ചാരുംമൂട്: 12 വയസുകാരിയായ വിദ്യാർഥിനിയെ കാറിൽ കയറ്റി ലൈംഗികമായി ചൂഷണംചെയ്ത സിപിഐ മുൻ ബ്രാഞ്ച് സെക്രട്ടറിക്കെതിരേ പോക്സോ കേസ്. ആദിക്കാട്ടുകുളങ്ങര പുലച്ചാടിവിള വടക്കേതിൽ എച്ച്. ദിലീപി(42)നെതിരേയാണ് നൂറനാട് പോലീസ് കേസെടുത്തത്. ഇയാൾ ഒളിവിലാണ്. വെള്ളിയാഴ്ചയാണ് കേസിനാസ്പദമായ സംഭവമുണ്ടായത്.
സ്കൂളിലേക്കു പോകുകയായിരുന്ന പെൺകുട്ടിയെ സ്കൂളിൽ കൊണ്ടുവിടാമെന്ന വ്യാജേന കാറിൽ കയറ്റിക്കൊണ്ടുപോയി. ആളൊഴിഞ്ഞ സ്ഥലത്തുവെച്ച് ലൈംഗികമായി ചൂഷണംചെയ്തു. പെൺകുട്ടി എതിർത്തപ്പോൾ പുറത്തുപറഞ്ഞാൽ കൊന്നുകളയുമെന്ന് ഭീഷണിപ്പെടുത്തിയശേഷം ബസ്സ്റ്റോപ്പിനു സമീപം ഇറക്കിവിട്ടുവെന്ന് പോലീസ് പറയുന്നു.
തുടർന്ന് ഒന്നുമറിയാത്തപോലെ തദ്ദേശ തിരഞ്ഞെടുപ്പിലെ സ്ഥാനാർഥികളുടെ പ്രചാരണത്തിനായി പോയി. സ്കൂളിലെത്തിയ കുട്ടി സഹപാഠികളോടും അധ്യാപകരോടും സംഭവം പറഞ്ഞു. സ്കൂൾ അധികൃതരാണ് പോലീസിലറിയിച്ചത്. എസ്.ഐ. അജിത്തിന്റെ നേതൃത്വത്തിൽ കുട്ടിയുടെ മൊഴി രേഖപ്പെടുത്തിയ ശേഷം കേസെടുക്കുകയായിരുന്നു.
Related Post
