും ഭസ്മവും അടക്കമുള്ള സുഗന്ധദ്രവ്യങ്ങള്…!! മുഖത്തും ശിരസ്സിലും വിഗ്രഹത്തില് ചാര്ത്തുന്നതുപോലെ കളഭം .. ഇരിക്കുന്ന നിലയിൽ കല്ലറയിൽ മൃതദേഹം കണ്ടെത്തി… പുറത്തെടുത്ത് പോസ്റ്റ്മോർട്ടം…
